കൊലക്കേസ്​ പ്രതിയായ ഭർത്താവിനെ രക്ഷപ്പെടുത്താൻ പൊലീസിന്​ നേരെ മുളകുപൊടി എറിഞ്ഞ്​ യുവതി

ഹൈദരാബാദ്​: തെലങ്കാനയിൽ കൊലക്കേസ്​ പ്രതിയായ ഭർത്താവിനെ രക്ഷപ്പെടുത്താൻ പൊലീസിന്​ നേരെ മുളകുപൊടി എറിഞ്ഞതിന്​ യുവതിക്കെതിരെ കേസ്. തെലങ്കാനയിലെ അട്ടാപൂർ പ്രദേശത്താണ്​ സംഭവം.

2019ലെ ഒരു കൊലക്കേസിലെ പ്രതിയാണ്​ വസീം. പൊലീസ്​ അന്വേഷണത്തിൽ അട്ടാപുരിലെ സുലൈമാൻ നഗറിൽ വസീം താമസിക്കുന്നുണ്ടെന്ന വിവരം പൊലീസിന്​ ലഭിക്കുകയായിരുന്നു. തുടർന്ന്​ ഉത്തരാഖണ്ഡ്​ പൊലീസിന്‍റെ പ്രത്യേക സംഘം വസീമിന്‍റെ വീട്ടിലെത്തി. രാജേന്ദ്രനഗർ സ്​റ്റേഷനിലെ മൂന്ന്​ പൊലീസുകാരും ഇവർക്കൊപ്പമുണ്ടായിരുന്നു.

ഭർത്താവിനെ പിടികൂടാൻ പൊലീസ്​ എത്തിയ​വിവരം അറിഞ്ഞതോടെ ശമീം പർവീൺ ഇവർക്കുനേരെ മുളകുപൊടി എറിയുകയായിരുന്നു. പിന്നീട്​ പൊലീസ്​ അപമര്യാദയായി പെരുമാറുന്നുവെന്ന്​ ആരോപിച്ച്​ അയൽവാസി​കളെ വിവരം അറിയിക്കുകയും ചെയ്തതായി പൊലീസ്​ പറഞ്ഞു. ഇതിനിടെ ഭർത്താവ്​ വസീം സ്ഥലത്തുനിന്ന്​ രക്ഷപ്പെട്ടിരുന്നു. സംഭവത്തിൽ ശമീം പർവീണിനെതിരെ പൊലീസ്​ കേസ്​ രജിസ്​റ്റർ ചെയ്തു. കൃത്യനിർവഹണം തടസപ്പെടുത്തിയതിനാണ്​ കേസ്​.