ബ്രൂവറി അഴിമതിക്കേസ്: ഫയലുകൾ ഹാജരാക്കാൻ സർക്കാറിന്​ നിർദേശം നൽകണമെന്ന് ചെന്നിത്തല

തിരുവനന്തപുരം: ബ്രൂവറി അഴിമതിക്കേസിൽ ലൈസൻസ്​ നൽകിയതുമായി ബന്ധപ്പെട്ട ഫയലുകൾ ഹാജരാക്കാൻ സർക്കാറിന്​ നിർദേശം നൽകണമെന്ന ആവശ്യവുമായി രമേശ്‌ ചെന്നിത്തല എം.എൽ.എ കോടതിയിൽ ഹരജി നൽകി. ചെന്നിത്തലയുടെ ആവശ്യം നിയമപരമായി നിലനിൽക്കുന്നതല്ലെന്ന്​ വിജിലൻസ് വാദിച്ചു. വാദം തള്ളിയ കോടതി തർക്കഹരജി സമർപ്പിക്കാൻ വിജിലൻസിന് നിർദേശം നൽകി. തിരുവനന്തപുരം പ്രത്യേക വിജിലൻസ് കോടതി ജഡ്ജി ജി. ഗോപകുമാറി​ന്‍റേതാണ് ഉത്തരവ്.

ബ്രൂവറിക്ക് ലൈസൻസ് നൽകിയ സമയത്തുള്ള സർക്കാർ ഫയലുകൾ കോടതിയിൽ ഹാജരാക്കാൻ നികുതിവകുപ്പ് പ്രിൻസിപ്പൽ സെക്രട്ടറിക്ക് നിർദേശം നൽകണമെന്നാവശ്യപ്പെട്ടാണ്​ ചെന്നിത്തല കോടതിൽ അപേക്ഷ സമർപ്പിച്ചത്. എന്നാൽ കേസിൽ കോടതി മൊഴിയെടുക്കുന്ന സമയത്ത് ഫയലുകൾ സാക്ഷിയെ കാണിച്ച്​ രേഖപ്പെടുത്താൻ സാധിക്കില്ലെന്ന്​ വിജിലൻസ് ലീഗൽ അഡ്വൈസർ ശൈലജൻ വാദിച്ചു. കേസിൽ അന്വേഷണം നടക്കേണ്ടതുണ്ടോ എന്ന കാര്യത്തിൽ വരെ നിയമഭേദഗതികൾ തടസ്സമാകുമെന്നും വാദമുയർന്നു.

ക്രിമിനൽ നടപടിച്ചട്ടം അനുസരിച്ച്​ ഒരു വ്യക്തി അപേക്ഷ സമർപ്പിച്ചാൽ അതിന്മേൽ നടപടിയെടുക്കണമെന്ന്​ കോടതി മറുപടി നൽകി. അന്വേഷണം വേണോ, വേണ്ടേ എന്നത്​ വിധി വന്നതിന് ശേഷമേ പറയാൻ കഴിയൂ. ഇപ്പോൾ നടപടികൾ അതിന്‍റെ വഴിക്ക് പോക​േട്ടയെന്നും കോടതി വിശദീകരിച്ചു.

കഴിഞ്ഞതവണ കേസ്​ പരിഗണിച്ചപ്പോൾ രമേശ്‌ ചെന്നിത്തലയുടെ മൊഴിയെടുത്തശേഷം മുൻ മന്ത്രിമാരെ സാക്ഷികളായി വിസ്തരിക്കാൻ സമൻസ് നൽകിയിരുന്നു. ഇതനുസരിച്ച്​ വി.എസ്. സുനിൽകുമാറിന്‍റെ അഭിഭാഷകൻ കോടതിൽ ഹാജരായി. എന്നാൽ ഇ.പി. ജയരാജനയച്ച സമൻസ്​ മടങ്ങിവരാത്തതിനാൽ ജഡ്ജി തപാൽ വകുപ്പിനോട് റിപ്പോർട്ട്‌ ആവശ്യപ്പെട്ടു. മേയ്​ 21ന്​ കേസ്​ വീണ്ടും പരിഗണിക്കും.

മുഖ്യമന്ത്രി പിണറായി വിജയൻ, മുൻ എക്‌സൈസ് മന്ത്രി ടി.പി. രാമകൃഷ്‌ണൻ, മുൻ എക്‌സൈസ് കമീഷണർ ഋഷിരാജ് സിങ്, ബ്രൂവറി-ഡിസ്റ്റിലറി അനുമതി ലഭിച്ച ജില്ലകളിലെ ഡെപ്യൂട്ടി കമീഷണർമാർ എന്നിവർക്കെതിരെ അഴിമതി നിരോധന നിയമ പ്രകാരം കേസെടുക്കണമെന്നാണ് ഹരജിയിലെ ആവശ്യം.