സി.ബി.എസ്​.ഇ പത്താം ക്ലാസ്​ പരീക്ഷയിൽ ഇത്തവണ ഒരു വിദ്യാർഥിയും തോൽക്കില്ല; കാരണമിതാണ്​

ന്യൂഡൽഹി: കോവിഡ്​ മഹാമാരി സർവ മേഖലകളിലും താളപ്പിഴകളുണ്ടാക്കിയിട്ടുണ്ടെങ്കിലും വല്ലാതെ പിടിച്ചുലച്ചത്​ വിദ്യാഭ്യാസ ​മേഖലയെയാണ്​. ഇത്​ രക്ഷിതാക്കളേയും വിദ്യാർഥികളേയും ഒരുപോലെ ആശങ്കയിലാഴ്​ത്തുന്നുണ്ട്​. ഈ ആശങ്കകൾക്കിടയിൽ സി.ബി.എസ്​.ഇ പത്താം ക്ലാസ്​ പരീക്ഷയെഴുതുന്ന വിദ്യാർഥികൾ ആശ്വാസമാവുകയാണ്​ സി.ബി.എസ്​.ഇയുടെ പുതിയ തീരുമാനം.

ഇത്തവണ പത്താം തരം പരീക്ഷയിൽ ഐച്ഛിക വിഷയങ്ങളായ ശാസ്ത്രം, ഗണിതശാസ്​ത്രം, സാമൂഹ്യശാസ്​ത്രം എന്നിവയിൽ ഏതിലെങ്കിലും പരാജയപ്പെടുകയാണെങ്കിൽ അത് ആറാമത്തെ അധിക വിഷയമായ​ നൈപുണ്യ വിഷയമായി മാറ്റപ്പെടുമെന്നതാണ്​ പുതിയ നിയമം. തുടർന്ന്​ ഏറ്റവും മികച്ച പ്രകടനം കാഴ്​ച വെച്ച അഞ്ച്​ വിഷയങ്ങൾ അടിസ്ഥാനമാക്കിയാവും സ്​കോർ കാർഡ്​ തയാറാക്കുക. ഇത്​ വിദ്യാർഥികൾക്ക്​ വിജയം സുനിശ്ചിതമാക്കാൻ സഹായകമാവും.

കുട്ടികളുടെ മെറിറ്റ്​ അടിസ്ഥാനമായ ​പ്രകടനം മാത്രമല്ല, മറിച്ച്​ വിദ്യാർഥികൾ ആർജ്ജിച്ചെടുത്ത വൈജ്ഞാനിക സാമൂഹ്യ, വൈകാരിക, പ്രവർത്തനാഷ്​ഠിത പ്രകടനങ്ങളും സ്കോർ കാർഡിൽ പ്രതിഫലിക്കുമെന്ന്​ കേന്ദ്ര വിദ്യാഭ്യാസ മന്ത്രി രമേശ്​ പൊക്രിയാൽ പറഞ്ഞു.

മെയ്​ നാല്​ മുതൽ ജൂൺ പത്ത്​ വരെയാണ്​ സി.ബി.എസ്​.ഇ പത്താം തരം, പ്ലസ്​ ടു പരീക്ഷകൾ നടക്കുന്നത്​. പ്രാക്​ടിക്കൽ പരീക്ഷകൾ മാർച്ച്​ ഒന്ന്​ മുതലും നടക്കും. പരീക്ഷാഫലം ജൂൺ 15ന്​ പ്രഖ്യാപിക്കും.