ഫാമിലി പെൻഷൻ: നടപടികൾ ലഘൂകരിച്ച്​ കേന്ദ്രം; പുതിയ നിബന്ധനകൾ അറിയാം

ന്യൂഡൽഹി: ഫാമിലി പെൻഷൻ അനുവദിക്കുന്നത്​ സംബന്ധിച്ച നിയമങ്ങളിൽ മാറ്റവുമായി കേന്ദ്രസർക്കാർ. ഇതുസംബന്ധിച്ച നിർദേശം ബാങ്കുകൾക്ക് പേഴ്​സണൽ മന്ത്രാലയത്തിന്​ കീഴിലുള്ള​ ഡിപ്പാർട്ട്​മെന്‍റ്​ ഓഫ്​ പെൻഷൻ ആൻഡ്​ പെൻഷനേഴ്​സ് നൽകി. പെൻഷൻ വാങ്ങുന്നയാളുടെ മരണത്തിന്​ ശേഷം ബന്ധുക്കൾ പെൻഷൻ ലഭിക്കുന്നതിന്​ ബുദ്ധിമുട്ടുണ്ടാവുന്നുവെന്നും ഇതിന്‍റെ നടപടികൾ പൂർത്തിയാക്കാൻ കൂടുതൽ സമയം ആവശ്യമായി വരുന്നുവെന്നും പരാതിയുണ്ടായിരുന്നു. ഇതിന്​ പിന്നാലെയാണ്​ നടപടികൾ കേന്ദ്രസർക്കാർ ലഘൂകരിച്ചിരിക്കുന്നത്​. ഫാമിലി പെൻഷന്​ അപേക്ഷിക്കുന്ന സമയത്ത്​ നൽകേണ്ട രേഖകളെ സംബന്ധിച്ചും ഇതിനുള്ള നടപടികളും കേന്ദ്രസർക്കാർ ബാങ്കുകൾക്ക്​ നൽകിയ സർക്കുലറിൽ വിശദീകരിക്കുന്നുണ്ട്​.

ഇതുപ്രകാരം നൽകേണ്ട രേഖകൾ:

• പെൻഷനറും പങ്കാളിക്കും ബാങ്കിൽ ജോയിന്‍റ്​ അക്കൗണ്ടാണ്​ ഉള്ളതെങ്കിൽ സമർപ്പിക്കേണ്ട രേഖകൾ: വെള്ള പേപ്പറിലെ അപേക്ഷ ഫോറം
• പെൻഷനറുടെ മരണസർട്ടിഫിക്കറ്റ്​
• പെൻഷനർക്ക്​ നൽകിയ പി.പി.ഒ(പെൻഷൻ പേയ്​മെന്‍റ്​ ഓർഡർ)യുടെ കോപ്പി(ലഭ്യമാണെങ്കിൽ)
  
• അവകാശിയുടെ ജനനതീയതിയും പ്രായവും തെളിയിക്കുന്ന രേഖ
  

പെൻഷനർക്കും പങ്കാളിക്കും ജോയിന്‍റ്​ അക്കൗണ്ട്​ ഇല്ലെങ്കിൽ സമർപ്പിക്കേണ്ട രേഖകൾ:

• രണ്ട്​ സാക്ഷികളുടെ ഒപ്പുള്ള​ ഫോം 14
  
• പെൻഷനറുടെ മരണസർട്ടിഫിക്കറ്റ്​
  
• പെപൻഷനർക്ക്​ അനുവദിച്ച പി.പി.ഒ സർട്ടിഫിക്കറ്റിന്‍റെ കോപ്പി(ലഭ്യമാണെങ്കിൽ)
  
• ജനനതീയതിയും വയസും തെളിയിക്കുന്ന രേഖ.
• ഇതിൽ ഫോം 14 ഗസറ്റഡ്​ ഓഫീസർ സാക്ഷ്യപ്പെടുത്തേണ്ട ആവശ്യമില്ല.

പെൻഷൻ അവകാശിയെ പി.പി.ഒയിലെ വിവരങ്ങൾ അടിസ്ഥാനമാക്കിയാവും ബാങ്കുകൾ കണ്ടെത്തുക. പെൻഷനറുടേയും പങ്കാളിയുടേയും മരണശേഷം ഇതേ രീതിയിൽ തന്നെ മറ്റ്​ കുടുംബാംഗങ്ങൾക്കും പെൻഷൻ അനുവദിക്കും. പി.പി.ഒയിൽ മറ്റ്​ കുടുംബാംഗങ്ങളുടെ പേരില്ലെങ്കിൽ അവസാനം പെൻഷൻ അനുവദിച്ച ഓഫീസുമായി ബന്ധപ്പെട്ട്​ ഇത്​ ചേർക്കാവുന്നതാണെന്നും അധികൃതർ അറിയിച്ചു.