നിയമ സർവകലാശാലകളിലേക്കുള്ള പ്രവേശന പരീക്ഷാ തീയതികൾ പ്രഖ്യാപിച്ചു

ന്യൂഡൽഹി: രാജ്യത്തെ നിയമ സർവകലാശാല​കളിലേക്കുള്ള പ്രവേശന പരീക്ഷയായ കോമൺ ലോ അഡ്​മിഷൻ ടെസ്റ്റ്​ (ക്ലാറ്റ്​) 2022, 2023 വർഷങ്ങളിലേക്കുള്ള പരീക്ഷ തീയതി പ്രഖ്യാപിച്ചു. ബിരുദ, ബിരുദാനന്തര കോഴ്​സുകളിലേക്കാണ്​ പ്രവേശനം. 2022ൽ രണ്ട്​ ക്ലാറ്റ്​ പരീക്ഷകൾ നടക്കും.

ക്ലാറ്റ്​ 2022ലെ പരീക്ഷ 2022 മേയ്​ എട്ടിനും ക്ലാറ്റ്​ 2023ലെ പ്രവേശന പരീക്ഷ 2022 ഡിസംബർ 18നും നടക്കും.

ദേശീയ നിയമസർവകലാശാലകളിലെ കൺസോർഷ്യമാണ്​ ദേശീയ തലത്തിൽ യു.ജി, പി.ജി പ്രവേശനത്തിനുള്ള ക്ലാറ്റ്​ പരീക്ഷകൾ സംഘടിപ്പിക്കുക. രാജ്യത്തെ 22 നിയമ സർവകലാശാലകളിലേക്കാണ്​ പ്രവേശനം.

ജനറൽ കാറ്റഗറിയിലെ വിദ്യാർഥികൾക്ക്​ 30,000 രൂപയാണ്​ കൗൺസലിങ്​ ഫീസ്​. നേരത്തേ ഇത്​ 50,000 രൂപയായിരുന്നു. എസ്​.സി, എസ്​.ടി ഉൾപ്പെടെയുള്ള വിഭാഗങ്ങൾക്ക്​ 20,000 രൂപയുമാണ്​ ഫീസ്​. ഔദ്യോഗിക വെബ്​സൈറ്റിലൂടെ ഉടൻ രജിസ്​ട്രേഷൻ ആരംഭിക്കുമെന്നാണ്​ വിവരം. ഔദ്യോഗിക വെബ്​സൈറ്റ്​: consortiumofnlus.ac.in