പ്രത്യക്ഷ നികുതിയിൽ 24 ശതമാനം വർധന; റീഫണ്ടും കൂടി

ന്യൂഡൽഹി: വ്യക്തിഗത ആദായ, കോർപറേറ്റ് ആദായ നികുതികളുൾ​പ്പെടുന്ന പ്രത്യക്ഷ നികുതി പിരിവിൽ ഈ സാമ്പത്തികവർഷം വൻ വർധന. 24 ശതമാനം വർധനയോടെ 15.67 ലക്ഷം കോടി രൂപയാണ് ഈ മാസം 10 വരെയുള്ള മൊത്തം പ്രത്യക്ഷ നികുതി പിരിവ്. റീഫണ്ടുകൾക്കുശേഷം 12.98 ലക്ഷം കോടി രൂപയാണ് സർക്കാറിനു ലഭിക്കുന്നത്.

2022-23 സാമ്പത്തികവർഷത്തിലെ പ്രത്യക്ഷ നികുതി പിരിവിലെ പുതുക്കിയ എസ്റ്റിമേറ്റിന്റെ 79 ശതമാനമാണ് ഈ തുക. റീഫണ്ടിനുശേഷമുള്ള തുകയിൽ 18.40 ശതമാനത്തിന്റെയും വർധനയുണ്ടായതായി കേന്ദ്ര പ്രത്യക്ഷ നികുതി ബോർഡ് (സി.ബി.ഡി.ടി) പ്രസ്താവനയിൽ അറിയിച്ചു. 2.69 ലക്ഷം കോടിയാണ് റീഫണ്ട് ചെയ്തത്. മുൻവർഷത്തേക്കൾ 61.58 ശതമാനമാണ് റീഫണ്ട് തുക കൂടിയത്.

ഈ സാമ്പത്തികവർഷത്തിൽ പ്രത്യക്ഷ നികുതിയിൽ 17 ശതമാനമായിരുന്നു പ്രതീക്ഷിച്ചിരുന്നത്. കഴിഞ്ഞ ഏപ്രിൽ മുതൽ ഈ മാസം 10 വരെ കോർപറേറ്റ് ആദായ നികുതി വരുമാനം 19.33ഉം വ്യക്തിഗത ആദായ നികുതി വരുമാനം 29.63ഉം ശതമാനം വർധിച്ചു.