ജെ.ഇ.ഇ അഡ്വാൻസ്ഡ് ഒക്ടോബർ മൂന്നിന്, രജിസ്ട്രേഷൻ ഇന്നുമുതൽ 16 വരെ
text_fields
ഐ.ഐ.ടികളിൽ എൻജിനീയറിങ്, ആർക്കിടെക്ചർ, സയൻസ് അണ്ടർ ഗ്രാജ്വേറ്റ് പ്രോഗ്രാമുകളിലേക്കുള്ള ജോയൻറ് എൻട്രൻസ് എക്സാമിനേഷൻ (ജെ.ഇ.ഇ) അഡ്വാൻസ്ഡ് ഒക്ടോബർ മൂന്നിന് ദേശീയതലത്തിൽ നടത്തും. 'ജെ.ഇ.ഇ മെയിൻ 2021'ൽ ഉയർന്ന സ്കോർ നേടിയ രണ്ടര ലക്ഷം പേർക്ക് 'ജെ.ഇ.ഇ അഡ്വാൻസ്ഡ് 2021'ൽ പങ്കെടുക്കാം. വിജ്ഞാപനവും വിശദവിവരങ്ങളടങ്ങിയ ഇൻഫർമേഷൻ ബ്രോഷറും https://jeeadv.ac.inൽ ലഭ്യമാണ്.
രജിസ്ട്രേഷൻ ഫീസ് 2800 രൂപ. എസ്.സി/എസ്.ടി/പി.ഡബ്ല്യു.ഡി/ വനിതകൾ എന്നീ വിഭാഗങ്ങളിൽപെടുന്നവർക്ക് 1400 രൂപ മതി. ഓൺലൈൻ രജിസ്ട്രേഷൻ/അപേക്ഷ സെപ്റ്റംബർ 11 രാവിലെ 10 മുതൽ 16ന് വൈകീട്ട് അഞ്ചുവരെ സമർപ്പിക്കാം. ഇതിനുള്ള മാർഗനിർദേശങ്ങൾ ഇൻഫർമേഷൻ ബ്രോഷറിലുണ്ട്. ഫീസ് സെപ്റ്റംബർ 17 വൈകീട്ട് അഞ്ചുവരെ ഓൺലൈനായി അടക്കാം.
കമ്പ്യൂട്ടർ അധിഷ്ഠിത പരീക്ഷയിൽ രണ്ടു പേപ്പറുകളുണ്ട്. ഒക്ടോബർ മൂന്നിന് രാവിലെ ഒമ്പതു മുതൽ 12 വരെ പേപ്പർ ഒന്നും ഉച്ചക്കുശേഷം 2.30 മുതൽ 5.30 വരെ പേപ്പർ രണ്ടും നടത്തും. പരീക്ഷ ഘടനയും സിലബസും വെബ്സൈറ്റിലുണ്ട്.
ജെ.ഇ.ഇ അഡ്വാൻസ്ഡ് റാങ്ക് അടിസ്ഥനത്തിൽ വിവിധ ഐ.ഐ.ടികളിലായി നാലുവർഷത്തെ ബി.ടെക്, ബി.എസ്, അഞ്ചു വർഷത്തെ ഡ്യൂവൽ ഡിഗ്രി ബി.ടെക്-എം.ടെക്, ഡ്യുവൽ ഡിഗ്രി ബി.എസ്-എം.എസ്, ഇൻറഗ്രേറ്റഡ് എം.ടെക്/എം.എസ്സി പ്രോഗ്രാമുകളിൽ പ്രവേശനത്തിന് അർഹതയുണ്ട്.ഐ.ഐ.ടികൾ പാലക്കാട്, ചെന്നൈ, ഹൈദരാബാദ്, ഗോവ, തിരുപ്പതി, ധർവാർഡ്, മുംബൈ, ന്യൂഡൽഹി, ഖരഗ്പുർ, ഭുവനേശ്വർ, ഭിലായ്, കാൻപൂർ, വാരാണസി, ഇന്ദോർ, ജമ്മു, ജോധ്പൂർ, ഗുവാഹതി, പട്ന, റൂർക്കി, മാണ്ഡി, റോപാർ, ഗാന്ധിനഗർ എന്നിവിടങ്ങളിലാണുള്ളത്.
വാരാണസി, ഖരഗ്പുർ, റൂർക്കി ഐ.ഐ.ടികൾ നടത്തുന്ന ബി.ആർക് പ്രവേശനത്തിന് ഒക്ടോബർ 18ന് രാവിലെ ഒമ്പതു മുതൽ ഉച്ചക്ക് 12 വരെ സംഘടിപ്പിക്കുന്ന ആർക്കിടെക്ചർ അഭിരുചി പരീക്ഷയിൽ (AAT) യോഗ്യത നേടണം.
ഈ ടെസ്റ്റിൽ പങ്കെടുക്കുന്നതിനുള്ള രജിസ്ട്രേഷൻ ഒക്ടോബർ 15, 16 തീയതികളിൽ നടത്താം. കൂടുതൽ വിവരങ്ങൾക്ക് https://jeeadv.ac.in.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.