പിതാവ്​ മരിച്ചതോടെ തെരുവിൽ കഴിഞ്ഞ 17കാരിയെ കൂട്ടബലാത്സംഗം ചെയ്​ത മൂന്നുപേർ അറസ്റ്റിൽ

പാൽഗാർ: മഹാരാഷ്​ട്രയിൽ 17കാരിയെ കൂട്ടബലാത്സംഗം ചെയ്​ത മൂന്നുപേർ അറസ്റ്റിൽ. പാൽഗാർ ജില്ലയിലെ വാസൈയിലാണ്​ സംഭവം. 2020 നവംബർ മുതൽ ഒരു വർഷത്തോളമായി പെൺകുട്ടിയെ ക്രൂര ബലാത്സംഗത്തിന്​ ഇരയാക്കുകയായിരുന്നു പ്രതികൾ.

പെൺകുട്ടിയുടെ അമ്മ ഉപേക്ഷിച്ച്​ പോയതോടെ വാടക വീട്ടിൽ പിതാവിനൊപ്പമായിരുന്നു താമസം. എന്നാൽ, 2020 നവംബറിൽ പിതാവ്​ മരിച്ചതോടെ പെൺകുട്ട​ിയോട്​ വീട്​ ഒഴിഞ്ഞുനൽകാൻ വീട്ടുടമ ആവശ്യപ്പെടുകയായിരുന്നു. തുടർന്ന്​ വാസൈയിലെ വഴിയരികിലായിരുന്നു താമസം.

ആഗസ്റ്റ്​ മൂന്നിന്​ വാസൈ റെയിൽവേ സ്​റ്റേഷന്​ സമീപം അലഞ്ഞുതിരിഞ്ഞ പെൺകുട്ടിയെ പൊലീസിന്‍റെ ശ്രദ്ധയിൽപ്പെടുകയായിരുന്നു. പെൺകുട്ടിയോട്​ വിവരങ്ങൾ തിരക്കിലെങ്കിലും മാനസിക വിഷമത്തിലായിരുന്നതിനാൽ വെളിപ്പെടുത്തിയില്ല. അതിനാൽ കുട്ടിയെ മാനസിക ആരോഗ്യ കേന്ദ്രത്തിലേക്ക്​ മാറ്റുകയും എൻ.ജി.ഒകൾ കുട്ടിയുമായി സംവദിക്കുകയും ചെയ്​തു. 17കാരിയെ മെഡിക്കൽ പരിശോധനക്ക്​ വിധേയമാക്കിയപ്പോൾ ബലാത്സംഗത്തിന്​ ഇരയായതായി തെളിയുകയും ചെയ്​തതായി ഡെപ്യൂട്ടി കമീഷണർ (റെയിൽവേ) പ്രദീപ്​ ചവാൻ പറഞ്ഞു.

പ്രതികളിലൊരാളുടെ പേര്​ അജയ്​ ആണെന്ന്​ പിന്നീട്​ പെൺകുട്ടി​ പൊലീസി​നോട്​ പറഞ്ഞു. കുട്ടിയുടെ മാനസിക ആരോഗ്യത്തിൽ പുരോഗതിയുണ്ടായതോടെ കുട്ടി കാര്യങ്ങൾ വെളിപ്പെടുത്തുകയും ചെയ്​തു.

പിതാവ്​ മരിച്ചതോടെ വഴിയരികിൽ താമസമാക്കിയ പെൺകുട്ടിയെ നിരന്തരം പ്രതികൾ ​ബലാത്സംഗത്തിന്​ വിധേയമാക്കുകയായിരുന്നു. പെൺകുട്ടിയുടെ മൊഴിയുടെ അടിസ്​ഥാനത്തിൽ പൊലീസ്​ കേസെടുത്ത്​ അന്വേഷണം ആരംഭിച്ചു. പിന്നീട്​ സി.സി.ടി.വിയുടെ സഹായത്തോടെ മുഖ്യപ്രതി 34കാരനായ അജയ്​ കുമാർ വിനോട്​ ജയ്​സ്​വാളിനെ പൊലീസ്​ പിടികൂടുകയായിരുന്നു. അജയ്​യെ ചോദ്യം ചെയ്​തതോടെ മറ്റു പ്രതികളായ മുന്ന യാദവ്(28), അക്രം ചൗധരി(34) എന്നിവരെ പൊലീസ്​ പിടികൂടി. പ്രതികൾക്കെതിരെ പോക്​സോ വകുപ്പുകൾ ഉൾപ്പെടെ ചുമത്തിയാണ്​ കേസെടുത്തിരിക്കുന്നത്​.