ഹാഥറസ്​ മോഡൽ ഡൽഹിയിലും; ഒമ്പതുകാരിയെ ശ്​മശാനത്തിൽ ബലാത്സംഗം ചെയ്​ത്​ കൊലപ്പെടുത്തി മൃതദേഹം ബലമായി സംസ്​കരിച്ചു

ന്യൂഡൽഹി: ഒമ്പത്​ വയസുകാരിയെ ബലാത്സംഗം ചെയ്​ത്​ കൊലപ്പെടുത്തിയ ശേഷം മൃതദേഹം ബലമായി​ സംസ്​കരിച്ചതായി പരാതി. സംഭവവുമായി ബന്ധപ്പെട്ട്​ മതപുരോഹിതനെയും മൂന്ന്​ പേരെയും കസ്റ്റഡിയിലെടുത്തു. നീതി ആവശ്യപ്പെട്ട്​ നാട്ടുകാർ പ്രതിഷേധിച്ചു​. മതപുരോഹിതനായ രാധേശ്യാമിനൊപ്പം ശ്​മശാനത്തിലെ ജീവനക്കാരായ സാലിം, ലക്ഷ്​മിനാരായൺ, കുൽദീപ്​ എന്നിവരാണ്​ അറസ്റ്റിലായത്​.

ഡൽഹി ക​േന്‍റാൺമെന്‍റ്​ പ്രദേശത്തെ ശ്​മശാനത്തോട്​ ചേർന്നുള്ള പുരാന നംഗലിലെ നിർധന കുടുംബത്തിലെ അംഗമാണ്​ മരിച്ച കുട്ടി. കഴിഞ്ഞ ദിവസം വൈകീട്ട്​ ശ്​മശാനത്തിലെ കൂളറിൽ നിന്ന്​ വെള്ളം കുടിക്കാനായി പോയ കുട്ടി പിന്നീട്​ മടങ്ങി വന്നില്ല.

ശ്​മശാനത്തിലെ പുരോഹിതനായ രാധേശ്യാമിന്‍റെ ചില അടുപ്പക്കാർ വൈകീട്ട്​ ആറ്​ മണിക്ക്​ കുട്ടിയുടെ മാതാവിനെ ശ്​മശാനത്തിലേക്ക്​ വിളിപ്പിച്ച്​ മൃതദേഹം കാണിച്ചുകൊടുക്കുകയായിരുന്നു. കൂളറിൽ നിന്ന്​ വെള്ളം കുടിക്കുന്നതിനിടെ കുട്ടിക്ക്​ ഷോക്കടിക്കുകയായിരുന്നുവെന്നാണ്​ അവർ പറഞ്ഞത്​.

കുട്ടിയുടെ കൈത്തണ്ടയിലും മുട്ടിലും പൊള്ളലേറ്റ പാടുകളുണ്ടായിരുന്നുവെന്നും ചുണ്ട്​ നീല നിറമായി മാറിയിരുന്നതായും കുട്ടിയുടെ അമ്മ പറഞ്ഞു.

പൊലീസിനെ വിവരമറിയിച്ചാൽ അവർ മൃതദേഹം പോസ്റ്റ്​മോർട്ടം ചെയ്യുമെന്നും അവയവങ്ങൾ മോഷണം പോകുമെന്നും പുരോഹിതൻ അമ്മയോട്​ പറഞ്ഞു. ഉടനെ മൃതദേഹം സംസ്​കരിക്കണമെന്നും അവരോട്​ ആവശ്യപ്പെട്ടു.

തങ്ങളുടെ സമ്മതമില്ലാതെ മകളുടെ മൃതദേഹം സംസ്​കരിച്ചുവെന്ന്​ മാതാപിതാക്കൾ പറഞ്ഞതോടെയാണ്​ അയൽക്കാർ വിവരമറിഞ്ഞത്​. ഇതോടെ ശ്​മശാനത്തിന്​ സമീപം നാട്ടുകാർ ഒത്തുകൂടുകയും പൊലീസിനെ വിവരമറിയിക്കുകയും ചെയ്​തു. ഞായറാഴ്ച രാത്രി മുതൽ തിങ്കളാഴ്ച വൈകുന്നേരം വരെ ഗ്രാമീണർ പ്രതിഷേധവുമായി തടിച്ചുകൂടി.

പോക്​സോ, എസ്​.സി/എസ്​.ടി നിയമങ്ങൾ പ്രകാരമാണ്​ പൊലീസ്​ കേസ്​ രജിസ്റ്റർ ചെയ്​തത്​.