ദലിത്​ യുവാവിനെ വിവാഹം കഴിച്ച 24കാരിയെ ശുദ്ധികലശത്തിന്​ വിധേയമാക്കിയതായി പരാതി

ഭോപാൽ: മധ്യപ്രദേശിൽ ദലിത്​ യുവാവിനെ വിവാഹം കഴിച്ച 24കാരിയെ മാതാപിതാക്കൾ ബലമായി ശുദ്ധികലശത്തിന്​ വിധേയമാക്കിയതായി പരാതി. ബേട്ടൂൽ ജില്ലയിലാണ്​ സംഭവം.

യുവതിയുടെ മുടി മുറിക്കുകയും ധരിച്ചിരുന്ന വസ്​ത്രം ഉപേക്ഷിച്ച്​ നർമദ നദിയിൽ കുളിക്കാൻ നിർബന്ധിച്ചതായും കോട്​വാലി ബേട്ടുൽ പൊലീസ്​ പറഞ്ഞു.

2020 മാർച്ച്​ 11നായിരുന്നു 24കാരിയായ സാക്ഷി യാദവിന്‍റെയും 27കാരനായ അമിത്​ ആശിർവാറിന്‍റെയും വിവാഹം. ആര്യസമാജ്​ ക്ഷേത്രത്തിൽവെച്ച്​ നടത്തിയ വിവാഹത്തെക്കുറിച്ച്​ യുവതിയുടെ മാതാപിതാക്കൾക്ക്​ അറിവുണ്ടായിരുന്നില്ല. 2021 ജനുവരി നാലിന്​ വിവാഹക്കാര്യം പിതാവിനെ അറിയിച്ചു. എന്നാൽ, 2021 ജനുവരി 10ന്​ മകളെ കാണാനി​െല്ലന്ന്​ ചൂണ്ടിക്കാട്ടി ​പിതാവ്​ പൊലീസിൽ പരാതി നൽകുകയായിരുന്നു.

ഇതോടെ ചോപ്​ന പൊലീസ്​ യുവതിയെയും യുവാവിനെയും സ്​റ്റേഷനിലേക്ക്​ വിളിപ്പിക്കുകയും യുവതിയെ മാതാപിതാക്കൾക്കൊപ്പം വിടുകയുമായിരുന്നു. വെള്ളപേപ്പറിൽ ഒപ്പുവെപ്പിച്ചതായും യുവതി പറയുന്നു.

ഫെബ്രുവരിയിൽ നഴ്​സിങ്​ പഠനം പൂർത്തിയാക്കുന്നതിനായി സാക്ഷി രാജ്​ഗഡ്​ ജില്ലയിലെ ഹോസ്റ്റലിലേക്ക്​ പോയി. അവിടെനിന്ന്​ ആഗസ്റ്റ്​ 18ന്​ രക്ഷാബന്ധൻ ആഘോഷിക്കാനെന്ന പേരിൽ സാക്ഷിയെ വീട്ടുകാർ കൂട്ടിക്കൊണ്ടുവരികയായിരുന്നു. തുടർന്ന്​ ഹോഷങ്കബാദിലെ നർമദ നദിക്ക്​ സമീപം എത്തിക്കുകയും ശുദ്ധീകരണം നടത്തുകയുമായിരുന്നു.

മറ്റുള്ളവരുടെ മുമ്പി​ൽവെച്ച്​ പാതിനഗ്​നയാക്കി നദിയിൽ മുക്കിയെന്നും പറയുന്നു. വ്യാഴാഴ്ച സാക്ഷി ഹോസ്റ്റലിൽനിന്ന്​ ഭർത്താവിന്‍റെ അടുത്തേക്ക്​ എത്തുകയായിരുന്നു. കുടുംബം തങ്ങളെ അപായപ്പെടുത്തുമെന്നും പൊലീസ്​ സംരക്ഷണം വേണമെന്നും ആവശ്യപ്പെട്ടു.

വിവാഹത്തിന്​ ശേഷം നിരവധി തവണ ബന്ധുക്കളിൽനിന്ന്​ ഭീഷണി സന്ദേശം ലഭിച്ചതായും മറ്റൊരാളെ വിവാഹം കഴിക്കാൻ നിർബന്ധിച്ചതായും യുവതിയുടെ പരാതിയിൽ പറയുന്നു. യുവതിയുടെ പരാതിയിൽ ഭർത്താവിനും മൂന്നു ബന്ധുക്കൾക്കുമെതിരെ പൊലീസ്​ കേസെടുത്തു.