യു.പി സ്​കൂളിൽ പ്രാക്​ടിക്കൽ പരീക്ഷയുടെ പേരിൽ വിളിച്ചുവരുത്തി 10ാംക്ലാസ്​ വിദ്യാർഥിനികളെ ബലാത്സംഗം ചെയ്​തതായി പരാതി

ലഖ്​നോ: ഉത്തർപ്രദേശിലെ സ്​കൂളിൽ വിദ്യാർഥിനികളെ സ്​കൂൾ അധികൃതർ ബലാത്സംഗം ചെയ്​തു. പത്താം ക്ലാസ്​ വിദ്യാർഥിനികളായ 17 പേരെയാണ് അധ്യാപകനും സ്​കൂൾ ഉടമയും ചേർന്ന്​ ബലാത്സംഗം ചെയ്​തത്​. നവംബർ 17ന്​ മുസഫർനഗറിലെ സ്വകാര്യ സ്​കൂളിലാണ്​ സംഭവം.

സി.ബി.എസ്​.ഇ പ്രാക്​ടിക്കൽ പരീക്ഷയുടെ പേരിൽ 17 വിദ്യാർഥിനികളോട്​ രാത്രി സ്​കൂളിൽ നിൽക്കാൻ പ്രതികൾ ആവശ്യപ്പെടുകയായിരുന്നു. വിദ്യാർഥിനികൾക്ക്​ നൽകിയ ഭക്ഷണത്തിൽ മയക്കുഗുളിക കലർത്തുകയും ശേഷം സ്​കൂൾ ഉടമ ബലാത്സംഗം ചെയ്യുകയുമായിരുന്നു. തൊട്ടടുത്ത ദിവസമാണ്​ കുട്ടികളെ വീട്ടിലേക്ക്​ പറഞ്ഞയച്ചത്​.

സംഭവം പുറത്തുപറഞ്ഞാൽ കുട്ടികളെയും കുടുംബത്തെയും കൊലപ്പെടുത്തുമെന്ന്​ ഭീഷണിപ്പെടുത്തുകയും ചെയ്​തു. പാവപ്പെട്ട കുടുംബത്തിലെ വിദ്യാർഥികളാണ്​ എല്ലാവരും.

രണ്ടു പെൺകുട്ടികളുടെ മാതാപിതാക്കൾ പുർകാസി എം.എൽ.എയായ പ്രമോദ്​ ഉദ്​വാളിന്‍റെ അടുത്ത്​ പരാതിയുമായി എത്തിയതോടെയാണ്​ സംഭവം പുറത്തറിയുന്നത്​. എം.എൽ.എ ​മുതിർന്ന പൊലീസ്​ സൂപ്രണ്ട്​ അഭിഷേക്​ യാദവിനെ വിവരം അറിയിക്കുകയും അന്വേഷണത്തിന്​ ഉത്തരവിടുകയുമായിരുന്നു. നിരവധി തവണ പൊലീസിൽ പരാതി നൽകാൻ ശ്രമിച്ചിട്ടും കേസെടുക്കാത്തതിനാലാണ്​​ എം.എൽ.എയെ സമീപിച്ചതെന്ന്​ കുടുംബം പറഞ്ഞു.

സ്​കൂളിന്‍റെ ഉടമക്കെതിരെയും പ്രാക്​ടിക്കൽ പരീക്ഷക്ക്​ വിളിച്ചുവരുത്തിയ അധ്യാപകനെതിരെയും ​കേസെടുത്തു. ഇതിലൊരാളെ പൊലീസ്​ അറസ്റ്റ്​ ചെയ്​തു. മാതാപിതാക്കളുടെ പരാതിയിൽ പൊലീസ്​ കേസെടുക്കാത്തതിൽ വകുപ്പുതല അന്വേഷണവും പ്രഖ്യാപിച്ചു.