ഓടുന്ന കാറിൽ 18കാരിയെ ഇൻസ്റ്റ സുഹൃത്തും കൂട്ടാളിയും ബലാത്സംഗം ചെയ്തതായി പരാതി

ഫിറോസാബാദ്​: ഉത്തർപ്രദേശിൽ 18കാരിയെ ഓടുന്ന കാറിൽ ഇൻസ്റ്റഗ്രാം സുഹൃത്തും കൂട്ടാളിയും ബലാത്സംഗം ചെയ്​തതായി പരാതി. ആഗ്രയിലെ സിക്കന്ദ്ര പ്രദേശത്ത്​ ഞായറാഴ്​ചയാണ്​​ സംഭവം.

ഇൻസ്​റ്റഗ്രാം വഴി പരിചയപ്പെട്ട 24കാരനായ കൃഷ്ണ ബാഗലാണ്​ ആക്രമണത്തിന്​ പിന്നിൽ. ആറുമാസം മുമ്പാണ്​ പെൺകുട്ടിയും യുവാവും പരിചയത്തിലാകുന്നതെന്നും പൊലീസ്​ പറഞ്ഞു.

പെൺകുട്ടിയെ നേരിട്ട്​ കാണ​ണമെന്ന്​ ആവശ്യപ്പെട്ട്​ വിളിച്ചുവരുത്തിയ ശേഷമായിരുന്നു ആക്രമണം. സുഹൃത്ത്​ ഹേമന്ത്​ കുമാറും പെൺകുട്ടിയെ ബലാത്സംഗം ചെയ്തു.

ഇരുവരും ചേർന്ന്​ മദ്യം കഴിക്കാൻ നിർബന്ധിച്ചു. വിസമ്മതിച്ചതോടെ കാറിന്‍റെ ഡോറിലേക്ക്​ തല ഇടിപ്പിക്കുകയും ശേഷം വായിലേക്ക്​ മദ്യം ഒഴിച്ചുവെന്നും പെൺകുട്ടി പറയുന്നു.

സഹോദരിയോട്​ പങ്കുവെച്ചതോടെയാണ്​ ബലാത്സംഗ വിവരം പുറത്തറിയുന്നത്​. പിന്നീട്​ പൊലീസ്​ സ്​റ്റേഷനിൽ പരാതി നൽകുകയായിരുന്നു. ഇരുവരും ബലാത്സംഗത്തിന്‍റെ വിഡിയോ പകർത്തിയതായും വിവരം പുറത്തുപറഞ്ഞാൽ സമൂഹമാധ്യമങ്ങളിൽ പങ്കുവെക്കുമെന്ന്​ ഭീഷണിപ്പെടുത്തിയതായും പരാതിയിൽ പറയുന്നു.

ബലാത്സംഗത്തിന്​ ശേഷം മാനസിക വിഷമത്തിലായിരുന്ന പെൺകുട്ടി ഉറക്കഗുളിക കഴിച്ച്​ ആത്മഹത്യക്ക്​ ശ്രമിച്ചതായി സഹോദരൻ പറയുന്നു. സംഭവത്തിൽ പൊലീസ്​ കേസെടുക്കുകയും രണ്ടുപേരെ പിടികൂടുകയും ചെയ്തു. സംഭവ സമയത്തെ സി.സി.ടി.വി ദൃശ്യങ്ങൾ പരിശോധിച്ച്​ വരികയാണ്​ പൊലീസ്​.