വയസ്സ്​ മൂന്നര, ഓർമ്മശക്​തിയിൽ മിടുക്ക്​ കാട്ടി ഫാത്തിമ സഹ്​റ

ഫാത്തിമ സഹ്​റക്ക്​ മൂന്നര വയസ്സേയുള്ളൂ. ​പക്ഷേ, സംസാരിച്ചുതുടങ്ങിയാൽ ഓർമ്മശക്​തി കൊണ്ട്​ നമ്മളെ അത്​ഭുതപ്പെടുത്തും ഈ മിടുക്കി. മൂന്ന്​ മിനിറ്റ് 32 സെക്കൻഡ്​ കൊണ്ട്​ 193 രാജ്യങ്ങളുടെ പതാക തിരിച്ചറിഞ്ഞ്​ പറയാനറിയാം ഫാത്തിമ സഹ്​റക്ക്​. ഇന്ത്യയുടെ 28 സംസ്ഥാനങ്ങളും അവയുടെ തലസ്ഥാനവും പറയാൻ വെറും 56 സെക്കൻഡ്​ മതി. 80 പൊതുവിജ്​ഞാന ചോദ്യങ്ങൾക്ക്​ ഏഴ്​ മിനിറ്റ്​ എട്ട്​ സെക്കൻഡിനുള്ളിൽ ഉത്തരം പറയും.

ഗ്രഹങ്ങളുടെ പേര്​, 14 ഇന്ത്യൻ പ്രധാനമന്ത്രിമാരുടെ പേര്​, 16 ഇംഗ്ലീഷ്​ നഴ്​സറി റൈമുകൾ, 15 ഖുർആൻ അധ്യായങ്ങൾ എന്നിവയെല്ലാം മനഃപാഠമാണ്​. മൃഗങ്ങൾ, പക്ഷികൾ, പ്രാണികൾ, പഴങ്ങൾ, പച്ചക്കറികൾ, മനുഷ്യ ശരീരഭാഗങ്ങൾ, നിറങ്ങൾ എന്നിവയുടെയെല്ലാം ഇംഗ്ലീഷ്​ പേരുകളും ഞൊടിയിട കൊണ്ട്​ പറയും. അസാധാരണമായ ഗ്രാഹ്യശേഷിയുടെ പേരിൽ കലാംസ്​ വേൾഡ്​ റെക്കോർഡ്​സിൽ ഇടംപിടിച്ചിരിക്കുകയാണ്​ ഫാത്തിമ സഹ്​റ.

പെരുമ്പടപ്പ്​ കോടത്തൂർ സ്വദേശി ഒ.വി. ഫാരിസിന്‍റെയും സറീനയുടെയും മകളാണ്. മാതാവ് സറീന ഖുർആൻ പരായണം ചെയ്യുന്നത് നിമിഷങ്ങൾക്കുള്ളിൽ മനഃപാഠമാക്കി തിരിച്ചു ചൊല്ലി തുടങ്ങിയത് ശ്രദ്ധയിൽ പെട്ടപ്പോഴാണ് വീട്ടുകാർ ഫാത്തിമ സഹ്​റയുടെ കഴിവുകൾ തിരിച്ചറിയുന്നതും പരിശീലനം നൽകി തുടങ്ങിയതും. പതാകക്കൊപ്പം അതത്​ രാജ്യങ്ങളുടെ തലസ്​ഥാനങ്ങളുടെ പേരും പറയുന്നതിനുള്ള പരിശീലനത്തിലാണിപ്പോൾ. 50ലധികം രാജ്യങ്ങളുടെ തലസ്​ഥാനങ്ങളുടെ പേര്​ ഇതിനകം പഠിച്ചുകഴിഞ്ഞു. ഓർമ്മശക്​തിയുടെ മികവിന്​ അംഗീകാരം നേടിയ ഫാത്തിമ സഹ്​റയെ അഭിനന്ദിച്ച്​ നിരവധി സംഘടനകളാണ്​ രംഗത്തെത്തിയിരിക്കുന്നത്​.