![Vijay Mallya Vijay Mallya](https://www.madhyamam.com/h-upload/2021/07/27/1111486-vijay-mallya-declared-bankrupt-by-uk-high-court.webp)
വായ്പ തട്ടിപ്പ് കേസ്; മല്യക്ക് തിരിച്ചടി, പാപ്പരായി പ്രഖ്യാപിച്ച് ബ്രിട്ടീഷ് കോടതി
text_fieldsലണ്ടൻ: വിവാദ വ്യവസായി വിജയ് മല്യയെ ബ്രിട്ടീഷ് കോടതി പാപ്പരായി പ്രഖ്യാപിച്ചു. ഇന്ത്യന് ബാങ്കുകളിൽനിന്ന് വായ്പയെടുത്ത് മുങ്ങിയ മല്യക്ക് തിരിച്ചടിയാകും ബ്രിട്ടീഷ് കോടതി വിധി. വിധിക്കെതിരെ ഉയർന്ന കോടതിയിൽ അപ്പീൽ പോകുമെന്നാണ് വിവരം.
കിങ്ഫിഷൻ എയർലൈൻസുമായി ബന്ധപ്പെട്ട 9000കോടിയുടെ വായ്പ തട്ടിപ്പ് കേസിൽ ഇ.ഡിയും സി.ബി.ഐയും അന്വേഷണം തുടരുകയാണ്.
'വിചാരണ നേരിടാൻ അദ്ദേഹം ഇന്ത്യയിലേക്ക് മടങ്ങുമെന്നതിന് തെളിവുകളില്ല. കടം തിരികെ അടക്കുമെന്നതിനും മതിയായ തെളിവുകളില്ല. അതിനാൽ മല്യയെ പാപ്പരായി പ്രഖ്യാപിക്കുന്നു' -കോടതി പറഞ്ഞു.
തന്നെ ഇന്ത്യക്ക് കൈമാറരുതെന്ന മല്യയുടെ ആവശ്യം എല്ലാ കോടതികളും നിരസിച്ചിരുന്നു. എന്നാൽ ഇതുവരെ മല്യയെ ഇന്ത്യയിലേക്ക് തിരികെ എത്തിച്ചിട്ടില്ല. പാപ്പരായി പ്രഖ്യാപിച്ചതോടെ അദ്ദേഹത്തിന്റെ ആസ്തികൾ -ബാങ്ക് അക്കൗണ്ട്, ക്രെഡിറ്റ് കാർഡുകൾ അടക്കം ട്രസ്റ്റിക്ക് കൈമാറേണ്ടിവരും. ട്രസ്റ്റിയുടെ നേതൃത്വത്തിലായിരിക്കും എല്ലാ ആസ്തികളും ബാധ്യതകളും കണക്കാക്കുക. കൂടാതെ ആസ്തികൾ വിറ്റ് കടം വീട്ടുകയും ചെയ്യും. പാപ്പരായി പ്രഖ്യാപിച്ചാൽ നിർബന്ധമായും അയാൾ ട്രസ്റ്റിയുമായി സഹകരിക്കേണ്ടിവരും. മല്യയുടെ എല്ലാ ബാങ്ക് അക്കൗണ്ടുകളും നിലവിൽ മരവിപ്പിച്ചിരിക്കുകയാണ്.
മല്യയുടെ ഫ്രാൻസിലെ കോടികൾ വിലമതിക്കുന്ന ആസ്തികൾ ഇ.ഡി കണ്ടെത്തിയിരുന്നു. 14 കോടിയുടെ സ്വത്തുക്കളാണ് കണ്ടുകെട്ടിയത്.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.