തുടക്കക്കാരായ ബിരുദധാരികൾക്ക്​ അവസരമൊരുക്കി വിപ്രോ; 3.5 ലക്ഷം വാർഷിക ശമ്പളം

ബംഗളൂരു: ബിരുദധാരികൾക്ക്​ അവസരമൊരുക്കി ഐ.ടി ഭീമൻമാരായ വിപ്രോ. എൻജിനീയറിങ്​ ബിരുദധാരികൾക്കാണ്​ അവസരം. എലൈറ്റ്​ നാഷനൽ ടാലന്‍റ്​ ഹണ്ട്​ വഴിയാണ്​ ബിരുദധാരികളെ തെരഞ്ഞെടുക്കുക.

ബി.ഇ/ബി.ടെക്​/എം.ഇ/എം.ടെക്കുകാർക്കാണ്​ അവസരം. 2020, 2021, 2022 വർഷങ്ങളിൽ ബിരുദം പൂർത്തിയാക്കിയവർക്ക്​ അപേക്ഷിക്കാം. ഫാഷൻ ടെക്​നോളജി, ടെക്​സ്​റ്റൈൽ എൻജിനീയറിങ്​, അഗ്രികൾച്ചർ, ഫുഡ്​ ടെക്നോളജി ബിരുദക്കാർക്ക്​ അപേക്ഷിക്കാനാകില്ല.

പത്ത്​, പ്ലസ്​ടു, ബിരുദം, ബിരുദാനന്തരബിരുദം എന്നിവയിൽ 60 ശതമാനത്തിൽ കുറയാത്ത മാർക്ക്​ വേണം. വിദ്യാഭ്യാസം പൂർത്തിയാക്കി മൂന്നുവർഷം വരെ കഴിഞ്ഞവർക്കും ടാലന്‍റ്​ ഹണ്ടിൽ പങ്കാളികളാകാം.

ഉദ്യോഗാർഥികളുടെ വയസ്​ 25ൽ കൂടരുത്​. കഴിഞ്ഞ ആറുമാസത്തിനുള്ളിൽ വിപ്രോയുടെ ഏതെങ്കിലും ടാലന്‍റ്​ ഹണ്ട്​ പ്രോ​ഗ്രാമിൽ പ​​​​​​ങ്കെടുത്തവർക്ക്​ അപേക്ഷിക്കാനാകില്ല. പ്രൊജക്ട്​ എൻജിനീയർ തസ്തികയിലേക്കാണ്​ അവസരം. 3.5 ലക്ഷമാണ്​ വാർഷിക ശമ്പളം. 2022 ജനുവരി 31 മുതൽ രജിസ്റ്റർ ചെയ്യാം.