ഭോ​ലെ​ ബാ​ബ​യും വൈ​ലോ​പ്പി​ള്ളി​യും ത​മ്മി​ലെ​ന്ത്?

ഉ​ത്ത​ർ​പ്ര​ദേ​ശി​ലെ ഹാ​ഥ്റ​സി​ൽ ജ​ന​ങ്ങ​ൾ തി​ര​ക്കു കാ​ര​ണം വാ​യു​കി​ട്ടാ​തെ മ​രി​ച്ച​ത​ല്ല. അ​പ്ര​തീ​ക്ഷി​ത​മാ​യി കെ​ട്ടി​ടം​വീ​ണ് അ​തി​ന​ടി​യി​ൽ​പെ​ട്ട് പ​രി​ക്കേ​റ്റ​ത​ല്ല. ആ​ത്മീയ​സ​മ്മേ​ള​നം ക​ഴി​ഞ്ഞ് പു​റ​ത്തു ക​ട​ക്കാ​നു​ള്ള തി​ര​ക്കി​ൽ​പെ​ട്ട് ത​ള​ർ​ന്ന് വീ​ണ​ത​ല്ല. അ​പ​ക​ട​കാ​ര​ണം ഭോ​ലെ​ ബാ​ബ എ​ന്ന പ്രി​യ ആ​ൾ​ദൈ​വം ച​വി​ട്ടി​യ മ​ണ്ണ് ഒ​രുത​രി സ്വ​ന്ത​മാ​ക്കാ​നു​ള്ള മ​ത്സര​ത്തി​നി​ട​യി​ൽ സം​ഭ​വി​ച്ച​താ​ണ്. ബാ​ബ ച​വി​ട്ടി​യ മ​ണ്ണ് ചെ​റി​യ പാ​ക്ക​റ്റു​ക​ളി​ൽ പ്ര​സാ​ദ​മാ​ക്കി വി​ത​ര​ണം ചെ​യ്യാ​നു​ള്ള സം​വി​ധാ​നം സം​ഘാ​ട​ക​ർ ഒ​രു​ക്കി​യി​രു​ന്നെ​ങ്കി​ൽ, എ​ത്ര സ​മ​യ​വും ക്യൂ ​നി​ന്ന് അ​ത് സ്വ​ന്ത​മാ​ക്കാ​ൻ ബാ​ബാ​ ഭ​ക്തരാ​യ പാ​വ​പ്പെ​ട്ട മ​നു​ഷ്യ​ർ ത​യാ​റാ​കു​മാ​യി​രു​ന്നു. അ​തി​നൊ​ര​വ​സ​രം ന​ൽ​കാ​തെ ബാ​ബ​ ച​വി​ട്ടി​യ മ​ണ്ണ് സ്വ​ന്ത​മാ​ക്കാ​നു​ള്ള ഭ്രാ​ന്ത​മാ​യ മ​ത്സര​ത്തി​ലേ​ക്ക് സ്വ​ന്തം ഭ​ക്തരെ ബാ​ബ​യും സ​ത്സംഗ​മത്തിന്റെ സം​ഘാ​ട​ക​രും ത​ള്ളി​വി​ട്ട​ത്, ഒ​രു ത​ത്ത്വത്തിന്റെ പേ​രി​ലും ന്യാ​യീ​ക​രി​ക്കാ​നാ​വി​ല്ല. ഒ​രു വി​ധേ​ന​യും സം​ഭ​വി​ക്കാ​ൻ പാ​ടി​ല്ലാ​ത്ത ഇ​ത്ത​ര​മൊ​രു ദു​ര​ന്തം സം​ഭ​വി​ച്ചാ​ൽ പി​ന്നെ മ​നു​ഷ്യ​ത്വം ചോ​ർ​ന്നു​പോ​യി​ട്ടി​ല്ലെ​ങ്കി​ൽ അ​വ​ർ​ക്ക് ചെ​യ്യാ​ൻ ക​ഴി​യു​മാ​യി​രു​ന്ന പ്രാ​ഥ​മി​ക കാ​ര്യം, ദു​രി​ത​നി​വാ​ര​ണ പ്ര​വ​ർ​ത്ത​ന​ത്തി​ൽ പ​ങ്കാ​ളി​ക​ളാ​വു​ക എ​ന്നു​ള്ള​താ​ണ്. ഭോ​ലെ ​ബാ​ബ​യും സ​മാ​ന്ത​ര​ പൊലീ​സ്​ എ​ന്നു വി​ളി​ക്കാ​വു​ന്ന അ​ദ്ദേ​ഹ​ത്തിന്റെ സ​ന്ന​ദ്ധ​പ്ര​വ​ർ​ത്ത​ക​രും ഒ​രു​മി​ച്ചുനി​ന്ന് ദു​ര​ന്ത​ത്തി​ൽ മ​രി​ച്ച​വ​രു​ടെ ബ​ന്ധു​ക്ക​ളെ ആ​ശ്വ​സി​പ്പി​ക്കു​ക​യും പ​രി​ക്കേ​റ്റ​വ​രെ ആ​ശു​പ​ത്രി​ക​ളി​ലെ​ത്തി​ക്കാ​നു​ള്ള ശ്ര​മ​ങ്ങ​ളി​ൽ വ്യാ​പൃ​ത​രാ​വു​ക​യും ചെ​യ്തി​രു​ന്നെ​ങ്കി​ൽ, അ​തൊ​രു ഒ​ന്നാ​ന്ത​രം മാ​നു​ഷി​ക പ്ര​വ​ർ​ത്ത​ന​മാ​യി മാ​റു​മാ​യി​രു​ന്നു! അ​തി​നുപ​ക​രം ആ​ൾ​ദൈ​വ​വും സം​ഘ​വും സ്​​ഥ​ല​ത്തു​നി​ന്നും ത​ൽ​ക്ഷ​ണം മു​ങ്ങു​ക​യാ​ണു​ണ്ടാ​യ​ത്. നി​ർ​ഭാ​ഗ്യ​ക​ര​മാ​യ ബ​സപ​ക​ട​മോ മ​റ്റോ ഉ​ണ്ടാ​യ ഒ​രു സ്​​ഥ​ല​ത്തു​നി​ന്ന് അ​ടി​പേ​ടി​ച്ച് ഒ​രു ൈഡ്ര​വ​ർ താ​ൽ​ക്കാ​ലി​ക​മാ​യി മു​ങ്ങു​ന്ന​തു പോ​ലെ​യ​ല്ല, യ​ഥാ​ർ​ഥ​ത്തി​ൽ അത്ഭുത​ ക​ഴി​വു​ക​ളൊ​ന്നു​മി​ല്ലെ​ങ്കി​ലും അ​തൊ​ക്കെ ഉ​ണ്ടെ​ന്ന് ന​ടി​ക്കു​ന്ന ഭ​ര​ണ​ത്തി​ലും മാ​ധ്യ​മ​ങ്ങ​ളി​ലും വ​ൻ സ്വാ​ധീ​ന​മു​ള്ള ഒ​രാ​ൾ​ദൈ​വം മു​ങ്ങു​ന്ന​ത്. ന​മ്മു​ടെ നാ​ട്ടി​ൽ മ​ത​ സ​മ്മേ​ള​ന​ത്തി​ലും രാ​ഷ്ട്രീ​യ​ സ​മ്മേ​ള​ന​ത്തി​ലുമായി​രു​ന്നു ഇ​ത്ത​ര​മൊ​രു ദൗ​ർ​ഭാ​ഗ്യ​ക​ര​മാ​യ സം​ഭ​വം ന​ട​ന്നി​രു​ന്ന​തെ​ങ്കി​ൽ, അ​വ​രെ​ക്കു​റി​ച്ച് എ​ന്തൊ​ക്കെ വി​മ​ർ​ശ​നം പ​റ​യാ​മെ​ങ്കി​ലും നേ​താ​ക്ക​ന്മാ​രും പ്ര​വ​ർ​ത്ത​ക​രും എ​ല്ലാം​കൂ​ടി ഈ​വി​ധം കൂ​ട്ട​ത്തോ​ടെ മു​ങ്ങു​മാ​യി​രു​ന്നി​ല്ല. മു​ങ്ങ​ലും ബാ​ബ​യു​ടെ അത്ഭുത​ ക​ഴി​വു​ക​ളി​ലൊ​ന്നാ​വു​മോ?

