![Exam Exam](https://www.madhyamam.com/h-upload/2021/12/06/1313009-plus-one-those-who-missed-the-exam-due-to-covid-did-not-get-a-chance.webp)
പ്ലസ് വൺ: കോവിഡ് മൂലം പരീക്ഷ മുടങ്ങിയവർക്ക് പകരം അവസരമായില്ല
text_fieldsതിരുവനന്തപുരം: കോവിഡ് ഉൾപ്പെടെയുള്ള കാരണങ്ങളാൽ പ്ലസ് വൺ പരീക്ഷ എഴുതാൻ കഴിയാതിരുന്ന അയ്യായിരത്തോളം വിദ്യാർഥികൾക്ക് പകരം പരീക്ഷയും ഇംപ്രൂവ്മെൻറ് പരീക്ഷയും നടത്തുന്നതിൽ സർക്കാർ തീരുമാനം വൈകുന്നു. പ്ലസ് വൺ പരീക്ഷ എഴുതാനായില്ലെങ്കിൽ ഈ വിദ്യാർഥികൾക്ക് മാർച്ച്/ ഏപ്രിൽ മാസത്തിൽ നടത്തേണ്ട പ്ലസ് ടു പരീക്ഷക്ക് രജിസ്റ്റർ ചെയ്യാനുമാകില്ല. ഫലത്തിൽ ഈ വിദ്യാർഥികൾക്ക് രണ്ട് വർഷം നഷ്ടപ്പെടും.
പകരം പരീക്ഷയും ഇംപ്രൂവ്മെൻറ് പരീക്ഷയും കമ്പാർട്ട്മെൻറൽ പരീക്ഷയും നടത്തുന്നത് സംബന്ധിച്ച് ഹയർ സെക്കൻഡറി വിഭാഗം ആഴ്ചകൾക്ക് മുമ്പ് സർക്കാറിന് നിർദേശം സമർപ്പിച്ചെങ്കിലും തീരുമാനം വൈകുകയാണ്. പ്ലസ് വൺ പരീക്ഷക്ക് ശേഷം ഈ വിദ്യാർഥികൾക്ക് മുൻ വർഷങ്ങളിൽ ഇംപ്രൂവ്മെൻറ് അവസരം നൽകാറുണ്ട്. ഒട്ടേറെ വിദ്യാർഥികളും അധ്യാപക സംഘടനകളും ഇംപ്രൂവ്മെൻറ് പരീക്ഷ ആവശ്യം ഉന്നയിച്ചിട്ടുമുണ്ട്.
2009 മുതൽ 2021 വരെ പ്ലസ് ടു പരീക്ഷ എഴുതിയവരിൽ വിജയിക്കാത്തവരാണ് കമ്പാർട്ട്മെൻറൽ പരീക്ഷ എഴുതാനുള്ളത്. 60,000ത്തോളം വിദ്യാർഥികളാണ് ഈ വിഭാഗത്തിലുള്ളത്. ഇതിൽ 2016 വരെയുള്ള വിദ്യാർഥികൾക്ക് അടുത്തത് അവസാന പരീക്ഷ അവസരവുമാണ്. പരീക്ഷ നടത്തുന്നതിൽ തീരുമാനം വൈകുന്നത് അടുത്ത പ്ലസ് ടു പരീക്ഷ നടത്തിപ്പിനെയും ബാധിക്കും.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.