ചോദ്യമില്ല, ഉത്തരം മാത്രം; സി.ബി.എസ്​.ഇ 10ാംക്ലാസ്​ ഇംഗ്ലീഷ്​ ചോദ്യപേപ്പറിൽ ആശയക്കുഴപ്പമെന്ന്

ന്യൂഡൽഹി: സി.ബി.എസ്​.ഇ പത്താം ക്ലാസ്​ ഇംഗ്ലീഷ്​ പരീക്ഷയിലെ ചില ചോദ്യങ്ങൾ ആശയക്കുഴ​പ്പമുണ്ടാക്കുന്നുവെന്ന ആരോപണവുമായി വിദ്യാർഥികളും രക്ഷിതാക്കളും. 13, 14 ​േചാദ്യങ്ങളിലാണ്​ ആശയക്കുഴപ്പം. ഇവയിൽ ഉത്തരങ്ങൾ മാത്രമേ ഉണ്ടായിരുന്നുള്ളൂവെന്നും ചോദ്യമുണ്ടായിരുന്നില്ലെന്നും ഒരു വിദ്യാർഥി പറയുന്നു. ട്വിറ്ററിലാണ്​ രക്ഷിതാക്കളുടെയും മാതാപിതാക്കളുടെയും ​പ്രതികരണം.

ചോദ്യപേപ്പറിലെ തെറ്റിനെക്കുറിച്ച്​ ഇൻവിജിലേറ്റ​െറ അറിയിച്ചപ്പോൾ ആ ചോദ്യങ്ങൾ വിട്ടുകളയാനായിരുന്നു മറുപടിയെന്നും വിദ്യാർഥി പറയുന്നു. ചോദ്യോത്തരങ്ങൾ ആശയകുഴപ്പം സൃഷ്​ടിക്കു​ന്നുവെന്ന ആരോപണവുമായി മറ്റു വിദ്യാർഥികളും രംഗത്തെത്തി.

അതേസമയം, ചോദ്യപേപ്പറിൽ തെറ്റ്​ കടന്നുകൂടിയിട്ടില്ലെന്ന്​ വ്യക്തമാക്കി സി.ബി.എസ്​.ഇ രംഗത്തെത്തി. ചുവടെ നൽകിയിരിക്കുന്ന ഭാഗം വായിച്ച്​ ചോദ്യങ്ങൾക്ക് ഉത്തരം നൽകുക/നൽകിയിരിക്കുന്നവയിൽനിന്ന്​ ഏറ്റവും അനുയോജ്യമായ ഓപ്​ഷൻ തെരഞ്ഞെടുത്ത്​ പ്രസ്​താവനകൾ പൂർത്തിയാക്കുക -ഈ നിർദേശം നൽകിയിട്ടുണ്ടെന്നും ചോദ്യങ്ങൾക്ക്​ നൽകിയിരിക്കുന്ന നിർദേശങ്ങൾക്ക്​ അനുസൃതമായാണ്​ മറുപടി നൽകേണ്ടതെന്നും സി.ബി.എസ്​.ഇ അറിയിച്ചു.

​േന​രത്തേ സി.ബി.എസ്​.ഇ 12ാം ക്ലാസ്​ പരീക്ഷയിലെ ഒരു ചോദ്യവുമായി ബന്ധപ്പെട്ടും വിവാദങ്ങൾ ഉയർന്നിരുന്നു. 2002ലെ ഗുജറാത്ത്​ കലാപം ഏത്​ സർക്കാറിന്​ കീഴിലായിരുന്നുവെന്നായിരുന്നു ചോദ്യം. ​സി.ബി.എസ്​.ഇ ഖേദം പ്രകടിപ്പിച്ച്​ രംഗത്തെത്തിയതാണ്​ വിവാദങ്ങൾക്ക്​ ഇടയാക്കിയത്​. സിലബസിന്​ പുറത്തുള്ളതാണ്​ ചോദ്യമെന്നായിരുന്നു വാദം. എന്നാൽ, സിലബസിൽ തന്നെയുള്ളതാണെന്ന്​ വ്യക്തമാക്കി നിരവധിപേർ രംഗത്തെത്തിയിരുന്നു.