ഭോ​ലെ ബാ​ബ ആ​രെ​യും നേ​രി​ട്ട് ഉ​ന്തിത്ത​ള്ളി​യി​ട്ടി​ട്ടി​ല്ല എ​ന്ന​ർ​ഥ​ത്തി​ൽ അ​പ​ക​ട​ത്തി​ൽ ബാ​ബ​ക്ക് നേ​രി​ട്ട് പ​ങ്കി​ല്ല എ​ന്നു​ള്ള​ത് ശ​രി​യാ​ണ്. എ​ന്നാ​ൽ, ഞാ​ൻ ച​വി​ട്ടി​യ മ​ണ്ണി​നും എന്റെ തു​പ്പ​ലി​നും ശ​രീ​ര​ത്തി​നും നി​ങ്ങ​ളു​ടേ​തി​ൽ​നി​ന്നും വ്യ​ത്യ​സ്​​ത​മാ​യി ഒ​രു പ്ര​ത്യേ​ക​ത​യു​മി​ല്ലെ​ന്ന് ബാ​ബ​മാ​ർ ഒ​രൊ​റ്റ​ത​വ​ണ വേ​ണ്ട​വ​ണ്ണം അ​മ​ർ​ത്തി പ​റ​ഞ്ഞി​രു​ന്നു​വെ​ങ്കി​ൽ, ഒ​രു യു​ക്തിയു​ടെ​യും നി​ർ​ദേ​ശ​ങ്ങ​ൾ അ​നു​സ​രി​ക്കാ​ത്ത, എ​ന്നാ​ൽ എ​ല്ലാ ബ്രാ​ൻ​ഡി​ലും​പെ​ട്ട ബാ​ബ​മാ​രെ അ​ന്ധ​മാ​യി അ​നു​സ​രി​ക്കു​ന്ന, മ​നു​ഷ്യ​ർ​ക്ക് ഇ​ത്ത​ര​മൊ​രു അ​പ​ക​ടം സം​ഭ​വി​ക്കി​ല്ലാ​യി​രു​ന്നു. അ​തു​കൊ​ണ്ടുത​ന്നെ ഭോ​ലെ​ ബാ​ബ​യു​ടെ പേ​ര് അ​നി​വാ​ര്യ​മാ​യും കു​റ്റ​വാ​ളി പ​ട്ടി​ക​യി​ൽ ഒ​ന്നാ​മ​താ​യി ചേ​ർ​ക്കേ​ണ്ട​തു​ണ്ടാ​യി​രു​ന്നു. അ​ത് ചെ​യ്തി​ല്ല. അ​ത് മാ​ത്ര​മ​ല്ല, സ​മ്മേ​ള​നം ന​ട​ന്ന പ​ന്ത​ലി​ലേ​ക്ക് സ​ർ​ക്കാ​ർ ഉ​ദ്യേ​ാഗ​സ്​​ഥ​രെ​യും തി​ര​ക്ക് നി​യ​ന്ത്രി​ക്കാ​ൻ സ​ർ​ക്കാ​ർ നി​യോ​ഗി​ച്ച പൊലീ​സു​കാ​രെ​യും പ്ര​വേ​ശി​പ്പി​ച്ചി​ല്ല എ​ന്നു​ള്ള​തും കു​റ്റ​കൃ​ത്യ​ത്തി​ൽ ഉ​ൾ​പ്പെ​ടു​ത്ത​പ്പെ​ടേ​ണ്ട​താ​ണ്. കോ​ടി​ക്കണ​ക്കി​ന് വ​രു​മാ​ന​മു​ള്ള ഇ​തു​പോ​ലു​ള്ള ഹൈ​ടെ​ക് ആ​ൾ​ദൈ​വ​ങ്ങ​ളി​ൽ​നി​ന്ന് അ​പ​ക​ട​ത്തി​നിര​യാ​യ​വ​ർ​ക്കും ബ​ന്ധു​ക്ക​ൾ​ക്കു​മു​ള്ള ന​ഷ്​​ട​പ​രി​ഹാ​ര​ തു​ക മു​ഴു​വ​ന​ല്ലെ​ങ്കി​ൽ ഒ​രു​ഭാ​ഗ​മെ​ങ്കി​ലും സ​ർ​ക്കാ​ർ നി​ർ​ബന്ധി​ത​മാ​യി വ​സൂ​ലാ​ക്കേ​ണ്ട​താ​ണ്. നി​ര​ന്ത​രം പ​റ​ഞ്ഞു​കൊ​ണ്ടി​രി​ക്കു​ന്ന ഏ​തെ​ങ്കി​ലും ആ​ത്മീയ​മൂ​ല്യ​ത്തോ​ട് ചെ​റി​യൊ​രു