ഈ പഞ്ചായത്തിൽ എ പ്ലസുകാർ 400ന്​ മുകളിൽ; പ്ലസ്​വൺ സീറ്റ്​ 360, എന്ത്​ ചെയ്യുമെന്നറിയാതെ വിദ്യാർഥികൾ

കൊടിയത്തൂർ (കോഴി​േ​ക്കാട്​): സർക്കാർ വിദ്യാലയമടക്കം മൂന്ന് ഹയർസെക്കൻഡറി സ്‌കൂളുകളുള്ള കൊടിയത്തൂർ പഞ്ചായത്തിൽ പ്ലസ്ടു പഠനത്തിനായി ആകെ 360 സീറ്റുകൾ മാത്രം. ഇക്കഴിഞ്ഞ എസ്.എസ്.എൽ.സി പരീക്ഷയിൽ ആയിരത്തിലധികം വിദ്യാർത്ഥികൾ വിജയിക്കുകയും നാന്നൂറിലധികം പേർക്ക് ഫുൾ എ പ്ലസ് ലഭിക്കുകയും ചെയ്തിട്ടുണ്ട്.

വിദ്യാർഥികളായ തദ്ദേശ വാസികൾക്ക് ലഭിക്കുന്ന ബോണസ് മാർക്ക് കിട്ടാത്തതിനാൽ, സമീപ പഞ്ചായത്തുകളിലെ സ്‌കൂളുകളിൽ പോലും സീറ്റ് ലഭിക്കാത്ത അവസ്ഥയിലാണ് ഫുൾ എ പ്ലസ് നേടിയവർ വരെ. സ്‌കൂളുകൾ ലഭിച്ചാൽ തന്നെ ഇഷ്​ടപെട്ട വിഷയങ്ങൾ ലഭിക്കുന്നുമില്ല.

കൊടിയത്തൂർ പി.ടി.എം ഹൈസ്കൂൾ, ചെറുവാടി ഹയർ സെക്കൻഡറി സ്കൂൾ, തോട്ടുമുക്കം ഹയർസെക്കൻഡറി സ്‌കൂൾ എന്നിവിടങ്ങളിൽനിന്നും എസ്.എസ്.എൽ.സി വിജയിച്ച ആയിരക്കണക്കിന് കുട്ടികളുടെ തുടർപഠനത്തിന് അവസരം ഒരുക്കണമെന്നാവശ്യപ്പെട്ട്​ മുഖ്യമന്ത്രിക്കും വിദ്യാഭ്യാസ മന്ത്രിക്കും കൊടിയത്തൂർ പഞ്ചായത്ത് ഭരണസമിതി നിവേദനം നൽകാൻ തീരുമാനിച്ചിട്ടുണ്ട്​. വാർഡ് അംഗം ഫസൽ കൊടിയത്തൂർ ഭരണസമിതി യോഗത്തിൽ വിഷയം അവതരിപ്പിച്ചു.