സ്വർണത്തെ കരടി വിഴുങ്ങി; വൻ വിലയിടിവ്​ തുടരുന്നു

കോവിഡും തുടർന്നുണ്ടായ സാമ്പത്തിക സാഹചര്യവും മൂലം നിക്ഷേപകർ ഏറ്റവും സുരക്ഷിതമായ നിക്ഷേപമായി തെരഞ്ഞെടുത്തത്​ സ്വർണത്തെയായിരുന്നു. കോവിഡിനെ തുടർന്നുണ്ടായ ലോക്​ഡൗണിൽ ഓഹരി വിപണികൾ കൂപ്പുകുത്തിയപ്പോൾ പിടിച്ച്​ നിന്നത്​ സ്വർണം മാത്രമായിരുന്നു. എന്നാൽ, കഴിഞ്ഞ ഏതാനം മാസങ്ങളായി സ്വർണത്തിന്​ കഷ്​ടകാലമാണ്​. യു.എസ്​ ട്രഷറി വരുമാനം ഉയർന്നതും ഡോളർ സുരക്ഷിത നിക്ഷേപമായി വന്നതുമാണ്​ സ്വർണത്തിന്​ തിരിച്ചടിയുണ്ടാക്കുന്നത്​.

വിപണിയിൽ സ്വർണത്തിന്‍റെ ഇ.ടി.എഫ്​ ഫണ്ടുകളെല്ലാം മുന്നേറ്റമുണ്ടാക്കാൻ സാധിക്കാതെ വിയർക്കുകയാണ്​. ആഗോള സമ്പദ്​വ്യവസ്ഥ വളർച്ചയിലേക്ക്​ നീങ്ങുന്നു​. ഇത്​ മൂലം നിക്ഷേപകർ സ്വർണത്തിൽ നിന്ന്​ മാറി മറ്റ്​ വൈവിധ്യമുള്ള നി​ക്ഷേപ മാർഗങ്ങളിലേക്ക്​ ചുവടുമാറ്റുകയാണ്​​. കഴിഞ്ഞ ആഗസ്റ്റിലാണ്​ സ്വർണവില റെക്കോർഡ്​ ഉയരത്തിലേക്ക്​ എത്തിയത്​. അതിന്​ ശേഷം പിന്നീടുള്ള ഏഴ്​ മാസങ്ങളിൽ അഞ്ചിലും സ്വർണവിലയിൽ ഇടിവാണ്​ രേഖപ്പെടുത്തിയത്​. ഒക്​ടോബറിലും ഡിസംബറിലും മാത്രമാണ്​ സ്വർണവില ഉയർന്നത്​.

വേൾഡ്​ കൗൺസിൽ ഇന്ത്യയുടെ മാനേജിങ്​ ഡയറക്​ടറായ സോമസുന്ദരത്തിന്‍റെ കണക്കനുസരിച്ച്​ ഗോൾഡ്​ ഇ.ടി.എഫ്​ ഫണ്ടുകൾക്ക്​​ രണ്ട്​ ശതമാനം നഷ്​ടമാണ്​ ഫെബ്രുവരിയിൽ മാത്രം ഉണ്ടായത്​. ഗോൾഡ്​ ഇ.ടി.എഫ്​ ഫണ്ടുകളിൽ നിന്ന്​ വൻതോതിൽ പണം പുറത്തേക്ക്​ ഒഴുകുകയാണെന്നും സോമസുന്ദരം പറയുന്നു.

യു.എസിലെ ബോണ്ടുകൾ ഈ വർഷത്തെ ഏറ്റവും ഉയർന്ന നിരക്കിലേക്ക്​ ഫെബ്രുവരിയിൽ എത്തിയിരുന്നു. 1.66 ശതമാനം നേട്ടമാണ്​ ബോണ്ട്​ മാർക്കറ്റിലുണ്ടായത്​​. ഡോളർ ഇൻഡക്​സ്​ നവംബറിന്​ ശേഷം 92 കടന്ന്​ മുന്നേറിയിരുന്നു. ഇതോടെ വലിയ രീതിയിൽ പണം ഡോളറിലേക്കും അമേരിക്കൻ ബോണ്ട്​ മാർക്കറ്റിലേക്കും ഒഴുകുകയാണ്​. വിവിധ രാജ്യങ്ങളിലെ ഓഹരി വിപണികൾ മെച്ചപ്പെട്ടതും സ്വർണത്തിന്​ തിരിച്ചടിയായി.

എന്നാൽ, നിലവിലെ സാഹചര്യത്തിൽ സ്വർണം എപ്പോൾ തിരിച്ചു വരുമെന്നതിനെ സംബന്ധിച്ച്​ കൃത്യമായ പ്രവചനങ്ങൾ നടത്താൻ സാമ്പത്തിക ശാസ്​ത്രജ്ഞർ മുതിരുന്നില്ല. പക്ഷേ, 2021ൽ തന്നെ സ്വർണത്തിന്‍റെ തിരിച്ചു വരവു​ണ്ടാകുമെന്ന്​ ചില സാമ്പത്തിക ശാസ്​ത്രജ്ഞർ പ്രവചിക്കുന്നു.