ആ​ഭി​മു​ഖ്യ​മെ​ങ്കി​ലു​മു​ണ്ടെ​ങ്കി​ൽ സ​ർ​ക്കാ​ർ ആ​വ​ശ്യ​പ്പെ​ടാ​തെ​ത​ന്നെ ദു​രി​താ​ശ്വാ​സ​പ്ര​വ​ർ​ത്ത​ന​ത്തി​നാ​വ​ശ്യ​മാ​യ മു​ഴു​വ​ൻ ചെല​വും ഞ​ങ്ങ​ൾ വ​ഹി​ക്കാ​മെ​ന്ന് ആ​ൾ​ദൈ​വ​ങ്ങ​ൾ പ്ര​ഖ്യാ​പി​ക്കേ​ണ്ട​താ​ണ്. അ​തി​നുപ​ക​രം അ​വ​ർ ഒ​ളി​വി​ൽ പോ​വു​ക​യാ​ണ്! വ​ല്ല വി​പ്ല​വ​പ്ര​വ​ർ​ത്ത​ന​ത്തിന്റെ​യോ സ്വാ​ത​ന്ത്ര്യ​സ​മ​ര​ത്തിന്റെ​യോ ഭാ​ഗ​മെ​ന്ന നാ​ട്യ​ത്തി​ലാ​ണ​വ​ർ ഒ​ളി​വി​ൽ പോ​യ​തെ​ന്ന്, ഇ​പ്പോ​ഴ​ല്ല പ്ര​തി​ഷേ​ധ​ത്തിന്റെ ചൂ​ട് കു​റ​യു​മ്പോ​ഴു​ള്ള അ​വ​രു​ടെ ആ​ർ​ഭാ​ട​പൂ​ർ​വ​മാ​യ അ​ര​ങ്ങേ​റ്റം കാ​ണു​മ്പോ​ൾ ന​മു​ക്ക് മ​ന​സ്സി​ലാ​വും! ഭോ​ലെ​ ബാ​ബ​യു​ടെ കൈയിൽ എ​ന്തി​നും കെ​ൽപുള്ള സു​ദ​ർ​ശ​ന​ച​ക്രം ക​ണ്ട​വ​രു​ണ്ട്! ആ ​മു​ഖ​ത്ത് അ​ഭൗ​മ​മാ​യ ദൈ​വ​പ്ര​കാ​ശം പ​ര​ക്കു​ന്ന​തുക​ണ്ട് പ്ര​ചോ​ദ​നം കൊ​ണ്ട​വ​രു​ണ്ട്. സ​ർ​വ മാ​റാ​രോ​ഗ​ങ്ങ​ൾ​ക്കു​മുള്ള മ​രു​ന്ന് ബാ​ബ​യി​ട്ട കോ​ട്ടി​നു​ള്ളി​ലു​ണ്ടെ​ന്ന് ക​ള​ങ്ക​മി​ല്ലാ​തെ വി​ശ്വ​സി​ച്ച​വ​രു​ണ്ട്. മാ​റി​മാ​റി ഭോ​ലെ​ ബാ​ബ ധ​രി​ക്കു​ന്ന ബ്രാ​ൻ​ഡ​ഡ് കൂ​ളിങ് ഗ്ലാ​സി​നെ​ക്കു​റി​ച്ചോ​ർ​ത്തുപോ​ലും കോ​രി​ത്ത​രി​ച്ച​വ​രു​ണ്ട്. അ​ങ്ങനെ ബാ​ബ ബാ​ബ എ​ന്നു മാത്രം മ​ന​സ്സി​ൽ ധ്യാ​നി​ച്ച് അ​ദ്ദേ​ഹ​ത്തി​ന് സ​മ്പൂ​ർ​ണമാ​യി സ്വ​യം സ​മ​ർ​പ്പി​ച്ച ഒ​രു ദ​രി​ദ്ര​ജ​ന​ത​യെ​യാ​ണ്, അ​ദ്ദേ​ഹം ഒ​ര​പ​ക​ട​ത്തി​ൽ കൈയൊഴി​ഞ്ഞ​ത്. അ​നു​ഗ്ര​ഹി​ക്കാ​ൻ ക​ഴി​ഞ്ഞി​ല്ലെ​ങ്കി​ലും അ​പ​ക​ട​ത്തി​ൽപെ​ട്ട​വ​രെ​യും മ​രി​ച്ച​വ​രു​ടെ ബ​ന്ധു​ക്ക​ളെ​യും ഒ​ന്നാ​ശ്വ​സി​പ്പി​ക്കു​ക​പോ​ലും ചെ​യ്യാ​തെ​യാ​ണ​ദ്ദേ​ഹം അ​പ്ര​ത്യ​ക്ഷ​നാ​യ​ത്.

