സ്കൂളുകളിൽ അധിക തസ്തിക സൃഷ്ടിക്കൽ: ഈ മാസം സർക്കാർ പരിഗണനക്ക്​ സമർപ്പിക്കുമെന്ന് മന്ത്രി ശിവൻകുട്ടി

തിരുവനന്തപുരം: സംസ്ഥാനത്തെ സ്കൂളുകളിൽ തസ്തിക നിർണയത്തിന്‍റെ അടിസ്ഥാനത്തിൽ അധിക തസ്തിക സൃഷ്ടിക്കാ​നുള്ള ശിപാർശ ഈ മാസം അവസാനത്തോടെ സർക്കാറിന്‍റെ പരിഗണനക്ക്​ നൽകാനാകുമെന്ന്​ പൊതുവിദ്യാഭ്യാസ മന്ത്രി വി. ശിവൻകുട്ടി. ഉന്നതതല പരിശോധനക്ക്​ ശേഷമുള്ള ശിപാർശകൾ ജനുവരി 31നകം പൊതുവിദ്യാഭ്യാസ ഡയറക്ടർ പൊതുവിദ്യാഭ്യാസ വകുപ്പിന്​ സമർപ്പിച്ചിട്ടുണ്ട്​. ധനവകുപ്പിന്‍റെ ഉൾപ്പെടെ അംഗീകാരം ആവശ്യമുണ്ട്​.

കുട്ടികൾ വർധിച്ചിട്ടുണ്ടെങ്കിൽ നിയമപ്രകാരമുള്ള അധിക തസ്തികകൾ അനുവദിക്കേണ്ടിവരും. ആർക്കും അതു​ മറച്ചുവെക്കാനാകില്ല. ആവശ്യമായ നടപടിക്രമങ്ങൾ പൂർത്തിയാക്കേണ്ടതുണ്ട്​. ചില സ്കൂളുകളിൽ പലതവണ പരിശോധന നടത്തേണ്ടിവന്നതിനാൽ നടപടികൾ വൈകി​. 6000 അധിക തസ്തികകൾ വേണ്ടിവരുമെന്നത്​ അന്തിമ കണക്കല്ല. നടപടികൾ പൂർത്തിയാകുമ്പോൾ മാത്രമേ എത്ര തസ്തിക വേണമെന്ന്​ പറയാനാകൂവെന്നും മന്ത്രി പറഞ്ഞു.

സ്കൂളുകളിൽ നിയമ​പ്രകാരമുള്ള അധ്യാപകരെ നിയമിക്കാൻ​ പണത്തിന്‍റെ പ്രശ്നം നോക്കേണ്ടതില്ല. ആവശ്യമുള്ള തസ്തികയിലേക്ക്​ നടത്തിയ താൽക്കാലിക നിയമനങ്ങൾക്ക്​ സർക്കാർതന്നെയാണ്​ ശമ്പളം നൽകുന്നത്​. ഖാദർ കമ്മിറ്റി രണ്ടാം ഭാഗത്തിലെ നിർദേശങ്ങൾ അടുത്ത അധ്യയന വർഷം മുതൽ നടപ്പാക്കുന്നത്​ പരിഗണനയിലാണ്​. ഇതിനായി പ്രാഥമിക കൂടിയാലോചന നടത്തി​. സ്കൂൾ ഉച്ചഭക്ഷണ പദ്ധതി നടപ്പാക്കുന്നതിൽ സാമ്പത്തിക പ്രയാസം ഉണ്ടായിട്ടുണ്ട്​. ഇത്തവണ ബജറ്റിൽ ഇതിനായി കൂടുതൽ തുക അനുവദിച്ചിട്ടുണ്ടെന്നും മന്ത്രി പറഞ്ഞു.