മുംബൈയിൽ 20 കാരിയെ ബലാത്സംഗം ചെയ്​ത്​ കൊലപ്പെടുത്തിയ നിലയിൽ

മുംബൈ: മഹാരാഷ്​ട്രയിൽ 20കാരിയെ ബലാത്സംഗം ചെയ്​ത്​ കൊലപ്പെടുത്തിയ നിലയിൽ. മുംബൈ കുർളയിലാണ്​ സംഭവം. എച്ച്​.ഡി.ഐ.എൽ കോളനിയിലെ ആളൊഴിഞ്ഞ കെട്ടിടത്തിന്‍റെ ടെറസിലെ ലിഫ്​റ്റ്​ മുറിയിലാണ്​ മൃതദേഹം കണ്ടെത്തിയത്​. മൃതദേഹം തിരിച്ചറിഞ്ഞിട്ടില്ല.

പോസ്റ്റ്​മോർട്ടം റിപ്പോർട്ടിൽ പെൺകുട്ടി ബലാത്സംഗത്തിന്​ ഇരയായതായി കണ്ടെത്തി. ത​ലക്കേറ്റ മാരക പരി​ക്കാണ്​ മരണകാരണം.

'വ്യാഴാഴ്​ച വൈകിട്ട്​ കുറച്ച്​ ആൺകുട്ടികൾ വിഡിയോ ചിത്രീകരിക്കുന്നതിനായി ആളൊഴിഞ്ഞ കെട്ടിടത്തിലേക്ക്​ പോയി. അവർ അവിടെ ഒരു മൃതദേഹം കാണുകയും പൊലീസിൽ അറിയിക്കുകയായിരുന്നു' -പൊലീസ്​ ഡെപ്യൂട്ടി കമീഷണർ പ്രനയ്​ അശോക്​ പറഞ്ഞു. കുട്ടികളുടെ മൊഴി രേഖപ്പെടുത്തിയതായും സി.സി.ടി.വി ദൃശ്യങ്ങൾ പരിശോധിച്ച്​ വരികയാണെന്നും പൊലീസ്​ പറഞ്ഞു.

പെൺകുട്ടിയുടെ മൃതദേഹം അഴുകാൻ തുടങ്ങിയിരുന്നതിനാൽ തിരിച്ചറിയാൻ സാധിച്ചിട്ടില്ല. പെൺകുട്ടിയെ തിരിച്ചറിയാൻ പ്രത്യേക അന്വേഷണ സംഘത്തെ നിയോഗിച്ചിട്ടുണ്ടെന്നും ഡി.സി.പി അറിയിച്ചു.

സംഭവത്തിൽ പൊലീസ്​ കേസ്​ രജിസ്റ്റർ ചെയ്​തു. കൊലപാതകം, ബലാത്സംഗം തുടങ്ങിയ കുറ്റങ്ങൾ ചുമത്തിയാണ്​ കേസ്​.