തമിഴ് ചലച്ചിത്ര നിർമാതാവ് കൊല്ലപ്പെട്ടു; മൃതദേഹം പ്ലാസ്റ്റിക് കവറിൽ

ചെന്നൈ: തമിഴ് ചലച്ചിത്ര നിർമാതാവ് കൊല്ലപ്പെട്ട നിലയിൽ. നിർമാതാവ് ഭാസ്കരനെയാണ് കൊല്ലപ്പെട്ട നിലയിൽ കണ്ടെത്തിയത്. ചിന്മയ നഗറിലെ കനാലിന് സമീപത്ത് നിന്നും പ്ലാസ്റ്റിക് കവറിലാക്കിയ നിലയിലാണ് മൃതദേഹം കണ്ടെത്തിയത്.

മൃതദേഹം അടങ്ങിയ ബാഗ് തൊഴിലാളികളാണ് കണ്ടത്. ഉടൻ പൊലീസിനെ വിവരമറിയിക്കുകയായിരുന്നു. റിയൽ എസ്റ്റേറ്റ് ബിസിനസ് ചെയ്യുന്ന ഭാസ്കരന്‍ രണ്ട് സിനിമകൾ നിർമിച്ചിട്ടുണ്ട്. നുങ്കമ്പാക്കത്തെ ഹോട്ടലിലേക്കെന്ന് പറഞ്ഞ് പോയ ഭാസ്കരന്‍ മടങ്ങിയെത്താത്തതിനെ തുടർന്ന് വീട്ടുകാർ കാണാനില്ലെന്ന് പരാതി നൽകിയിരുന്നു. മൃതദേഹം കണ്ടെത്തിയ സ്ഥലത്തിന് ഏതാനും മീറ്റർ അകലെ റോഡരികിൽ ഉപേക്ഷിച്ച നിലയിൽ ഭാസ്കരന്‍റെ കാറും പൊലീസ് കണ്ടെത്തി.

വടപളനിയിലെ എ.ടി.എമ്മിൽ നിന്ന് വെള്ളിയാഴ്ച ഭാസ്കരൻ 20,000 രൂപ പിൻവലിച്ചതായി പൊലീസ് കണ്ടെത്തിയിട്ടുണ്ട്. സാമ്പത്തിക പ്രശ്‌നമാണോ കൊലപാതകത്തിന് പിന്നിലെന്നും പൊലീസ് അന്വേഷിക്കുന്നുണ്ട്. അതേസമയം ഇദ്ദേഹത്തിന്റെ മൊബൈൽ ഫോൺ കണ്ടെത്താനായിട്ടില്ല.