ബാങ്കിങ്​ മേഖലയിലും പരിഷ്​കാരം ലക്ഷ്യമിട്ട്​ കേ​ന്ദ്രം; പുതിയ നയം പ്രഖ്യാപിച്ചു

ന്യൂഡൽഹി: ബാങ്കിങ്​ മേഖലയിൽ സമഗ്രപരിഷ്​കാരങ്ങൾ ലക്ഷ്യമിടുന്ന EASE 4.0 നയം പ്രഖ്യാപിച്ച്​ ധനമന്ത്രി നിർമ്മല സീതാരാമൻ. പൊതുമേഖല ബാങ്കുകളുടെ ശുദ്ധീകരണവും സ്​മാർട്ട്​ ബാങ്കിങ്ങും ലക്ഷ്യമിട്ടാണ്​ കേന്ദ്രസർക്കാറിന്‍റെ പരിഷ്​കാരം. ഇതിനായി പൊതുമേഖല ബാങ്കുകളുടെ തലവൻമാരുമായി ധനമന്ത്രി നിർമ്മല സീതാരാമൻ കൂടിക്കാഴ്ച നടത്തി.

പൊതുമേഖല ബാങ്കുകളുടെ പ്രവർത്തനം ധനമന്ത്രിയുടെ നേതൃത്വത്തിൽ വിലയിരുത്തി. കോവിഡ്​ 19നെ ​തുടർന്ന്​ പ്രതിസന്ധിയിലായ സമ്പദ്​വ്യവസ്ഥയെ കരകയറ്റുന്നതിന്​ ബാങ്കുകൾ നിർണായക പങ്കുവഹിച്ചുവെന്നും നിർമ്മല പറഞ്ഞു. ബാങ്ക്​ ജീവനക്കാരുടെ പെൻഷനിൽ ഇനി മുതൽ മാറ്റമുണ്ടാകുമെന്ന്​ ധനകാര്യ സെക്രട്ടറി ദേബാശിഷ്​ പാണ്ഡയും വ്യക്​തമാക്കി.

ബാങ്ക്​ ജീവനക്കാർക്ക്​ ശമ്പളത്തിന്‍റെ 30 ശതമാനമെങ്കിലും പെൻഷനായി ലഭിക്കും. പെൻഷൻ ഫണ്ടിൽ ജീവനക്കാരുടെ വിഹിതം വർധിപ്പിക്കാനും ബാങ്കുകളോട്​ നിർദേശിച്ചു. 30,000 മുതൽ 35,000 രൂപ വരെ ഇനി മുതൽ ബാങ്ക്​​ ജീവനക്കാർക്ക്​ പെൻഷനായി ലഭിക്കുമെന്നാണ്​ സൂചന.

വടക്ക്​-കിഴക്കൻ സംസ്ഥാനങ്ങൾ, ബംഗാൾ, ഒഡീഷ തുടങ്ങിയ സംസ്ഥാനങ്ങൾക്കായി പ്രത്യേക പദ്ധതി ആവിഷ്​കരിക്കാൻ ബാങ്കുകൾക്ക്​ ധനമന്ത്രി നിർദേശം നൽകി. കഴിഞ്ഞ വർഷവുമായി താരതമ്യം ചെയ്യു​േമ്പാൾ കിട്ടാകടത്തിൽ 62,000 കോടിയുടെ കുറവുണ്ടായിട്ടുണ്ട്​. പണപ്പെരുപ്പം 4.6 ശതമാനത്തിൽ നിൽക്കുമെന്നാണ്​ പ്രതീക്ഷയെന്നും ധനമന്ത്രി പറഞ്ഞു.