ടെലഗ്രാം ഗ്രൂപ്പിൽ 100രൂപക്ക്​ പ്രവേശനം; കുട്ടികളുടെ അശ്ലീല ചിത്രങ്ങൾ വിൽപന നടത്തിയ 23കാരൻ അറസ്റ്റിൽ

ഹൈദരാബാദ്​: സമൂഹമാധ്യമങ്ങളിലൂടെ കുട്ടികളുടെ അശ്ലീല ചിത്രങ്ങൾ വിൽപ്പന നടത്തിയ 23കാരൻ അറസ്റ്റിൽ. ​സോഫ്​റ്റ്​വെയർ കമ്പനിയിലെ ജോലിക്കാരനായ​ വാങ്കല മധുകർ റെഡ്ഡിയാണ്​ അറസ്റ്റിലായത്​.

തെലങ്കാന പൊലീസിന്‍റെ വനിത സുരക്ഷ സംഘത്തിലെ സൈബർ പട്രോളിങ്​ ടീമാണ്​ മധുകറിനെ പിടികൂടിയത്​. കരീംനഗർ ജില്ലയിലെ നുസ്​തുലപൂരിലെ വീട്ടിൽനിന്ന്​​ ഇയാളെ​ പൊലീസ്​ അറസ്​റ്റ്​ ചെയ്യുകയായിരുന്നു​. മൊബൈൽ ഫോണും ലാപ്​ടോപ്പും പിടിച്ചെടുത്തു.

സമൂഹമാധ്യമങ്ങളിലൂടെ കുട്ടികളുടെ അശ്ലീല ചിത്രങ്ങൾ വിൽപ്പന നടത്തുവെന്ന പരാതി ലഭിച്ചതോടെ പ്രത്യേക സംഘത്തെ നിയോഗിച്ചായിരുന്നു അന്വേഷണം. തുടർന്ന്​ തിമ്മാപൂരിലെ എൽ.എം.ഡി പൊലീസ്​ സ്​റ്റേഷനിൽ കേസ്​ രജിസ്റ്റർ ചെയ്യുകയായിരുന്നു.

അശ്ലീലചിത്രങ്ങൾ സ്​ഥിരമായി കാണുന്ന വ്യക്തിയായിരുന്നു റെഡ്ഡി. ഇന്‍റർനെറ്റിലെ വിവിധ സൈറ്റുകളിൽനിന്ന്​ അശ്ലീല വിഡിയോകൾ ഡൗൺലോഡ്​ ചെയ്​തായിരുന്നു വിൽപ്പന. ക്യൂആർ കോഡ്​ വഴി പണം വാങ്ങിയ ശേഷം ഇവർക്ക്​ വിഡിയോകൾ അയച്ചുനൽകും. പേരും വിലാസവും വെളിപ്പെടുത്താതെയായിരുന്നു വിൽപ്പന.

ടെലഗ്രാമിൽ ഒരു ഗ്രൂപ്പും ഇയാൾ തയാറാക്കിയിരുന്നു. 100 രൂപ പ്രവേശന ഫീസായി നൽകിയാൽ ഗ്രൂപ്പിൽ പ്രവേശനം നൽകും. ഇതുവഴി 1000ത്തിൽ അധികം വിഡിയോകൾ ഷെയർ ചെയ്​തിരുന്നുവെന്നും പൊലീസ്​ പറയുന്നു.