പെണ്‍കുട്ടിയെ പീഡിപ്പിച്ച്‌ ഗര്‍ഭിണിയാക്കിയ അയല്‍വാസിക്ക്‌​ 81 വർഷം തടവ്​

തൊടുപുഴ: പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച്‌ ഗര്‍ഭിണിയാക്കിയ കേസില്‍ അയല്‍വാസിക്ക്‌ വിവിധ വകുപ്പുകളിലായി 81 വര്‍ഷം തടവും രണ്ടേകാല്‍ ലക്ഷം രൂപ പിഴയും. 2020ൽ കഞ്ഞിക്കുഴി പൊലീസ്​ രജിസ്‌റ്റര്‍ ചെയ്‌ത കേസില്‍ പൈനാവ്‌ സ്‌പെഷല്‍ കോടതിയുടേതാണ്‌ ഉത്തരവ്​.

എട്ടു വയസ്സ്​ മുതല്‍ കുട്ടിയെ പ്രതി നിരന്തരം പീഡിപ്പിച്ചു വരുന്നതായും ആൾത്താമസമില്ലാത്ത വീട്ടിലെത്തിച്ച്‌ പീഡിപ്പിച്ച്‌ ഗര്‍ഭിണിയാക്കിയെന്നും പരിശോധനയില്‍ കണ്ടെത്തി. ശിക്ഷ ഒരുമിച്ചായതിനാൽ 30 വര്‍ഷം തടവുശിക്ഷ അനുഭവിച്ചാൽ മതിയാകും.

ജില്ല ലീഗല്‍ സര്‍വിസ്‌ അതോറിറ്റി രണ്ടു ലക്ഷം രൂപ അധികമായി കുട്ടിക്ക്‌ നല്‍കണമെന്നും ഉത്തരവിലുണ്ട്​. പ്രോസിക്യൂഷനു വേണ്ടി അഡ്വ. എസ്​.എസ്​. സനീഷ്‌ ഹാജരായി.