കേന്ദ്രസർവകലാശാലകളി​െല ബിരുദ പ്രവേശനത്തിന്​ ഒറ്റ പ്രവേശന പരീക്ഷ; ഏഴംഗ സമിതി രൂപീകരിച്ചു

ന്യൂഡൽഹി: കേന്ദ്രസർവകലാശാലകളിലെ ബിരുദ പ്രവേശനത്തിന്​ 2021 -22 അധ്യയന വർഷം മുതൽ ഒറ്റ പ്രവേശന പരീക്ഷ നടത്താനൊരുങ്ങി കേന്ദ്രസർക്കാർ. ബിരുദപ്രവേശനത്തിന്​ പ്ലസ്​ടു കട്ട്​ ഓഫ്​ മാർക്ക്​ സംബന്ധിച്ച സങ്കീർണതകൾ അവസാനിപ്പിക്കലാണ്​ ലക്ഷ്യം. ബിരുദ പ്രവേശനത്തിന്​ നടത്തേണ്ട ഒറ്റ പ്രവേശന പരീക്ഷ മാനദണ്ഡങ്ങളും നടപടിക്രമങ്ങളും നിശ്ചയിക്കുന്നതിനായി ഏഴംഗ വിദഗ്​ധ സമിതി രൂപീകരിച്ചു.

കമ്പ്യൂട്ടർ അധിഷ്​ഠിത ഒറ്റ പ്രവേശന പരീക്ഷ നാഷനൽ ടെസ്റ്റിങ്​ ഏജൻസിയാകും നടത്തുക. എല്ലാ കേന്ദ്ര സർവകലാശാലകള​ിലേക്കുമുള്ള ബിരുദ പ്രവേശനത്തിന്​ ഒറ്റ പ്രവേശന പരീക്ഷഫലം നിർബന്ധമാകും. 2021-22 അധ്യയന വർഷം മുതൽ എല്ലാ കേന്ദ്ര സർവകലാശാലകളിലെയും ബിരുദ പ്രവേശനത്തിന്​ ഇത്​ മാനദണ്ഡമാക്കുമെന്ന്​ കേന്ദ്ര ഉന്നത വിദ്യാഭ്യാസ സെക്രട്ടറി അമിത്​ ഖാരെ അറിയിച്ചു. ഒറ്റ പ്രവേശന പരീക്ഷയിൽ ഒരു ജനറൽ പരീക്ഷയും കൂടാതെ വിഷയ അടിസ്​ഥാനത്തിൽ പ്രത്യേക പരീക്ഷകളുമുണ്ടാകും. ഏഴംഗ കമീഷൻ ഒരു മാസത്തിനുള്ളിൽ റിപ്പോർട്ട്​ സമർപ്പിക്കുമെന്ന്​ യു.ജി.സി ചെയർപേഴ്​സൻ പ്രഫസർ ഡി.പി. സിങ്​ അറിയിച്ചു.

ഒറ്റ പ്രവേശന പരീക്ഷ വഴി വിദ്യാർഥികളുടെ അഭിരുചിക്കനുസരിച്ച കോഴ്​സുകൾ തിരഞ്ഞെടുക്കാൻ അവസരം ലഭിക്കുമെന്നും ഒന്നിലധികം പ്രവേശന പരീക്ഷ എഴുതുന്നതിന്‍റെ ബുദ്ധിമുട്ടുകൾ ഒഴിവാക്കാൻ കഴിയുമെന്നും ​അദ്ദേഹം കൂട്ടിച്ചേർത്തു. ഒറ്റ പ്രവേശന പരീക്ഷ എഴുതാനുള്ള അടിസ്​ഥാന യോഗ്യത സംബന്ധിച്ചും കമ്മിറ്റി ചർച്ചചെയ്യും.