കർണാടകയിൽ ബി.ജെ.പി എം.എൽ.എയുടെ ഫോർച്യൂണർ കാറും താർ ജീപ്പും തീയിട്ട്​ നശിപ്പിച്ചു

ബംഗളൂരു: കർണാടക ബി.ജെ.പി എം.എൽ.എ സതീഷ്​ റെഡ്ഡിയുടെ കാറും ജീപ്പും അജ്ഞാതർ തീയിട്ട്​ നശിപ്പിച്ചു. ബുധനാഴ്ച രാത്രിയാണ്​ സംഭവം.

ബൊമ്മനഹള്ളി ബി.ജെ.പി എം.എൽ.എയാണ്​ സതീഷ്​ റെഡ്ഡി. രാത്രി 1.25ഓടെയെത്തി കാറിന്​ തീവെച്ചശേഷം 1.28ഓടെ അക്രമിസംഘം സംഭവ സ്​ഥലത്തുനിന്ന്​ കടന്നുകളയുകയായിരുന്നു.

റെഡ്ഡിയുടെ ഫോർച്യൂണർ കാറും മഹീന്ദ്രയുടെ താർ ജീപ്പുമാണ്​ തീയിട്ട്​ നശിപ്പിച്ചവ. രാത്രി ഒന്നരതോടെ വാഹനങ്ങളുടെ ബാറ്ററി പൊട്ടിത്തെറിച്ചതിന്‍റെ ശബ്​ദം കേട്ട്​ ഞെട്ടിയുണർന്ന് നോക്കു​േമ്പാൾ കാറും ജീപ്പും കത്തുകയായിരുന്നു. തുടർന്ന്​ വാച്ച്​മാനും പൊലീസുകാരും താനും ചേർന്ന്​ തീയണക്കുകയായിരുന്നുവെന്നും എം.എൽ.എ പറഞ്ഞു.

അക്രമത്തിന്‍റെ സി.സി.ടി.വി ദൃശ്യങ്ങൾ പൊലീസ്​ ശേഖരിച്ചു. കേസ്​ അ​േന്വഷിക്കാൻ പൊലീസിന്‍റെ പ്രത്യേക സംഘത്തെ ചുമതലപ്പെടുത്തിയതായും പൊലീസ്​ പറഞ്ഞു.