മലബാർ മെഡിക്കൽ കോളജിൽ എം.ബി.ബി.എസ്, പി.ജി സീറ്റുകൾ കൂട്ടി

കോഴിക്കോട്: മലബാർ മെഡിക്കൽ കോളജിൽ എം.ബി.ബി.എസിന് 50 സീറ്റുകൾ വർധിപ്പിച്ച് 200 സീറ്റുകളിൽ പ്രവേശനം നൽകാനുള്ള അനുമതി ദേശീയ മെഡിക്കൽ കമീഷൻ നൽകി. സംസ്ഥാന സർക്കാറും ആരോഗ്യ സർവകലാശാലയും നൽകിയ അനുമതിക്കു പിന്നാലെയാണ് നാഷനൽ ദേശീയ കമീഷൻ പ്രസ്തുത സീറ്റ് വർധന ഈ വർഷം മുതൽ പ്രാബല്യത്തിൽ വരുത്താൻ അനുമതി നൽകിയതെന്ന് ബന്ധപ്പെട്ടവർ വാർത്തകുറിപ്പിൽ അറിയിച്ചു.

വിവിധ സ്പെഷാലിറ്റി വിഭാഗങ്ങളിലായി എം.ഡി/എം.എസ് കോഴ്സുകൾക്ക് ഈ വർഷം 28 സീറ്റുകൾ വർധിപ്പിച്ച് ആകെ പോസ്റ്റ് ഗ്രാജ്വേറ്റ് സീറ്റുകളുടെ എണ്ണം 56 ആയി ഉയർത്തിയിട്ടുണ്ട്.

സംസ്ഥാനത്ത് ആദ്യമായാണ് ഒരു സ്വാശ്രയ മെഡിക്കൽ കോളജിന് എം.ബി.ബി.എസിന് വർഷത്തിൽ 200 വിദ്യാർഥികളെ പ്രവേശിപ്പിക്കാനുള്ള അനുമതി ലഭിക്കുന്നത്.