വാവേയുടെ ഇന്ത്യൻ ഓഫീസുകളിൽ ആദായ നികുതി റെയ്​ഡ്​

ന്യൂഡൽഹി: ചൈനീസ്​ ടെലി​കോം കമ്പനിയായ വാവേയുടെ (Huawei) ഇന്ത്യയിലെ ഓഫിസുകളിൽ ആദായ നികുതി വകുപ്പിന്‍റെ​ റെയ്​ഡ്​. കമ്പനിയുടെ ഡൽഹി, ഗുരുഗ്രാം, ബംഗളൂരു എന്നിവിടങ്ങളിലെ ഓഫിസുകളിലാണ്​ നികുതി വെട്ടിപ്പുമായി ബന്ധപ്പെട്ട പരിശോധന ഐ.ടി വകുപ്പ്​ കഴിഞ്ഞ ദിവസങ്ങളിൽ നടത്തിയത്​. വിവിധ രേഖകൾ ഐ.ടി ഉദ്യോഗസ്ഥർ കസ്റ്റഡിയിലെടുത്തിട്ടുണ്ട്​. കമ്പനിയുടെ സാമ്പത്തിക ഇടപാടുകളുടെ രേഖകൾ, അക്കൗണ്ട് രേഖകൾ, ഇന്ത്യയിലെ ബിസിനസുമായി ബന്ധപ്പെട്ട വിശദാംശങ്ങൾ, വിദേശ സാമ്പത്തിക ഇടപാടുകൾ തുടങ്ങിയ കാര്യങ്ങൾ പരിശോധിക്കുമെന്ന്​ ഉദ്യോഗസ്ഥർ അറിയിച്ചു.

നിയമങ്ങളും നിയന്ത്രണങ്ങളും അനുസരിച്ചാണ് ഇന്ത്യയിലെ പ്രവർത്തനങ്ങളെന്നും അതിൽ ആത്മവിശ്വാസമുണ്ടെന്നും കമ്പനിയുമായി ബന്ധപ്പെട്ടവർ പ്രതികരിച്ചു. അടുത്തിടെ, മറ്റൊരു ചൈനീസ്​ ടെലികോം കമ്പനിയായ ഇസെഡ്​.ടി.ഇയിലും ആദായ നികുതി വകുപ്പ്​ റെയ്​ഡ്​ നടത്തിയിരുന്നു