യുവാവിനെ ഭാര്യ തലക്കടിച്ചു കൊന്നു; കുഴിച്ചുമൂടിയത്​ ഭർത്താവിന്‍റെ സഹപ്രവർത്തകന്‍റെ സഹായത്തോടെ

ചേർപ്പ് (തൃശൂർ): ചേർപ്പ്​ പാറക്കോവിലിൽ കുടുംബവഴക്കിനെ തുടർന്ന് ഭാര്യ ഭർത്താവിനെ തലക്കടിച്ചു കൊന്നു. പശ്ചിമ ബംഗാൾ സ്വദേശി മൻസൂർ മാലികിനെയാണ് (40) ഭാര്യ രേഷ്മ ബീവി (33) കൊലപ്പെടുത്തിയതായി പൊലീസ്​ ചോദ്യംചെയ്യലിൽ വെളിപ്പെടുത്തിയത്. ഞായറാഴ്ച പുലർച്ച 12നാണ് സംഭവം.

ഇരുവരും തമ്മിലുണ്ടായ കുടുംബവഴക്ക് ആക്രമണത്തിൽ കലാശിക്കുകയും വീട്ടിലുണ്ടായിരുന്ന കമ്പിപ്പാര ഉപയോഗിച്ച് രേഷ്മ ബീവി മൻസൂറിനെ തലക്കടിച്ച് കൊലപ്പെടുത്തുകയുമായിരുന്നു. തുടർന്ന് രേഷ്മ ബീവിയും മൻസൂറി​െൻറ സ്വർണപ്പണി ശാലയിലെ തൊഴിലാളി ബിരുവും (33) ചേർന്ന് ഇവരുടെ വീടിന് പിൻഭാഗത്തെ സ്ഥലത്ത് കുഴിയെടുത്ത്​ കുഴിച്ചുമൂടുകയായിരുന്നു.

രാവിലെ രേഷ്മ ബീവി ഭർത്താവിനെ കാണാനില്ലെന്ന് പറഞ്ഞ് ചേർപ്പ് പൊലീസിൽ പരാതി നൽകാൻ എത്തിയപ്പോഴാണ് കൊലപാതകത്തി​െൻറ ചുരുളഴിഞ്ഞത്. പൊലീസ് മൊബൈൽ ടവർ കേന്ദ്രീകരിച്ച് നടത്തിയ അന്വേഷണത്തിൽ കാണാതായ മൻസൂർ മാലിക് പ്രദേശത്തുതന്നെ ഉള്ളതായി അറിവ് ലഭിച്ചു. തുടർന്ന് നടത്തിയ ചോദ്യംചെയ്യലിലാണ് രേഷ്മ ബീവി കാര്യം വെളിപ്പെടുത്തിയത്. പൊലീസ് വീട് പരിശോധിക്കുകയും രേഷ്മയെ കസ്​റ്റഡിയിലെടുക്കുകയും ചെയ്​തു. ഇവരുടെ മക്കളെ ശിശുക്ഷേമ സമിതി മന്ദിരത്തിലേക്ക് മാറ്റിപ്പാർപ്പിച്ചു.

12 വർഷത്തോളമായി മൻസൂർ പാറക്കോവിലിൽ സ്വർണപ്പണി തൊഴിലാളിയാണ്. വാടക വീട്ടിലാണ് താമസം. ഇരിങ്ങാലക്കുട ഡിവൈ.എസ്.പി ബാബു കെ. തോമസ്, ചേർപ്പ് സി.ഐ ടി.വി. ഷിബു, സ്​പെഷൽ ബ്രാഞ്ച് ഇൻസ്പെക്ടർ പി.സി. ബിജുകുമാർ, ചേർപ്പ് ഗ്രാമപഞ്ചായത്ത് പ്രസിഡൻറ്​ സുജീഷ കള്ളിയത്ത്, വൈസ് പ്രസിഡൻറ്​ വി.എൻ. സുരേഷ് എന്നിവർ സ്ഥലത്തെത്തിയിരുന്നു. തിങ്കളാഴ്​ച ആർ.ഡി.ഒയുടെ നേതൃത്വത്തിൽ മൃതദേഹം പുറത്തെടുത്ത് ഫോറൻസിക് പരിശോധനകൾക്കു ശേഷം തുടർനടപടികൾ സ്വീകരിക്കുമെന്ന് പൊലീസ് പറഞ്ഞു.