റോയൽ എൻഫീൽഡ്​ സി.ഇ.ഒ വിനോദ്​ ദാസരി സ്ഥാനമൊഴിഞ്ഞു

ന്യൂഡൽഹി: റോയൽ എൻഫീൽഡ്​ സി.ഇ.ഒ വിനോദ്​ കെ ദാസരി സ്ഥാനമൊഴിഞ്ഞു. കഴിഞ്ഞ ദിവസമാണ്​ ഇന്ത്യയിലെ പ്രമുഖ ഇരുചക്ര വാഹനനിർമ്മാതാക്കളായ റോയൽ എൻഫീൽഡിൽ നിന്നും ദാസരി രാജി പ്രഖ്യാപിച്ചത്​. ഐഷറിന്‍റെ ഡയറക്​ടർ സ്ഥാനവും അദ്ദേഹം ഒഴിഞ്ഞു. ആഗസ്റ്റ്​ 13 മുതൽ അദ്ദേഹം കമ്പനിയിലുണ്ടാവില്ലെന്ന്​ ഐഷർ മോ​ട്ടോഴ്​സ്​ അറിയിച്ചു.

ബി.ഗോവിന്ദരാജനെ കമ്പനിയുടെ പുതിയ എക്​സിക്യൂട്ടീവ്​ ഡയറക്​ടറായി നിയമിച്ചു. ആഗസ്റ്റ്​ 18ന്​ അദ്ദേഹം ചുമതലയേറ്റെടുക്കും. അഞ്ച്​ വർഷത്തേക്കായിരിക്കും ഗോവിന്ദരാജന്‍റെ നിയമനം. നിലവിൽ റോയൽ എൻഫീൽഡിൽ ചീഫ്​ ഓപ്പറേറ്റിങ്​ ഓഫീസറാണ്​ ഗോവിന്ദരാജൻ.

2019 ഏപ്രിലിലാണ്​ ദാസരി റോയൽ എൻഫീൽഡിന്‍റെ തല​പ്പത്തേക്ക്​ എത്തുന്നത്​. അതിന്​ മുമ്പ്​ അശോക്​ ലൈലാൻഡിൽ സി.ഇ.ഒയും മാനേജിങ്​ ഡയറക്​ടറുമായിരുന്നു അദ്ദേഹം. സ്വന്തം അഭിനിവേശത്തിനൊപ്പം സഞ്ചരിക്കാൻ ദാസരി ഒരുങ്ങുകയാണെന്ന്​ ഐഷർ മോ​ട്ടോഴ്​സ്​ അറിയിച്ചു. ചെന്നൈയിൽ നോൺ-പ്രൊഫിറ്റ്​ ആശുപത്രിക്ക്​ അദ്ദേഹം തുടക്കം കുറിക്കും. കുറഞ്ഞ ചെലവിൽ ചികിത്സ എല്ലാവർക്കും ലഭ്യമാക്കുകയായിരിക്കും ആശുപത്രിയുടെ ലക്ഷ്യമെന്നും ഐഷർ കൂട്ടിച്ചേർത്തു.

എക്കാലവും ഓർമിക്കുന്ന യാത്രയാണ്​ റോയൽ എൻഫീൽഡിൽ ഉണ്ടായതെന്ന്​ ദാസരി പറഞ്ഞു. കോവിഡ്​ സമയത്ത്​ കമ്പനിയെ നയിക്കാൻ സാധിച്ചു. കമ്പനിയുടെ വരുമാനം ഉയർത്തുന്നതിനും വിദേശ രാജ്യങ്ങളിലെ സാന്നിധ്യം വർധിപ്പിക്കാനും സാധിച്ചുവെന്നും അദ്ദേഹം വ്യക്​തമാക്കി.