മൊബൈൽ തടഞ്ഞ അധ്യാപകനെ വിദ്യാർഥികൾ മർദിച്ചു; ഒമ്പതാം ക്ലാസുകാരൻ പിടിയിൽ, വധശ്രമത്തിന്​ കേസ്​

ഗോരഖ്പൂർ: ഉത്തർപ്രദേശിലെ ഗൊരഖ്പൂരിൽ ക്ലാസ് മുറിയിൽ മൊബൈൽ ഫോൺ ഉപയോഗം തടഞ്ഞ സർക്കാർ സ്‌കൂൾ അധ്യാപകനെ വിദ്യാർഥികൾ മർദിച്ചു. അധ്യാപകന്‍റെ മുഖം തുണിയിട്ട്​ മറച്ചാണ്​ മർദിച്ചത്​. പ്രതികൾക്കെതിരെ വധശ്രമത്തിന് കേസെടുത്തു.

സംഭവത്തിൽ പൊലീസ്​ കസ്റ്റഡിയിലെടുത്ത ഒമ്പതാം ക്ലാസ്​ വിദ്യാർഥിയെ ജുവനൈൽ ഹോമിലേക്ക് മാറ്റി. അക്രമത്തി​െന്‍റ ദൃശ്യം സി.സി.ടി.വി ക്യാമറയിൽ പതിഞ്ഞിട്ടുണ്ട്.

ഗോരഖ്പൂർ സർക്കാർ സ്‌കൂളിലെ കമ്പ്യൂട്ടർ അധ്യാപകനായ സയ്യിദ് വാസിഖ് അലിയാണ് ആക്രമിക്കപ്പെട്ടത്. ഒമ്പതാം ക്ലാസിലെ ഒരു വിദ്യാർഥിയും മറ്റ് രണ്ട് വിദ്യാർഥികളും ചേർന്നാണ്​ മർദിച്ചത്​. മൊബൈൽ ഉപയോഗം നിർത്താൻ പറഞ്ഞപ്പോൾ ഇവർ വാസിഖിന്‍റെ മുഖം തുണിവെച്ച്​ മൂടി ആക്രമിക്കുകയായിരുന്നു.

വാസിഖ് നൽകിയ പരാതിയുടെ അടിസ്ഥാനത്തിൽ മൂന്ന്​ വിദ്യാർഥികൾക്കുമെതിരെ കേസെടുത്തു. അധ്യാപകനെ ആക്രമിച്ച സംഭവം നിസ്സാരമായി കാണാനാവില്ലെന്ന്​ സ്​കൂൾ പ്രിൻസിപ്പൽ പറഞ്ഞു. 'കുറ്റാരോപിതനായ വിദ്യാർഥിയെ സ്​കൂളിൽനിന്ന്​ പുറത്താക്കിയിട്ടുണ്ട്​. മറ്റ് രണ്ട് വിദ്യാർത്ഥികളെ തിരിച്ചറിഞ്ഞ ശേഷം അവർക്കെതിരെയും നടപടിയെടുക്കും" -അദ്ദേഹം പറഞ്ഞു. മറ്റ് രണ്ട് പ്രതികളെ പിടികൂടാനുള്ള ശ്രമം നടക്കുകയാണെന്നും പൊലീസ് അറിയിച്ചു.