പരീക്ഷ ഏപ്രിലിൽ; ഉപരി പഠന അവസരം നഷ്​ടമാകുമെന്ന ആശങ്കയിൽ ബി.ഫാം വിദ്യാർഥികൾ

തൃശൂർ: കോവിഡ്​ നിയന്ത്രണങ്ങളെത്തുടർന്ന്​ കോഴ്​സ്​ നീണ്ടുപോയതുമൂലം ഉപരിപഠന-സ്​കോളർഷിപ്പ്​ പഠനം നഷ്​ടമായേക്കുമെന്ന ആശങ്കയിൽ കേരള ആരോഗ്യസർവകലാശാലക്ക്​ കീഴിലെ ബി.ഫാം വിദ്യാർഥികൾ. ജൂ​ൈലയിൽ തീരേണ്ട കോഴ്​സിലെ ഏഴ്​, എട്ട്​ സെമസ്​റ്റർ പരീക്ഷ ഇനിയും തീർന്നിട്ടില്ല. അതേസമയം, പ്രമുഖ അക്കാദമിക സ്​ഥാപനമായ ഹൈദരാബാദിലെ നാഷനൽ ഇൻസ്​റ്റിറ്റ്യൂട്ട്​ ഓഫ്​ ഫാർമസ്യൂട്ടിക്കൽ എഡുക്കേഷൻ ആൻഡ്​​ റിസർച്ചിൽ ​(നൈപ്പർ) എം.ഫാം പ്രവേശനത്തിന്​ പരീക്ഷ എഴുതി അർഹത നേടിയവർക്ക്​ ക്ലാസ്​ തുടങ്ങിക്കഴിഞ്ഞു. മാത്രമല്ല ബി.ഫാം പാസായ സർട്ടിഫിക്കറ്റ്​ ആറുമാസത്തിനുള്ളിൽ സമർപ്പിക്കണമെന്നാണ്​ നിർദേശം.

ആഴ്​ചകൾക്ക്​ മുമ്പ്​ ആരോഗ്യസർവകലാശാല പുറത്തിറക്കിയ പരീക്ഷ ടൈംടേബ്​ളിൽ 2022 ഏപ്രിലിലാണ്​ ബി.ഫാം പരീക്ഷ. ഈ സാഹചര്യത്തിൽ ലഭിച്ച പി.ജി പ്രവേശനം വെറുതെയാകുമോ എന്ന ആശങ്കയിലാണ്​ വിദ്യാർഥികൾ. സംസ്​ഥാനത്തെ നാല്​ മെഡിക്കൽ കോളജുകൾക്ക്​ പുറമെ ധാരാളം സ്വകാര്യ മെഡിക്കൽ കോളജുകളിലും ബി.ഫാം കോഴ്​സുകൾ കേരള ആരോഗ്യ സർവകലാശാലക്ക്​ കീഴിൽ നടന്നുവരുന്നുണ്ട്​. കോവിഡിനെ തുടർന്ന്​ ഒന്നരവർഷ​ം കോഴ്​സ്​ നീണ്ടുപേയതാണ്​ വിദ്യാർഥികൾക്ക്​ വിനയായത്​. മൂന്നാം വർഷം അവസാനമാകു​േമ്പാഴാണ് ഉപരിപഠന പരീക്ഷയായ​ നൈപ്പർ പരീക്ഷ എഴുതാൻ വിദ്യാർഥികൾക്ക്​ അവസരമുള്ളത്​. ഇതനുസരിച്ചുള്ള അലോട്ട്​മെൻറ്​ ജൂൺ-ജൂലൈ മാസങ്ങളിൽ കഴിഞ്ഞു.

മാത്രമല്ല യോഗ്യത നേടിയ വിദ്യാർഥികൾ ഇതിനകം ആദ്യ സെമസ്​റ്റർ ഫീ ആയ 87,000 രൂപ കെട്ടിവെക്കുകയും ചെയ്​തു. നൈപ്പറിലാക​ട്ടെ ആദ്യഘട്ട അലോട്ട്​​മെൻറ്​ കഴിഞ്ഞ്​ ക്ലാസുകളും ആരംഭിച്ചു. സംസ്​ഥാനത്തൊഴികെ മറ്റ് യൂനിവേഴ്​സിറ്റികളിൽ കോഴ്​സ്​ ഇത്രയും നീണ്ടുപോകാത്തതിനാൽ വിദ്യാർഥികളെ ബാധിച്ചിട്ടില്ല. അനുവദിച്ച ആറുമാസത്തിനകം സർട്ടിഫിക്കറ്റ്​ നൈപ്പറിൽ ഹാജരാക്കിയില്ലെങ്കിൽ അടച്ച തുക ഉൾപ്പെടെ നഷ്​ടമാകും. ഏപ്രിലിൽ കോഴ്​സ്​ കഴിഞ്ഞാലും മെയ്​ അവസാനത്തോടെ മാത്രമേ കേരള ആരോഗ്യസർവകലാശാലയിൽനിന്ന്​ കോഴ്​സ്​ സർട്ടിഫിക്കറ്റ് ലഭിക്കൂ. ഈ സാഹചര്യത്തിൽ നൈപ്പറിൽ മാത്രമല്ല, മറ്റ്​ രാജ്യങ്ങളിൽ ഉപരിപഠനത്തിന്​ കാത്തിരിക്കുന്നവർക്കും അവസരം നഷ്​ടമാകും. അതേസമയം, കോഴ്​സ്​ എത്രയും വേഗം പൂർത്തിയാക്കി ഫെബ്രുവരിക്ക്​ മ​ു​​േമ്പ പരീക്ഷ നടത്താൻ നടപടി ആവശ്യപ്പെട്ട്​ വിവിധ വിദ്യാർഥി സംഘടനകൾ കേരള ആരോഗ്യസർവകലാശാല പരീക്ഷ കൺട്രോളർക്ക്​ നിവേദനം നൽകിയിട്ടുണ്ട്​.