നായ് വിൽപനയുടെ പേരിൽ 86,000 രൂപ തട്ടി; മൂന്ന്​ പേർക്ക്​ മൂന്ന്​ മാസം തടവ്​ ശിക്ഷ

ദുബൈ: നായെ വിൽക്കാനുണ്ടെന്ന്​ കാണിച്ച്​ ഓൺലൈൻ ക്ലാസിഫൈഡ്​സ്​ വെബ്​സൈറ്റായ ഡുബിസ്​ൽ വഴി തട്ടിപ്പ്​ നടത്തിയ മൂന്ന്​ പേർക്ക്​ തടവും പിഴയും. 'ഗോൾഡൻ റിട്രീവൽ' ഇനത്തിൽപെട്ട നായയെ വിൽക്കാനുണ്ടെന്ന്​ കാണിച്ചാണ്​ 4,000 ദിർഹം (86000 രൂപ) തട്ടിയത്​. എന്നാൽ, പണം കൈപ്പറ്റിയ ശേഷം ഇവർ നായയെ കൈമാറാതെ മുങ്ങുകയായിരുന്നു. ഇവർക്ക്​ മൂന്ന്​ മാസം തടവ്​ വിധിച്ച കോടതി 4000 ദിർഹം തിരി​കെ നൽകണമെന്നും നിർദേശിച്ചു. ശിക്ഷക്ക്​ ശേഷം ഇവരെ നാടുകടത്തും.

ഡുബിസിലിലെ പരസ്യം ശ്രദ്ധയിൽപെട്ടതിനെ തുടർന്നാണ്​ പരാതിക്കാരൻ​ ഇവരുമായി വാട്​സാപ്പ്​ വഴി ബന്ധപ്പെട്ടത്​. നായയുടെ ചിത്രങ്ങളും വീഡിയോയും തട്ടിപ്പുകാർ അയച്ചുകൊടുക്കുകയും ചെയ്തു. 3,000 ദിർഹമായിരുന്നു വിലയിട്ടിരുന്നത്​. വിലപേശലിനൊടുവിൽ 2,500 ദിർഹമിന്​ സമ്മതിച്ചു. മുൻകൂറായി 1,500 ദിർഹം അടക്കണമെന്ന്​ പറഞ്ഞതിനെ തുടർന്ന്​ ഇവർ നൽകിയ അക്കൗണ്ടിലേക്ക്​ പണം അയച്ചു. അന്ന്​ തന്നെ നായയെ എത്തിക്കുമെന്നായിരുന്നു പറഞ്ഞിരുന്നത്​.

എന്നാൽ, തൊട്ടടുത്ത ദിവസം ഇവർ വീണ്ടും പണം ആവശ്യപ്പെട്ട്​ മറ്റൊരു അക്കൗണ്ട്​ നമ്പർ അയച്ചു. ഡെലിവറി ചെലവിന്‍റെ ഇൻഷ്വറൻസ്​ കവറേജിന്‍റെ ഭാഗമായി 8,000 ദിർഹം കൂടി അയക്കണമെന്നും ഡെലിവറിക്ക്​ ശേഷം ഈ തുക തിരികെ നൽകുമെന്നുമായിരുന്നു വാഗ്ദാനം. ഈ തുക തന്‍റെ കൈയിൽ ഇല്ലെന്നും 2,500 ദിർഹം കൂടി അയച്ചിട്ടുണ്ടെന്നും​ പറഞ്ഞു.

പിന്നീട്​ വിളിച്ചപ്പോൾ ഫോൺ സ്വിച്ച്​ഓഫ്​ ചെയ്ത നിലയിലായിരുന്നു. തുടർന്ന്​ ഇയാൾ ബർദുബൈ പൊലീസ്​ സ്​റ്റേഷനിൽ പരാതി നൽകി. പൊലീസ്​ നടത്തിയ ​അന്വേഷണത്തിൽ ആദ്യം രണ്ട്​ പേർ കുടുങ്ങി. 30 വയസുകാരനായ ഇന്ത്യക്കാരനും 32കാരനായ ഫിലിപ്പൈനിയുമാണ്​ അറസ്റ്റിലായത്​. മൂന്നാമനായി കാമറൂൺ പൗരൻ (29) ഒളിവിലാണ്​. ഇയാൾക്കും തടവ്​ ശിക്ഷ വിധിച്ചിട്ടുണ്ട്​. ഇവർ മറ്റ്​ ഓൺലൈൻ പ്ലാറ്റ്​ഫോം വഴി ഇത്തരം വ്യാജ പരസ്യങ്ങൾ നൽകിയിട്ടുണ്ടെന്ന്​ പൊലീസ്​ കണ്ടെത്തി.