20 ദിവസം ഭക്ഷണം നൽകാതെ മകൻ വീട്ടിൽ പൂട്ടിയിട്ട വയോധിക മരിച്ചു

ബറേലി: ഉത്തർപ്രദേശിലെ പിലിഭിത്തിൽ മകൻ 20 ദിവസം ഭക്ഷണം നൽക​ാതെ വീട്ടിൽ പൂട്ടിയിട്ട വയോധിക മരിച്ചു. ബിലാസ്​പൂർ പൊലീസ്​ സ്​റ്റേഷൻ പരിധിയിൽ ദുർഗ പ്രസാദ്​ പ്രദേശത്താണ്​ സംഭവം.

63കാരിയായ ലീല ദേവിയാണ്​ മരിച്ചത്​. സമീപവാസികൾക്ക്​ സംശയം തോന്നിയതിനെ തുടർന്ന്​ പൊലീസിനെ വിവരം അറിയിക്കുകയായിരുന്നു. തുടർന്ന്​ പൊലീസെത്തി 63കാര​ിയെ രക്ഷപ്പെടുത്തുകയും ആശുപത്രിയിൽ പ്രവേശിപ്പിക്കുകയും ചെയ്​തു. ജില്ല ആശുപത്രിയിൽ ചികിത്സയിലായിരുന്നു ഇവർ പിന്നീട്​ മരിച്ചു.

27കാരനായ മകൻ പങ്കജ്​ കുമാർ 20 ദിവസം മുമ്പ്​ വയോധികയെ വീട്ടിൽ പൂട്ടിയിടുകയായിരുന്നുവെന്ന്​ സമീപവാസികൾ പറയുന്നു. സോറിയാസിസ്​ ബാധിച്ച്​ കിടപ്പിലായിരുന്ന ഇവർക്ക്​ ഭക്ഷണവും ലഭിച്ചിരുന്നില്ല.

ദേവിയും മകനും മാത്രമാണ്​ വീട്ടിൽ താമസം. ജോലി ആവശ്യങ്ങൾക്കായി കുമാർ മിക്ക ദിവസങ്ങളിലും വീട്ടിൽ ഉണ്ടാകാറില്ല. മകനായി തെര​ച്ചിൽ ആരംഭിച്ചതായും പൊലീസ്​ അറിയിച്ചു.

അയൽവാസിയായ മനീഷ്​ കുമാർ വിവരം അറിയിച്ചതിനെ തുടർന്ന്​ ഇവരുടെ വീട്ടിലെത്തിയപ്പോൾ ബോധമില്ലാത്ത നിലയിലായിരുന്നെന്ന്​ പൊലീസ്​ പറഞ്ഞു. ആദ്യം പ്രാഥമിക ആരോഗ്യ കേന്ദ്രത്തിൽ ഇവരെ പ്രവേശിപ്പിച്ചു. പിന്നീട്​ ജില്ല ആശുപത്രിയിലേക്ക്​ മാറ്റി. ചികിത്സ നൽകിയെങ്കിലും ജീവൻ രക്ഷിക്കാൻ സാധിച്ചില്ല. മകനായി തെര​ച്ചിൽ ആരംഭിച്ചതായും പൊലീസ്​ പറഞ്ഞു.

അയൽവാസികൾ ദേവിക്ക്​ ജനലിലൂടെ ഭക്ഷണം നൽകാൻ ശ്രമിച്ചിരുന്നതായും പറയുന്നു. അതേസമയം പോസ്റ്റ്​മോർട്ടം റിപ്പോർട്ട്​ വന്നാൽ മാത്രമേ കൂടുതൽ വിവരങ്ങൾ ലഭ്യമാകൂവെന്ന്​ പൊലീസ്​ അറിയിച്ചു.