ഭീതിയുടെ ആ 13 മിനിറ്റ്​; കൊലയാളിയായ മുൻ ബാങ്ക്​ മാനേജരെ കുടുക്കിയത്​ കാഷ്യറായ യുവതിയുടെ അസാമാന്യ ധീരത

മുംബൈ: ഐ.സി.ഐ.സി.ഐ ബാങ്ക് മുൻ ജീവനക്കാരൻ കവർച്ച ശ്രമത്തിനിടെ ഉദ്യോഗസ്​ഥയെ കുത്തിക്കൊലപ്പെടുത്തുകയും കാഷ്യറെ പരിക്കേൽപിക്കുകയും ചെയ്​ത സംഭവം മഹാരാഷ്​ട്രയിലെ വിരാർ നിവാസികളെ ഞെട്ടിച്ചിരിക്കുകയാണ്​. കവർച്ച ശ്രമത്തിനിടെ ബാങ്ക്​ ശാഖയിൽ നടന്ന ഞെട്ടിപ്പിക്കുന്ന സംഭവങ്ങൾ വിവരിക്കുകയാണ്​ പൊലീസ്​. ഭീതിയുടെ ആ 13 മിനിറ്റ് സമയത്തെ സി.സി.ടി.വി ദൃശ്യങ്ങളാണ്​​ പൊലീസ്​ വിവരിച്ചത്​.

കഴുത്തിന്​ കുത്തേറ്റിട്ടും പ്രതിയായ അനിൽ ദുബെയെ തടയുകയും അലമുറയിട്ട്​ സമീപവാസികളെ വിവരമറിയിക്കുകയും ചെയ്​ത കാഷ്യർ ശ്വേത ദേവ്​രുഖാണ്​ (32) അസാമാന്യ ധീരത കാണിച്ചത്​. സുരക്ഷ ഗാർഡുകൾ ഇല്ലാത്ത ബാങ്കിന്​ പു​റത്തേക്ക്​ രക്ഷ​െപടാൻ ശ്രമിച്ച ദുബെയെ തടയുകയും നാട്ടുകാരോട്​ സഹായത്തിന്​ അപേക്ഷിക്കുകയും ചെയ്​ത ശ്വേതയാണ്​ പ്രതിയെ പിടികൂടാൻ സഹായിച്ചത്​.

രണ്ട്​ ഉദ്യോഗസ്​ഥരെയും കൊലപ്പെടുത്തി പരമാവധി പണം കൈക്കലാക്കാനായിരുന്നു പ്രതി ലക്ഷ്യമിട്ടതെന്നും എന്നാൽ ശ്വേതയുടെ അസാമാന്യ ധീരതയാണ്​ ഇത്​ തടഞ്ഞതെന്ന്​ പൊലീസ്​ പറഞ്ഞു. ബാങ്കിൽ നിന്ന് ആഭരണങ്ങളും പണവുമടക്കം​ 1.38 കോടി രൂപയാണ്​ ഇയാൾ കൈക്കലാക്കിയിരുന്നത്​.

ഐ.സി.ഐ.സി.ഐ ബാങ്കിന്‍റെ മൻവേൽപാഡ ശാഖയിലെ മാനേജരായിരുന്നു ദുബെ. കഴിഞ്ഞ ആഗസ്റ്റിലാണ്​ ദുബെ നായ്​ഗോണിലെ ആക്​സിസ്​ ബാങ്ക്​ ശാഖ മാനേജരായി ചേർന്നത്​.

ഭീതിയുടെ ആ 13 മിനിറ്റുകൾ

വ്യാഴാഴ്ച വൈകീട്ടാണ്​ ദുബെ മൻവേൽപാഡ ശാഖയിലെ മാനേജരും മുൻ സഹപ്രവർത്തകയുമായ യോഗിത വർതകിനെ (34) കാണാനായി ബാങ്കിലെത്തിയത്​.

രാത്രി 8.03 - ദുബെയും യോഗിതയും ജോലി മാറ്റത്തെ കുറിച്ച്​ ചർച്ച ചെയ്യാനായി ബാങ്കിനകത്തെ ചെറിയ മെസ്സ്​ റൂമിലെത്തി

8.07 -യോഗിത എഴുന്നേറ്റ്​ തിരിയാൻ ശ്രമിക്കുന്നതിനിടെ ദുബെ തന്‍റെ ബാഗിൽ കരുതിയിരുന്ന കത്തിയെടുത്ത്​ കഴുത്തിൽ തുരുതുരെ കുത്തി. സഹായത്തിനായി അവർ ഉറക്കെ കരഞ്ഞെങ്കിലും ദുബെ കുത്തിക്കൊണ്ടിരുന്നു. ഏഴേ​ാ എ​ട്ടോ തവണയാണ്​ ദുബെ യോഗിതയുടെ കഴുത്തിൽ കുത്തിയതെന്ന്​ പൊലീസ്​ പറഞ്ഞു.

8.08 -മെസ്സ്​ റൂമിലെത്തിയ ശ്വേത യോഗിത കുത്തേറ്റ്​ വീണു കിടക്കുന്നതാണ്​ കണ്ടത്​. ഇതോടെ ശ്വേതക്കെതിരെ തിരിഞ്ഞ ദുബെ മറ്റൊരു കത്തിയെടുത്ത്​ ശ്വേതയുടെ കഴുത്തിന്​ കുത്തി. കുത്തേറ്റ ശ്വേത നിലത്ത്​ വീണു.

8.09 -ബാങ്കിന്‍റെ സ്​ട്രോങ്​ റൂമിലുള്ള പണവും വിലപിടിപ്പുള്ള വസ്​തുക്കളും കൈക്കലാക്കാനായി ദുബെ ബാഗുമെടുത്ത്​ പോയി.

