നിക്ഷേപകർക്ക്​ സന്തോഷ വാർത്ത; നിർണായക മാറ്റവുമായി സെബി

മുംബൈ: ഓഹരി വിപണിയിലെ വ്യാപാരത്തിൽ നിർണായക മാറ്റവുമായി സെബി. ഓഹരി വ്യാപാരത്തിൽ ടി+1 സെറ്റിൽമെന്‍റ്​ സംവിധാനം അവതരിപ്പിക്കാനുള്ള അനുമതി സെബി നൽകി. ഓഹരി ഇടപാടുകൾക്ക്​ ഒരു ദിവസത്തിൽ തന്നെ പൂർത്തിയാക്കുന്നതാണ്​ പുതിയ സംവിധാനം. ട്രാൻസാക്ഷൻ നടന്ന്​ ഒരു ദിവസത്തിൽ ഇടപാട്​ പൂർത്തികരിക്കുന്നതാണ്​ പുതിയ രീതി. നിലവിൽ രണ്ട്​ ദിവസമെടുത്താണ്​ ഇടപാട്​ പൂർത്തിയാക്കുന്നത്​.

ഏതെങ്കിലും സ്​റ്റോക്ക്​ എക്​സ്​ചേഞ്ചിന്​ പുതിയ സംവിധാനത്തിലേക്ക്​ മാറണമെങ്കിൽ ഒരു മാസം മുമ്പ്​ ബന്ധപ്പെട്ടവർക്ക്​ നോട്ടീസ്​ നൽകി പുതിയ രീതിയിലേക്ക്​ മാറാമെന്ന്​ സെബി അറിയിച്ചിട്ടുണ്ട്​. സെറ്റിൽമെന്‍റ്​ സമയം കുറക്കുന്നതിലൂടെ ബ്രോക്കർമാർ നടത്തുന്ന തട്ടിപ്പുകൾക്ക്​ ഒരു പരിധി വരെ പരിഹാരം കാണാൻ കഴിയുമെന്നാണ്​ സെബിയുടെ പ്രതീക്ഷ. എന്നാൽ, വിദേശ നിക്ഷേപകർക്ക്​ ഇത്​ ബുദ്ധിമുട്ട്​ സൃഷ്​ടിക്കുമെന്ന്​ ആശങ്കയുണ്ട്​.

ഓഹരി വിപണിയിലെ സെറ്റിൽമെന്‍റ്​ സമയം കുറക്കണമെന്ന്​ ആവശ്യപ്പെട്ട്​ സെബിക്ക്​ നിരവധി അപേക്ഷകൾ ലഭിച്ചിരുന്നു. തുടർന്നാണ്​ പുതിയ സംവിധാനത്തിലേക്ക്​ മാറാൻ സെബി തീരുമാനിച്ചത്​. 2022 ജനുവരി ഒന്ന്​ മുതലായിരിക്കും സെബിയുടെ ഉത്തരവ്​ നിലവിൽ വരിക.