ഇംഗ്ലീഷ്​ ഭാഷാ പുസ്​തകങ്ങൾ ഇന്ത്യൻ ഭാഷകളിലേക്ക്​ മാറ്റാൻ സർവകലാശാലകൾക്ക്​ യു.ജി.സി നിർദേശം

ന്യൂഡൽഹി: വിദ്യാർഥികൾ പഠനത്തിനായി ഉപയോഗിക്കുന്ന ഇംഗ്ലീഷ്​ ഭാഷാ പുസ്​തകങ്ങളെ പ്രാദേശിക ഭാഷാകളിലേക്ക്​ വിവർത്തനം ചെയ്യാൻ സർവകലാശാലകൾക്ക്​ യൂനിവേഴ്​സിറ്റി ഗ്രാൻറ്​സ്​ കമീഷന്‍റെ നിർദേശം. ഇംഗ്ലീഷിൽ മാത്രം ലഭ്യമായിരുന്ന പുസ്​തകങ്ങളാണ്​ പ്രദേശിക ഭാഷകള​ിലേക്ക്​ വിവർത്തനം ചെയ്യുക.

2021 നവംബറോടെ യു.ജി.സിയുടെ യൂനിവേഴ്​സിറ്റി ആക്​ടിവിറ്റി മോണിറ്ററിങ്​ പോർട്ടലിൽ ഇതുസംബന്ധിച്ച മാർഗരേഖ തയാറാക്കി സമർപ്പിക്കാൻ വിദ്യാഭ്യാസ മന്ത്രാലയം എല്ലാ സർവകലാശാല വൈസ്​ ചാൻസലർമാർക്കും നിർദേശം നൽകുകയും ചെയ്​തു.

വിദ്യാർഥികളെ അവരുടെ മാതൃഭാഷ പഠിക്കാൻ പ്രാപ്​തരാക്കുക എന്നതിനൊപ്പം വിമർശനാത്മചിന്ത വികസിപ്പിക്കുന്നതിനും പ്രധാന കാര്യങ്ങളെക്കുറിച്ച്​ മികച്ച അവബോധം വളർത്തിയെടുക്കുകയുമാണ്​ ലക്ഷ്യം.

ഹിന്ദി ഒഴികെ പ്ര​ദേശിക ഭാഷകൾ കൂടുതലായി ഉപയോഗിക്കുകയും സംസാരിക്കുകയും ചെയ്യുന്ന സംസ്​ഥാനങ്ങളിൽ പുസ്​തകങ്ങൾ അതത്​ പ്രാദേശിക ഭാഷകളിലേക്ക്​ വിവർത്തനം ചെയ്യും.

രണ്ടാഴ്ച മാത്രം സമയം നൽകിയിരിക്കുന്നതിനാൽ മിക്ക യൂനിവേഴ്​സിറ്റികളും പ്ലാൻ തയാറാക്കി തുടങ്ങിയതായി പറയുന്നു.

കേന്ദ്രസർക്കാർ ആവിഷ്​കരിച്ച പുതിയ വിദ്യാഭ്യാസ നയ പ്രകാരം വിവിധ ഇന്ത്യൻ ഭാഷകളിൽ ഗുണനിലവാരമുള്ള പഠന സാമഗ്രികൾ ലഭ്യമാക്കുകയാണ്​ ലക്ഷ്യം. ആസാദി കാ അമൃത്​ മഹോത്സവ്​ ആഘോഷങ്ങളുടെ ഭാഗമായാണ്​ ഇതെന്നും യു.ജി.സി പറയുന്നു.