കോവിഡ്​ രണ്ടാം തരംഗം ഇന്ത്യൻ സമ്പദ്​വ്യവസ്ഥക്ക്​ കനത്ത തിരിച്ചടിയെന്ന്​ എസ്​ ആൻഡ് പി

ന്യൂഡൽഹി: കോവിഡ്​ രണ്ടാം തരംഗം ഇന്ത്യൻ സമ്പദ്​വ്യവസ്ഥക്ക്​ കനത്ത തിരിച്ചടിയുണ്ടാക്കുമെന്ന്​ റേറ്റിങ്​ ഏജൻസിയായ എസ്​ ആൻഡ് പി. കോവിഡ്​ രണ്ടാം തരംഗത്തെ തുടർന്ന്​ ഇന്ത്യയുടെ ജി.ഡി.പി വളർച്ചാ നിരക്ക്​ 1.2 ശതമാനം വരെ ഇടിയുമെന്നും അവർ പ്രവചിക്കുന്നു. കോവിഡ്​ രണ്ടാം തരംഗത്തെ തുടർന്ന്​ ലോക്​ഡൗൺ പോലുള്ള നിയന്ത്രണങ്ങൾ രാജ്യത്തി​െൻറ പല ഭാഗങ്ങളിലും ഏർപ്പെടുത്തിയതാണ്​ സമ്പദ്​വ്യവസ്ഥക്ക്​ തിരിച്ചടിയുണ്ടാക്കുന്നത്​.

ജി.ഡി.പി വളർച്ചാ നിരക്കിലെ ഇടിവ്​ 2.8 ശതമാനം വരെയായി ഉയരാമെന്നും ക്രെഡിറ്റ്​ റേറ്റിങ്​ ഏജൻസി വ്യക്​തമാക്കുന്നു. കഴിഞ്ഞ വർഷത്തിൽ നിന്നും വ്യത്യസ്​തമായി രാജ്യവ്യാപക ലോക്​ഡൗൺ പ്രഖ്യാപിക്കാത്തത്​ സമ്പദ്​വ്യവസ്ഥക്ക്​ ഗുണകരമാവുമെന്നും അവർ പറയുന്നു.

കോവിഡ്​ രണ്ടാം തരംഗത്തെ തുടർന്ന്​ ഇന്ത്യയിൽ സാധനങ്ങളുടെ ആവശ്യകതയിൽ വലിയ കുറവുണ്ടായിട്ടുണ്ടെന്നും എസ്​&പി വ്യക്​തമാക്കുന്നു​. നേരത്തെ രണ്ടാം തരംഗത്തെ തുടർന്ന്​ രാജ്യത്ത്​ 70 ലക്ഷത്തോളം പേർക്ക്​ തൊഴിൽ നഷ്​ടപ്പെട്ടുവെന്ന വാർത്തകൾ പുറത്ത്​ വന്നിരുന്നു. എന്നാൽ, അടുത്ത വർഷം ഇന്ത്യൻ സമ്പദ്​വ്യവസ്ഥ 10.2 ശതമാനം നിരക്കിൽ വളരുമെന്നാണ്​ യു.എൻ പ്രവചിക്കുന്നത്​.