നീറ്റ്​ ഉയർന്ന സ്​കോറുകാർ വർധിച്ചു; മെഡിക്കൽ പ്രവേശനം കടുക്കും

തിരുവനന്തപുരം: നീറ്റ്​ -യു.ജി പരീക്ഷയിൽ ഉയർന്ന സ്​കോർ ലഭിച്ചവരുടെ എണ്ണം കുത്തനെ ഉയർന്നതോടെ കേരളത്തിൽ ഉൾപ്പെടെ മെഡിക്കൽ പ്രവേശനം കടുപ്പമേറിയതാക്കും. കഴിഞ്ഞ വർഷം ഗവ. മെഡിക്കൽ കോളജുകളിൽ അവസാനം പ്രവേശനം ലഭിച്ച നീറ്റ്​ സ്​കോർ പരിസരത്തുള്ളവർക്ക്​ പോലും ഇത്തവണ പ്രവേശനം ലഭിക്കില്ലെന്ന്​ ഏറക്കുറെ ഉറപ്പാണ്​. ദേശീയതലത്തിൽ ഇത്തവണ 720 മാർക്കും നേടി ഒന്നാം റാങ്കിലെത്തിയ 67 പേരിൽ നാലു​പേർ കേരളത്തിലാണ്​. കേരളത്തിൽ 700ഉം അതിനു​ മുകളിലും മാർക്ക്​​ നേടിയവർ 250നും 300നും ഇടയിലുണ്ടെന്നാണ്​ ഏകദേശ കണക്ക്​. 675 മാർക്കുള്ളവർ 2000ത്തോളം ​പേരുണ്ട്​. 650 മാർക്കും അതിനു മുകളിലുള്ളവരുടെയും എണ്ണം 3000ത്തിന്​ മുകളിലാണ്​. സംസ്ഥാനത്തെ 12 സർക്കാർ മെഡിക്കൽ​ കോളജുകളിൽ ആകെയുള്ള എം.ബി.ബി.എസ്​ സീറ്റുകളുടെ എണ്ണം 1755 ആണ്​. ഇതിൽ 261 സീറ്റുകൾ അഖിലേന്ത്യ ക്വോട്ടയിലേക്ക്​ നൽകും. ഇതിനു പുറമെ, വിവിധ നോമിനി സീറ്റുകൾ കൂടി പരിഗണിച്ചാൽ ആകെ 329 സീറ്റുകൾ സംസ്ഥാന ക്വോട്ടയിൽനിന്ന്​ കുറയും. ഇതുകൂടി പരിഗണിച്ചാൽ 1426 സീറ്റുകളാണ്​ സംസ്ഥാന ക്വോട്ടയിൽ അലോട്ട്​മെന്‍റിന്​ ലഭിക്കുക. ഇതിൽ 50 ശതമാനം സീറ്റുകൾ സ്​റ്റേറ്റ്​ മെറിറ്റിലും 50 ശതമാനം വിവിധ സംവരണ ക്വോട്ടയിലുമായിരിക്കും. സ്​റ്റേറ്റ്​ മെറിറ്റിൽ 713 സീറ്റുകളായിരിക്കും അലോട്ട്​​​മെന്‍റിനുണ്ടാവുക. ഈ വർഷം 685ന്​ താഴെ സ്​കോർ ലഭിച്ചവർക്ക് സ്​റ്റേറ്റ്​​ മെറിറ്റിൽ പ്രവേശനത്തിന്​ സാധ്യത കുറവായിരിക്കും.

കഴിഞ്ഞ വർഷം സംസ്ഥാന ക്വോട്ട പ്രവേശനത്തിൽ മൂന്നാം അലോട്ട്​മെന്‍റ്​ പൂർത്തിയായപ്പോൾ അവസാന അലോട്ട്​മെന്‍റ്​ ലഭിച്ച 865ാം റാങ്കുള്ള (നീറ്റ്​ റാങ്ക്​ 10122)​ വിദ്യാർഥിയുടെ നീറ്റ്​ സ്​കോർ 640 ആയിരുന്നു. ഉയർന്ന നീറ്റ്​ സ്​കോറുകാരുടെ എണ്ണം കുത്തനെ ഉയർന്നത്​ വിവിധ സംവരണ സീറ്റുകളിൽ പ്രവേശനം നേടുന്നവരുടെ സാധ്യതയെയും ബാധിക്കും. കഴിഞ്ഞ വർഷം ഇ.ഡബ്ല്യു.എസ്​ വിഭാഗത്തിൽ 585 സ്​കോർ നേടുകയും 3334 ാം റാങ്ക്​ നേടുകയും (നീറ്റ്​ റാങ്ക്​ 38115)​ ചെയ്ത വിദ്യാർഥിക്കാണ്​ അവസാനം അലോട്ട്​മെന്‍റ്​ ലഭിച്ചത്​. ഈഴവ സംവരണത്തിൽ 612 സ്​കോറിൽ സംസ്ഥാന റാങ്ക്​ 1822ൽ എത്തിയ (നീറ്റ്​ റാങ്ക്​ 22269) വിദ്യാർഥിക്കാണ്​ അവസാന അലോട്ട്മെന്‍റ്​ ലഭിച്ചത്​. മുസ്​ലിം സംവരണത്തിൽ ഇത്​ 626 സ്​കോറും സംസ്ഥാന റാങ്ക്​ 1313 ഉം (നീറ്റ്​ റാങ്ക്​ 15448) ആയിരുന്നു.

അഖി​ലേന്ത്യ ക്വോട്ട സീറ്റുകളിൽ ഇതര സംസ്ഥാനങ്ങളിലെ മെഡിക്കൽ കോളജുകളിലെ സാധ്യതകൾ കൂടി ഉപയോഗപ്പെടുത്തുന്നതിനനുസൃതമായിരിക്കും സംസ്ഥാനത്തെ വിദ്യാർഥികളുടെ പ്രവേശന സാധ്യത. ഒരേ സ്​കോറിൽ വരുന്ന കുട്ടികളുടെ എണ്ണവും കഴിഞ്ഞ വർഷത്തെ അപേക്ഷിച്ച്​ വൻ തോതിൽ ഉയർന്നിട്ടുണ്ട്​. ഇതും മെച്ചപ്പെട്ട സ്​കോർ ലഭിച്ചവരുടെ പ്രവേശന സാധ്യത ഇല്ലാതാക്കും. സർക്കാർ കോളജുകളിൽ സീറ്റ്​ ലഭിക്കാത്ത സാഹചര്യം സ്വകാര്യ സ്വാശ്രയ മെഡിക്കൽ കോളജിലെ പ്രവേശനത്തെയും സ്വാധീനിക്കും. ഇവിടെയും താരതമ്യേന ഉയർന്ന നീറ്റ്​ സ്​കോർ ലഭിച്ചവർക്കായിരിക്കും പ്രവേശനത്തിനുള്ള സാധ്യത.