പ്രവേശന പ്രക്രിയ പൂർത്തിയാകും വരെ ടി.സി സമർപ്പിക്കാൻ സമയം

തിരുവനന്തപുരം: ഉപരിപഠനം തടസ്സപ്പെടുന്നത് ഒഴിവാക്കാൻ വിടുതൽ സർട്ടിഫിക്കറ്റ് (ടി.സി) സമർപ്പിക്കുന്നതിന് സാവകാശം നൽകാൻ സർവകലാശാലകൾ അടിയന്തര നടപടി സ്വീകരിക്കണമെന്ന് ഉന്നതവിദ്യാഭ്യാസ മന്ത്രി ഡോ.ആർ. ബിന്ദു നിർദേശിച്ചു. പ്രവേശന പ്രക്രിയ പൂർത്തീകരിക്കുന്ന സമയം വരെ സാവകാശം അനുവദിക്കണമെന്നും നിർദേശിച്ചു.

ഡിപ്ലോമ-ഇൻ എലമെന്ററി എജുക്കേഷൻ (ഡി.എൽ.എസ്), ബി.എഡ്, ബിരുദാനന്തര ബിരുദം തുടങ്ങിയ കോഴ്‌സുകൾ അവസാന സെമസ്റ്റർ /വർഷം പഠിക്കുന്ന വിദ്യാർഥികൾക്ക് ടി.സി ലഭിക്കാൻ താമസമുണ്ടാകുന്നതു മൂലം വിവിധ കോഴ്സുകളുടെ പ്രവേശന പ്രക്രിയയിൽ പങ്കെടുക്കാൻ കഴിയാത്ത സാഹചര്യത്തിലാണ് നടപടിയെന്ന് മന്ത്രി പറഞ്ഞു.