എൻ.ടി.പി.സിയിൽ എൻജിനീയറിങ് എക്സി. ട്രെയിനി: 864 ഒഴിവുകൾ

ന്യൂഡൽഹിയിലെ നാഷനൽ തെർമൽ പവർ കോർപറേഷൻ (എൻ.ടി.പി.സി) അക്കാദമിക് മികവുള്ള യുവ എൻജിനീയറിങ് ബിരുദക്കാരെ എക്സിക്യൂട്ടിവ് ട്രെയിനികളായി തെരഞ്ഞെടുക്കുന്നു. 'ഗേറ്റ്-2022' സ്കോർ അടിസ്ഥാനത്തിലാണ് സെലക്ഷൻ.

ഇലക്ട്രിക്കൽ, മെക്കാനിക്കൽ, ഇലക്ട്രോണിക്സ്, ഇൻസ്ട്രുമെന്റേഷൻ, സിവിൽ, മൈനിങ്, എൻജിനീയറിങ് ഡിസിപ്ലിനുകളിൽ 65 ശതമാനം മാർക്കിൽ കുറയാതെ ഫുൾടൈം ബാച് ലേഴ്സ് ബിരുദം/തത്തുല്യ യോഗ്യത നേടിയവർക്കാണ് അവസരം. എസ്.സി/എസ്.ടി/പി.ഡബ്ല്യു.ബി.ഡി വിഭാഗങ്ങളിൽപെടുന്നവർക്ക് 55 ശതമാനം മാർക്ക് മതി.

പ്രായപരിധി ജനറൽ/ഇ.ഡബ്ല്യു.എസ് വിഭാഗങ്ങൾക്ക് 27 വയസ്സ്. 2022 നവംബർ 11 വെച്ചാണ് പ്രായപരിധി നിശ്ചയിക്കുക. എസ്.സി/എസ്.ടി/ഒ.ബി.സി/പി.ഡബ്ല്യു.ബി.ഡി/വിമുക്ത ഭടൻ വിഭാഗങ്ങളിൽപെടുന്നവർക്ക് ചട്ടപ്രകാരം പ്രായപരിധിയിൽ ഇളവുണ്ട്.

എൻജിനീയറിങ് എക്സിക്യൂട്ടിവ് ട്രെയിനീസ്-2022 റിക്രൂട്ട്മെന്റ് വിജ്ഞാപനം https://careers.ntpc.co.in, www.ntpc.co.in വെബ്സൈറ്റുകളിൽ ലഭ്യമാണ്. അപേക്ഷ ഓൺലൈനായി ഒക്ടോബർ 28 മുതൽ നവംബർ 11 വരെ സമർപ്പിക്കാം.

തെരഞ്ഞെടുക്കപ്പെടുന്നവർക്ക് വിവിധ സ്ഥലങ്ങളിലായി ഒരുവർഷത്തെ പരിശീലനം നൽകും. പരിശീലനം പൂർത്തിയാക്കുന്നവരെ രാജ്യത്തൊട്ടാകെയുള്ള എൻ.ടി.പി.സി പ്രോജക്ടുകൾ/സ്റ്റേഷനുകളിൽ 40,000-1,40,000 രൂപ ശമ്പളനിരക്കിൽ ഇ-1 ഗ്രേഡിൽ എൻജിനീയറായി നിയമിക്കുന്നതാണ്. ആകെ 864 ഒഴിവുണ്ട്. സെലക്ഷൻ നടപടികൾ, സംവരണം ഉൾപ്പെടെ കൂടുതൽ വിവരങ്ങൾക്കും അപ്ഡേറ്റുകൾക്കും വെബ്സൈറ്റ് സന്ദർശിക്കുക.