17കാരിയെ പീഡിപ്പിച്ച കേസിൽ പ്രതി പിടിയിൽ

പത്തനംതിട്ട: പ്രായപൂർത്തിയാകാത്ത പെൺകുട്ടിയെ തട്ടിക്കൊണ്ടുപോയി പീഡിപ്പിച്ച കേസിൽ യുവാവിനെ കൂടൽ പൊലീസ് അറസ്റ്റ് ചെയ്തു.

പത്തനംതിട്ട താഴെ വെട്ടിപ്രം പ്ലാവിനാക്കുഴിയിൽ കൈപ്ലാവിൽ വീട്ടിൽ കണ്ണൻ എന്ന സന്ദീപാണ് (18) പിടിയിലായത്. ഇയാൾ കലഞ്ഞൂരിൽനിന്ന് പെൺകുട്ടിയെ തട്ടിക്കൊണ്ടുപോയി, കോന്നി അതുമ്പുംകുളം ചെങ്ങറ സമരഭൂമിയിലെ ഷെഡ്‌ഡിലെത്തിച്ച് പീഡിപ്പിക്കുകയായിരുന്നു.

കഴിഞ്ഞമാസം അഞ്ചിനും 30നും കലഞ്ഞൂരിൽനിന്നാണ് തട്ടിക്കൊണ്ടുപോയി ലൈംഗിക അതിക്രമത്തിന് ഇരയാക്കിയത്. മാതാവിന്റെ സാന്നിധ്യത്തിൽ പെൺകുട്ടിയുടെ മൊഴി പകർത്തി കൂടൽ പൊലീസ് കേസ് രജിസ്റ്റർ ചെയ്യുകയായിരുന്നു.

തുടർന്ന് വൈദ്യപരിശോധനക്ക് വിധേയമാക്കി. എസ്.ഐ ദിജേഷിന്റെ നേതൃത്വത്തിൽ അന്വേഷണത്തിനിടെ വ്യാഴാഴ്ച വൈകീട്ട് പ്രതിയെ കലഞ്ഞൂരിൽനിന്നാണ് കസ്റ്റഡിയിലെടുത്തത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.