8.12 -ദുബെ രക്ഷപ്പെടാൻ ഒരുങ്ങുന്നതിനിടെ കഴുത്തിലെ മുറിവ്​ ഒരു കൈ കൊണ്ട്​ അമർത്തി പിടിച്ച്​ ശ്വേത അപായ മണി മു​ഴക്കാനായി മാനേജരുടെ കാബിനിലേക്ക്​ പോയി.

8.13 -മോഷണ മുതലുമായി കടന്നുകളയാൻ ശ്രമിച്ച പ്രതി ബാങ്കിൽ നിന്ന്​ ഇറങ്ങാൻ ​ശ്രമിക്കുന്നതിനിടെ ശ്വേത തടഞ്ഞു. കത്തിയെടുത്ത ദുബെ അവളെ വീണ്ടും കുത്തി.

8.14 -പ്രധാന വാതിലിലൂടെ ദുബെ ബാങ്കിന്‍റെ പുറത്ത്​ കടന്നു. അയാളെ പിന്തുടർന്ന്​ പുറത്തെത്തിയ ശ്വേത ഒച്ച വെച്ച്​ നാട്ടുകാരെ അറിയിച്ചു.

പിടികൂടിയത്​ നാട്ടുകാർ

രക്​തം ഒലിപ്പിച്ച്​ സഹായത്തിനായി അപേക്ഷിച്ച ശ്വേതയെ ആദ്യമായി ശ്രദ്ധിച്ചത്​ സമീപത്ത്​ കൂടി പോകുകയായിരുന്ന ആദിൽ പത്താനും സുഹൃത്ത്​ ജസീക്കയുമായിരുന്നു. ബാങ്കിന്​ സമീപത്ത്​ കൂടെ ദുബെ രക്ഷപെടുന്നത്​ കണ്ട പത്താൻ പിറ​െക ഓടി പിടികൂടുകയായിരുന്നു. അഞ്ച്​ മിനിറ്റിനുള്ളിൽ പൊലീസ്​ സംഭവ സ്​ഥലത്തെത്തി.

രക്​തത്തിൽ കുളിച്ച്​ ചലനമറ്റ നിലയിലാണ്​​ യോഗിതയെ നാട്ടുകാർ കണ്ടത്​. ശ്വേതക്ക്​ ആക്രമണത്തിൽ ഗുരുതരമായി പരിക്കേറ്റിരുന്നു. ആശുപത്രിയിൽ എത്തിച്ച ശേഷമാണ്​ യോഗിത അന്ത്യശ്വാസം വലിച്ചത്​. സ്വകാര്യ ആശുപത്രിയിൽ പ്രവേശിപ്പിച്ച ശ്വേത ചികിത്സയിൽ കഴിയുകയാണ്​.

ആറ്​ മണിക്ക്​ ശേഷം സുരക്ഷ ഗാർഡുകൾ ഇല്ലാത്തതിൽ വിമർശനം

റോഡരികിൽ നിന്ന്​ വാങ്ങിയ മൂന്ന്​ കത്തികൾ കൈയ്യിൽ കരുതിയാണ്​ ദുബെ ബാങ്ക്​ കൊള്ളയടിക്കാൻ എത്തിയത്​. കഠിനാധ്വാനിയായ യോഗിത രാത്രി വൈകിയും ബാങ്കിൽ ജോലിയിൽ ഏർപെടാറുണ്ടായിരുന്നു. ആറുമണിക്ക്​ ശേഷം ശാഖയിൽ സുരക്ഷ ഗാർഡുകൾ ഉണ്ടാവുകയില്ലെന്ന്​ അറിയാമായിരുന്ന ദുബെ അത്​ മുതലെടുക്കുകയായിരുന്നു.

സുരക്ഷ ഗാർഡുകളുടെ അസാന്നിധ്യത്തിലും വനിത ജീവനക്കാർക്ക്​ ജോലി ചെയ്യേണ്ടി വരുന്ന സാഹചര്യം ഒരുക്കിയതിന്​ ഐ.സി.ഐ.സി.ഐ ബാങ്കിനെതിരെ രൂക്ഷ വിമർശനമാണ്​ ഉയരുന്നത്​. മരിച്ച യോഗിതയുടെ ഭർത്താവ്​ മരുന്ന്​ കമ്പനിയിലാണ്​ ജോലി ചെയ്യുന്നത്​. മൂന്ന്​ വയസായ മകനുണ്ട്​.

വായ്​പ തിരിച്ചടക്കാനായി കൊടും ക്രൂരത

മൂന്ന്​ ബാങ്കുകളിൽ നിന്ന്​ ദുബെ ഭീമമായ സംഖ്യ വായ്​പയെടുത്തിരുന്നതായും അവ തിരിച്ചടക്കാൻ സാധിച്ചിരുന്നില്ലെന്നും പൊലീസ്​ പറഞ്ഞു. ലോക്​ഡൗൺ കാലത്ത്​ ഒരു മൊബൈൽ കട തുടങ്ങിയെങ്കിലു​ം അതും​ വിജയിച്ചില്ല. ഇതിനിടെ ഓഹരി വ്യാപാരത്തിൽ ഇറങ്ങിയെങ്കിലും വൻ നഷ്​ടം സംഭവിച്ചു. കോടതിയിൽ ഹാജരാക്കിയ പ്രതിയെ ആഗസ്റ്റ്​ ആറ്​ വരെ പൊലീസ്​ കസ്റ്റഡിയിൽ വിട്ടു.