പൊലീസ് മർദിച്ചു കൊന്നതാണെന്ന്​ പിതാവ്​; സി.ബി.ഐ അന്വേഷണം ആവശ്യപ്പെട്ട്​ ഹൈകോടതിയിൽ ഹരജി

കൊച്ചി: കുമരകത്ത് പൊലീസ്​ പിന്തുടർന്ന യുവാവിനെ കാനയിൽ മരിച്ച നിലയിൽ കണ്ടെത്തിയ സംഭവത്തിൽ സി.ബി.ഐ അന്വേഷണമടക്കം ആവശ്യപ്പെട്ട്​ ഹൈകോടതിയിൽ പിതാവിന്‍റെ ഹരജി. ​കോട്ടയം വെച്ചൂർ അച്ചിനകം സ്വദേശി ജിജോ ആൻറണിയെ (27) പൊലീസ് കൊന്നതാണെന്നും പൊലീസ്​ അന്വേഷണം കാര്യക്ഷമമല്ലെന്നും ആരോപിച്ചാണ്​ പിതാവ്​ ആൻറണി ഹൈകോടതിയെ സമീപിച്ചിരിക്കുന്നത്​. ഹരജി പരിഗണിച്ച ജസ്​റ്റിസ്​ കെ. ഹരിപാൽ സർക്കാറിന്‍റെ വിശദീകരണം തേടി.

നവംബർ ഏഴിന്​ രാത്രി കുമരകം ചക്രംപടിക്ക് സമീപം വെച്ച്​ ജില്ല പൊലീസ്​ മേധാവിയുടെ ​ഡ്രൈവറെ തടഞ്ഞുവെക്കുകയും അസഭ്യം പറയുകയും ചെയ്​തുവെന്ന പേരിൽ ജ​ിജോയെ പൊലീസ്​ പിന്തുടർന്നെന്ന്​ ഹരജിയിൽ പറയുന്നു. തൊട്ടടുത്ത ഹോട്ടലിൽ കയറിയ ജിജോക്ക്​ പിന്നാലെ പൊലീസും വന്നു. പിന്നീട്​ ഹോട്ടലിന്​ പിന്നിലെ കാനയിൽ മരിച്ച നിലയിലാണ്​ കണ്ടെത്തിയത്.

പൊലീസിന്‍റെ അടിയേറ്റാണ്​ മരണമെന്നാണ്​ ഹരജിയിൽ ആരോപിക്കുന്നത്​. മുങ്ങിമരിച്ചതാണെന്നാണ്​ പോസ്​റ്റ്​മോർട്ടം റിപ്പോർട്ട്​. എന്നാൽ, മൃതദേഹത്തിൽ കണ്ട പാടുകൾ പൊലീസ്​ മർദിച്ചതിനെ തുടർന്ന്​ ഉണ്ടായതാണ്​. ഒരടി മാത്രമാണ്​ കാനയുടെ ആഴം. ഒരു കാരണവശാലും മുങ്ങിമരണമാണെന്ന്​ വിശ്വസിക്കാനാവില്ല. പൊലീസിനെ ഭയന്ന്​ ആരും സത്യം പറയാൻ തയാറാകുന്നില്ല. പിറ്റേ ദിവസം യുവാവിനെതിരെ പൊലീസ്​ കേസും രജിസ്​റ്റർ ചെയ്​തിട്ടുണ്ട്​.

വിപുലമായ അന്വേഷണം ആവശ്യപ്പെട്ട്​ ഡി.ജി.പിക്ക്​ പരാതി നൽകിയെങ്കിലും നടപടിയുണ്ടായില്ല. ഈ സാഹചര്യത്തിലാണ്​ ഹൈകോടതിയെ സമീപിച്ചിരിക്കുന്നത്​.