പീഡന ശ്രമത്തിൽ നിന്ന് രക്ഷപ്പെട്ടു; യുവതിയുടെ സ്വകാര്യ ഭാഗങ്ങളിൽ പൊള്ളലേൽപ്പിക്കുകയും മുളകുപൊടി തേക്കുകയും ചെയ്ത് ഭർതൃവീട്ടുകാർ

ഭോപ്പാല്‍: യുവാവ് അതിക്രമിച്ച് വീട്ടിൽ കയറി പീഡന ശ്രമം നടത്തിയതിന് യുവതിയെ ക്രൂരമായി മർദിച്ച് ഭർത്താവും വീട്ടുകാരും. യുവതിയുടെ സ്വകാര്യ ഭാഗങ്ങളിൽ പൊള്ളലേൽപ്പിക്കുകയും മുളകുപൊടി തേക്കുകയും ചെയ്തു.

നവംബര്‍ 13നായിരുന്നു സംഭവം. സ്റ്റീം മെഷീന്‍ ചോദിച്ച് വീട്ടിലെത്തിയ യുവാവ് മുറിയിൽ കയറി വാതിലടച്ച് യുവതിയെ പീഡിപ്പിക്കാന്‍ ശ്രമിക്കുകയായിരുന്നു. യുവാവിനെ പിടികൂടേണ്ടതിന് പകരം ഭർത്താവും വീട്ടുകാരും രണ്ട് മണിക്കൂറോളം യുവതിയെ നഗ്നയാക്കി നിര്‍ത്തി അടിക്കുകയും ചവിട്ടുകയും തുടകളിലും സ്വകാര്യ ഭാഗങ്ങളിലും ഇരുമ്പു ദണ്ഡ് പഴുപ്പിച്ച് പൊള്ളലേല്‍പ്പിക്കുകയുമായിരുന്നു. സംഭവത്തിൽ ഭർത്താവിനെതിരെയും ഭർത്താവിന്റെ മാതാപിതാക്കൾക്കെതിരെയും ഭര്‍തൃസഹോദരിക്കെതിരെയും പൊലീസ് കേസെടുത്തു.

മണിക്കൂറുകള്‍ നീണ്ട പീഡനത്തില്‍ പൊള്ളലേറ്റ ഭാഗത്ത് ഭർതൃപിതാവാണ് മുളക് പൊടി തേച്ചതെന്ന് യുവതി പരാതിയില്‍ പറയുന്നു. ബോധരഹിതയായ യുവതിയെ പിറ്റേന്ന് ബൈക്കില്‍ കയറ്റി പൊലീസ് സ്റ്റേഷന് സമീപം ഉപേക്ഷിക്കുകയായിരുന്നു. പരിക്കുകളോടെ റോഡില്‍ വീണു കിടന്ന യുവതിയെ നാട്ടുകാർ വീട്ടിലെത്തിക്കുകയായിരുന്നു.