കോടതിക്ക് മുന്നിലിട്ട് കൊലക്കേസ് പ്രതിയെ വെട്ടിക്കൊന്നു; പ്രതികൾ പിടിയിൽ

ചെന്നൈ: കോടതിയിൽ ഹാജരാക്കാൻ കൊണ്ടുവന്ന കൊലക്കേസ് പ്രതിയെ പ്രതിയെ ഏഴംഗ സംഘം വെട്ടിക്കൊന്നു. തമിഴ്‌നാട് കീഴനത്തം സ്വദേശി മായാണ്ടി(25)യെയാണ് വെട്ടിക്കൊന്നത്.

തിരുനെല്‍വേലി ജില്ലാകോടതി കവാടത്തിന് മുന്നിലായിരുന്നു സംഭവം. സംഭവത്തിൽ നാലുപേരെ പൊലീസ് അറസ്റ്റ് ചെയ്തു. രാമകൃഷ്ണന്‍, മനോരാജ്, ശിവ, തങ്ക മഹേഷ് എന്നിവരാണ് അറസ്റ്റിലായത്. 2023ല്‍ കീഴനത്തം പഞ്ചായത്ത് മെമ്പറായിരുന്ന രാജാമണിയെ കൊലപ്പെടുത്തിയ കേസില്‍ വിചാരണ നേരിടുകയായിരുന്നു കൊല്ലപ്പെട്ട മായാണ്ടി.

രാജാമണി കൊലക്കേസില്‍ അറസ്റ്റിലായ മായാണ്ടി ജാമ്യത്തില്‍ പുറത്തിറങ്ങിയിരുന്നു. കേസില്‍ ഹാജരാകുന്നതിനാണ് വെള്ളിയാഴ്ച കോടതിയിലെത്തിയത്. രാവിലെ പത്തുമണിയോടെ കോടതി കവാടത്തിനുമുന്നില്‍ നില്‍ക്കുമ്പോള്‍ കാറിലെത്തിയ സംഘം മായാണ്ടിയെ ആക്രമിക്കുകയായിരുന്നു. ഓടിരക്ഷപ്പെടാന്‍ ശ്രമിച്ചെങ്കിലും പിന്നാലെയെത്തി വെട്ടിയ ശേഷം സംഘം രക്ഷപ്പെടുകയായിരുന്നു.

തൽക്ഷണം മായാണ്ടി മരിക്കുകയായിരുന്നു. ഇതിനുമുന്‍പ് രണ്ടുതവണ മായണ്ടിക്കുനേരേ വധശ്രമമുണ്ടായിട്ടുണ്ട്. ദലിതരും മറ്റുജാതിയില്‍പ്പെട്ടവരും തമ്മിലുള്ള പ്രശ്‌നമാണ് രാജാമണിയുടെയും മായാണ്ടിയുടെയും കൊലപാതകത്തില്‍ കലാശിച്ചതെന്നാണ് പൊലീസ് നിഗമനം.