നീറ്റ്: ഹരിയാനയിലെ വിവാദ കേന്ദ്രത്തിൽ ആറ് പേർക്ക് 720ൽ 720; പുന:പരീക്ഷയിൽ ഒരാൾക്കും 682ന് മുകളിൽ മാർക്കില്ല

ന്യൂഡൽഹി: ഹരിയാനയിൽ ആറ് പേർക്ക് 720ൽ 720ഉം ലഭിച്ച വിവാദ നീറ്റ് പരീക്ഷാ കേന്ദ്രത്തിൽ പുന:പരീക്ഷ നടത്തിയപ്പോൾ ഒരാൾക്ക് പോലും 700ൽ കൂടുതൽ മാർക്കില്ല. 682 ആണ് ഇവിടെ ലഭിച്ച കൂടിയ മാർക്ക്. സുപ്രീംകോടതി ഉത്തരവിനെ തുടർന്ന് നീറ്റ് മാർക്ക് പ്രസിദ്ധീകരിച്ചപ്പോഴാണ് മാർക്കിലെ വ്യത്യാസം പുറത്തായത്.

മേയ് അഞ്ചിന് നടന്ന നീറ്റ്-യു.ജി പരീക്ഷയിൽ രാജ്യത്താകെ 67 വിദ്യാർഥികളാണ് 720ൽ 720ഉം നേടിയത്. ആദ്യമായാണ് ഇത്രയേറെ പേർ മുഴുവൻ മാർക്കും നേടുന്നത്. ഇതിൽ ആറ് പേർ ഹരിയാനയിലെ ഒരു കേന്ദ്രത്തിൽ നിന്ന് മാത്രമായിരുന്നു. പരീക്ഷ ആരംഭിക്കാൻ സമയം നഷ്ടമായെന്ന് കാട്ടി ഇവർക്ക് ഗ്രേസ് മാർക്ക് നൽകിയതോടെയാണ് മുഴുവൻ മാർക്കും ലഭിച്ചതെന്ന് പരീക്ഷ നടത്തിപ്പ് ഏജൻസിയായ എൻ.ടി.എ അറിയിച്ചിരുന്നു. പിന്നീട്, സുപ്രീംകോടതി ഉത്തരവിനെ തുടർന്നാണ് ഗ്രേസ് മാർക്ക് ലഭിച്ച വിദ്യാർഥികൾക്കായി പുന:പരീക്ഷ നടത്തിയത്.

മേഘാലയ, ഹരിയാന, ഛത്തീസ്ഗഡ്, ഗുജറാത്ത്, ചണ്ഡീഗഡ് എന്നിവിടങ്ങളിലെ ആറ് കേന്ദ്രങ്ങളിലാണ് പരീക്ഷ ആരംഭിക്കാൻ വൈകിയെന്ന കാരണംകാട്ടി എൻ.ടി.എ ഗ്രേസ് മാർക്ക് നൽകിയത്. ഇത് വിവാദമായിരുന്നു. സുപ്രീംകോടതി ഇടപെടലോടെ ഗ്രേസ് മാർക്ക് പിൻവലിച്ച് വീണ്ടും പരീക്ഷ നടത്തുകയായിരുന്നു.

നീറ്റിൽ വ്യാപക ക്രമക്കേട് നടന്നെന്ന് വ്യക്തമായാൽ മാത്രമേ പുനഃപരീക്ഷക്ക് ഉത്തരവിടാനാകൂവെന്നാണ് സുപ്രീംകോടതി കഴിഞ്ഞ ദിവസം ഇതുസംബന്ധിച്ച ഹരജികൾ പരിഗണിക്കവേ വ്യക്തമാക്കിയത്. ചോ​ദ്യ​പേ​പ്പ​ർ ചോ​ർ​ച്ച വി​വി​ധ പ​രീ​ക്ഷ കേ​ന്ദ്ര​ങ്ങ​ളി​ലെ ഫ​ല​ങ്ങ​ളി​ൽ എ​ങ്ങ​നെ പ്ര​തി​ഫ​ലി​ച്ചു​വെ​ന്ന് വ്യ​ക്ത​മാ​കാ​നായി പ​രീ​ക്ഷ​യെ​ഴു​തി​യ മു​ഴു​വ​ൻ വി​ദ്യാ​ർ​ഥി​ക​ളു​ടെ​യും മാ​ർ​ക്ക് പ​രീ​ക്ഷ കേ​ന്ദ്ര​ങ്ങ​ളു​ടെ​യും ന​ഗ​ര​ങ്ങ​ളു​ടെ​യും അ​ടി​സ്ഥാ​ന​ത്തി​ൽ വെ​ബ്സൈ​റ്റി​ൽ പ്ര​സി​ദ്ധീ​ക​രി​ക്കാ​ൻ നിർദേശിക്കുകയും ചെയ്തു. കേ​ന്ദ്ര സ​ർ​ക്കാ​റി​ന്റെ​യും എ​ൻ.​ടി.​എ​യു​ടെ​യും എ​തി​ർ​പ്പ് ത​ള്ളി​യു​ള്ള നി​ർ​ദേ​ശം.