സാങ്കേതിക സർവകലാശാല: ഒന്നാം വർഷ ബി ടെക് ക്ലാസുകൾ 22ന് ആരംഭിക്കും

തിരുവനന്തപുരം: എ.പി.ജെ അബ്​ദുൽ കലാം സാങ്കേതിക ശാസ്ത്ര സർവകലാശാലയിലെ ഒന്നാം വർഷ ബി ടെക്, ബി.ആർക്, ബി.എച്ച്​.എം സി.ടി, ബി. ഡെസ് ക്ലാസുകൾ നവംബർ 22 ന് തുടങ്ങും. ഓഫ്​ലൈൻ ആയിട്ടാണ് ക്ലാസുകൾ ആരംഭിക്കുക.

ഹോസ്റ്റൽ അഡ്മിഷൻ, മറ്റ് നടപടി ക്രമങ്ങൾക്കുമായി ആദ്യ ദിവസം വിദ്യാർഥികൾ കോളജുകളിൽ ചെലവഴിക്കണം. തുടർന്ന് 23 മുതൽ 27 വരെ സർവകലാശാലയും അതാത് കോളജുകളും ചേർന്ന് ബി.ടെക് ഒന്നാം വർഷ വിദ്യാർഥികൾക്കായി ഇൻഡക്ഷൻ ട്രെയിനിങ്​ പ്രോഗ്രാം ക്രമീകരിക്കും. സർവകലാശാല നടത്തുന്ന സെഷനുകൾ ഓൺലൈനായാണ് നടത്തുക.

ഒന്നാം വർഷ എം ടെക്, എം പ്ലാൻ, എം ആർക് ക്ലാസുകൾ നവംബർ 15 ന് തുടങ്ങുമെന്നും സർവകലാശാല അധികൃതർ അറിയിച്ചു.