കൂടൽ ബിവറേജസ്​ സാമ്പത്തിക തട്ടിപ്പ്: മുഖ്യപ്രതിയായ ക്ലർക്ക് കീഴടങ്ങി

കോന്നി: കൂടൽ ബിവറേജസ് ഔട്ട്‌ലറ്റിൽനിന്ന്​ പണംതട്ടിയ സംഭവത്തിൽ ഒന്നാംപ്രതി അരവിന്ദ് ശനിയാഴ്ച ഉച്ചകഴിഞ്ഞ്​ പത്തനംതിട്ട കോടതിയിൽ കീഴടങ്ങി. കൂടൽ ബിവറേജസ് ഔട്ട്‌ലറ്റിൽ ക്ലർക്കായിരുന്നു. കഴിഞ്ഞ ആറുമാസമായി ഔട്ട്‌ലറ്റിൽനിന്ന്​ ബാങ്കിൽ അടക്കാൻ കൊണ്ടുപോയ തുകയിൽ ഓഡിറ്റിങ്‌ വിഭാഗം വലിയ ക്രമക്കേട് കണ്ടെത്തിയതിനെത്തുടർന്ന് ജില്ല ഓഫിസർ നൽകിയ പരാതിയുടെ അടിസ്ഥാനത്തിലായിരുന്നു നടപടി.

81.6 ലക്ഷം രൂപയാണ് തട്ടിയെടുത്തത്. ഈ പണം അരവിന്ദ് ഓൺലൈൻ ചൂതാട്ടത്തിനായാണ് ഉപയോഗിച്ചതെന്നും അന്വേഷണത്തിൽ കണ്ടെത്തിയിരുന്നു. അരവിന്ദായിരുന്നു അതത് ദിവസത്തെ തുക ബാങ്കിൽ അടക്കാൻ പോയിരുന്നത്. തട്ടിപ്പുമായി ബന്ധപ്പെട്ട് ഔട്ട്‌ലറ്റിലെ ഏഴ്​ ജീവനക്കാർക്കെതിരെയും നടപടി സ്വീകരിച്ചിട്ടുണ്ട്.

ആദ്യ ഘട്ടത്തിൽ മാനേജർ കൃഷ്ണകുമാർ, അരവിന്ദ് എന്നിവരെ സസ്പെൻഡ്​ ചെയ്തിരുന്നു. തുടർന്ന് മേൽനോട്ടത്തിൽ വീഴ്ചവരുത്തിയ ഓഡിറ്റ് വിഭാഗം മാനേജർ രഞ്ജിത്ത്, അസി. മാനേജർ ആനന്ദ്, സീനിയർ അസി. ടി.ആർ. കിരൺ, അസിസ്റ്റന്റുമാരായ സുധിൻ രാജ്, ഷാനവാസ് ഖാൻ എന്നിവരെ വിവിധ ഔട്ട്‌ലറ്റുകളിലേക്കും സ്ഥലംമാറ്റിയിരുന്നു.