ഞ​ങ്ങ​ളെ​ല്ലാം ദ​രി​ദ്ര​രാ​ണ്. ഇ​വി​ടെ​യു​ള്ള ആ​ണു​ങ്ങ​ൾ ചാ​രാ​യ​ത്തി​ൽ ആ​ശ്വാ​സം ക​ണ്ടെ​ത്തു​ന്നു. ഞ​ങ്ങ​ൾ പെ​ണ്ണു​ങ്ങ​ൾ അ​പ്പോ​ൾ ഇ​തു​പോ​ലു​ള്ള സ​ത്സം​ഗ​മ​ത്തി​ലും! ആ​ശാ​ദേ​വി​യെ​ന്ന അ​പ​ക​ട​ത്തി​ൽ​പെ​ട്ട ഇ​ര​യു​ടെ അ​യ​ൽ​ക്കാ​രി അ​ഞ്ജ​ലി​യു​ടെ വാ​ക്കു​ക​ളാ​ണി​ത്. സ്വ​ന്തം ഭ​ക്തരെ പ​രാ​ജ​യ​പ്പെ​ടു​ത്തി​യ ആ​ൾ​ദൈ​വം എ​ന്ന ഇ​സ്​​ഹി​താ​മി​ശ്ര ‘ഹി​ന്ദു​’വി​ലെ​ഴു​തി​യ പ്ര​ബ​ന്ധ​ത്തി​ൽനി​ന്നു​ള്ള ഉ​ള്ളം പി​ള​ർ​ക്കു​ന്ന വാ​ക്കു​ക​ളാ​ണി​ത്. അ​തേ​പ്ര​ബ​ന്ധ​ത്തി​ൽ, ഒ​രേ കു​ടും​ബ​ത്തി​ലെ മൂ​ന്നു ത​ല​മു​റ​യി​ൽ​പെ​ട്ട​വ​രു​ടെ ദാ​രു​ണ​മാ​യ അ​ന്ത്യ​ത്തെ​ക്കു​റി​ച്ച് പ​റ​യു​ന്നൊ​രു ഭാ​ഗ​മു​ണ്ട്. വി​നോ​ദ്, സ​ഹോ​ദ​ര​ൻ രാ​ജ് വീർ, ബ്ര​ദ​ർ ഇ​ൻ ലോ ​കാ​ളീ​ച​ര​ൺ എ​ന്നി​വ​രു​ടെ വേ​റി​ട്ട വ​ല്ലാ​ത്തൊ​രു നി​സ്സ​ഹാ​യാ​വ​സ്​​ഥ​യാ​ണ​ത്. പ​ത്തു​വ​യ​സ്സു​കാ​രി​യാ​യ സ്വ​ന്തം മ​ക​ൾ ഭൂ​മി എ​ന്ന് പേ​രു​ള്ള കു​ട്ടി​യു​ടെ ശ​വ​സം​സ്​​കാ​രം ന​ട​ക്കു​ക​യാ​ണ്. കു​റ​ച്ച് സ​മ​യം വി​നോ​ദ് ശ​വ​ക്കു​ഴി​യി​ലേ​ക്കി​റ​ക്കി​വെ​ച്ച മ​ക​ളു​ടെ മു​ഖാ​വ​ര​ണം മാ​റ്റി, സ​ങ്ക​ട​ത്തോ​ടെ ആ ​മു​ഖം നോ​ക്കിനി​ൽ​ക്കു​ക​യാ​ണ്. അ​പ്പോ​ൾ സ​ഹോ​ദ​ര​നാ​യ രാ​ജ് വീർ ത​ട്ടി​വി​ളി​ച്ച്, സ​മ​യ​മ​ധി​ക​മി​ല്ലെ​ന്ന​റി​യി​ച്ച്, അ​ടു​ത്ത ശ​വ​സം​സ്​​കാ​ര​ത്തെ​ക്കു​റി​ച്ച് ഓ​ർ​മി​പ്പി​ച്ച് തി​ര​ക്കുകൂ​ട്ടു​ക​യാ​ണ്! വി​നോ​ദിന്റെ ഭാ​ര്യ രാ​ജ്കു​മാ​രി​യെയും അ​വ​രു​ടെ അ​മ്മ ജ​യ്മ​ന്തി​യെ​യും​കൂ​ടി ആ ​കു​ടും​ബ​ത്തി​ന് സം​സ്​​ക​രി​ക്കേ​ണ്ട​തു​ണ്ട്. ഒ​രേ​സ​മ​യം, വി​നോ​ദി​ന് ന​ഷ്​​ട​മാ​യ​ത് മൂ​ന്നു ത​ല​മു​റ​ക​ളെ​യാ​ണ്. ഹാ​ഥ്റ​സ്​ എ​ന്ന ദു​ര​ന്ത​ഭൂ​മി​യി​ൽ​നി​ന്ന്, അ​പ​ക​ടം ന​ട​ന്ന​തിന്റെ ഒ​ര​വ​ശി​ഷ്​​ട​വു​മി​ല്ലാ​തെ സ​ർ​വവും തു​ട​ച്ചു​നീ​ക്കി​ക​ഴി​ഞ്ഞു. ഒ​രു പൊ​ട്ടി​യ ചെ​രി​പ്പിന്റെ വാ​റു​പോ​ലു​മി​ല്ലാ​തെ! എ​ന്നാ​ൽ, വി​നോ​ദ​ട​ക്ക​മു​ള്ള​വ​രു​ടെ അ​നാ​ഥ​മാ​യ തേ​ങ്ങ​ലു​ക​ൾ, അ​വ​രു​ടെ നി​ശ്ശ​ബ്ദ​നി​ല​വി​ളി​യു​ടെ ചോ​ര​പു​ര​ണ്ട പാ​ടു​ക​ൾ ആ​ർ​ക്ക് തു​ട​ച്ചുമാ​റ്റാ​നാ​വും? അ​പ​രി​ഹാ​ര്യ​മാ​യ ഇ​പ്ര​കാ​ര​മു​ള്ള സ​ങ്ക​ട​ങ്ങ​ൾ​ക്കു സ​ർ​ക്കാ​ർ പ്ര​ഖ്യാ​പി​ക്കു​ന്ന ഏ​ത് ന​ഷ്​​ട​പ​രി​ഹാ​ര​ങ്ങ​ൾ​ക്ക് പ​ക​രംനി​ൽ​ക്കാ​നാ​വും?

വി​നോ​ദിന്റെ ഭാ​ര്യ​യു​ടെ​യും ഭാ​ര്യാ​മാ​താ​വിന്റെ​യും ശ​വ​സം​സ്​​കാ​ര​ങ്ങ​ൾ​ക്കി​ട​യി​ലെ അ​ന്തി​മ ച​ട​ങ്ങുപോ​ലും, പ​തി​വി​ൽ​നി​ന്ന് വ്യ​ത്യ​സ്​​ത​മാ​യി ആ​രു​ടെ​യും നെ​ഞ്ചം പൊ​ള്ളി​ക്കും. മ​രി​ച്ച​വ​ർ​ക്ക് ജീ​വി​ച്ചി​രി​ക്കു​ന്ന​വ​രി​ൽ ചി​ല​ർ കേ​ര​ള​ത്തി​ൽ വാ​യ്ക്ക​രി​യി​ടു​ന്ന​തി​ന് പ​ക​ര​മാ​യി​ട്ടാ​ണെ​ന്ന് തോ​ന്നു​ന്നു ഹാ​ഥ്റസി​ൽ, സാ​രി സ​മ​ർ​പ്പി​ക്കു​ന്ന​ത്. ജ​യ്മ​ന്തി​ദേ​വി​യു​ടെ മൃ​ത​ശ​രീ​ര​ത്തി​ൽ മി​നിറ്റു​ക​ൾ​ക്ക​കം സ​മ​ർ​പ്പി​ക്ക​പ്പെ​ട്ട​ത് ഇ​രു​പ​ത്തി​യ​ഞ്ചി​ലേ​റെ സാ​രി​ക​ളാ​ണ്! ജീ​വി​ച്ചി​രി​ക്കു​മ്പോ​ൾ ഇ​തി​ലൊ​രെ​ണ്ണം അ​വ​ർ​ക്ക് കി​ട്ടി​യി​രു​ന്നെ​ങ്കി​ൽ അ​വ​രെ​ത്ര തൃ​പ്ത​യാ​കു​മാ​യി​രു​ന്നു എ​ന്നാ​ണ് അ​പ്പോ​ൾ അ​യ​ൽ​വാ​സി​യാ​യ വി​നീ​ത​ദേ​വി സ​ങ്ക​ട​ത്തോ​ടെ ചോ​ദി​ച്ച​ത്. ജീ​വി​ത​ത്തി​ല​വ​ർ​ക്ക് ആ​കക്കൂ​ടി ഉ​ണ്ടാ​യി​രു​ന്ന​ത് ര​ണ്ടോ​മൂ​ന്നോ സാ​രി​ക​ൾ മാ​ത്ര​മാ​യി​രു​ന്ന​േത്ര! അ​പ്പോ​ൾ, അ​ത്ര​യു​മെ​ത്തു​മ്പോ​ൾ ന​മ്മ​ള​റി​യാ​തെ വൈ​ലോ​പ്പി​ള്ളി​യു​ടെ പ്ര​ശ​സ്​​ത​മാ​യ ‘അ​രി​യി​ല്ലാ​ഞ്ഞി​ട്ട്’ എ​ന്ന ക​വി​ത ഓ​ർ​ത്തു​പോ​കും. പ​ട്ടി​ണി​കൊ​ണ്ടൊ​രു പാ​വം മ​നു​ഷ്യ​ൻ മ​രി​ക്കു​ന്നു. അ​തു​വ​രെ ഒ​രു നേ​ര​ത്തെ ഭ​ക്ഷ​ണം​പോ​ലും കൊ​ടു​ക്കാ​ത്ത​വ​ർ സം​സ്​​കാ​ര​ച്ചട​ങ്ങി​നാ​വ​ശ്യ​മാ​യ സൗ​ക​ര്യ​ങ്ങ​ൾ ചെ​യ്യു​ന്നു. ഒ​ടു​വി​ൽ മൃ​ത​ദേ​ഹം നി​ല​ത്തി​റ​ക്കി​ക്കിട​ത്തി, ക​ർ​മം ചെ​യ്യു​ന്ന​യാ​ൾ അ​യാ​ളു​ടെ ഭാ​ര്യ​യോ​ട് ഇ​ത്തി​രി ഉ​ണ​ക്ക​ല​രി ആ​വ​ശ്യ​പ്പെ​ടു​ന്നു. അ​പ്പോ​ള​വ​ർ പ​റ​ഞ്ഞ​ത്, ‘അ​രി​യു​ണ്ടെ​ന്നാ​ല​ങ്ങോ​ര​ന്ത​രി​ക്കു​ക​യി​ല്ല​ല്ലോ’ എ​ന്നാ​യി​രു​ന്നു. ആ ​ക​ണ്ണീ​ർ വാ​ക്യ​ത്തോ​ളം വ​ലു​ത​ല്ല ഒ​രു ഭോ​ലെ​ ബാ​ബ​യും!

ഭോ​ലെ​ ബാ​ബ എ​ന്നും പാ​ൽ എ​ന്ന ചു​രു​ക്ക​പ്പേ​രി​ലും അ​റി​യ​പ്പെ​ടു​ന്ന സൂ​ര​ജ്പാ​ൽ​ ഏ​ലി​യാ​സ്​ നാ​രാ​യ​ണ സ​കാ​ർ​ഹ​രി എ​ന്ന പൊ​ലീ​സു​കാ​ര​ൻ, ആ​ഗോ​ള​വ​ത്കര​ണ പ​ശ്ചാ​ത്ത​ല​ത്തി​ലെ സാ​മൂ​ഹിക സ​മ്മ​ർ​ദങ്ങ​ളും ജാ​തി​മേ​ൽ​ക്കോ​യ്മാ അ​ന്ത​രീ​ക്ഷ​വും മു​ത​ലെ​ടു​ത്താ​ണ്, ഹാ​ഥ്റ​സി​ലും കാ​ൺ​പൂ​രി​ലു​മെ​ല്ലാം ഹൈ​ടെ​ക് ആ​ശ്രമ​ങ്ങ​ൾ സ്​​ഥാ​പി​ച്ച് അ​മ്പ​ര​പ്പി​ക്കും​ വി​ധം വ​ള​ർ​ന്ന​ത്. ത്യ​ജി​ക്കു​ക​യെ​ന്ന ആ​ത്മീയ​ത​ത്വ​ത്തിന്റെ പ്ര​സി​ദ്ധ​മാ​യ അ​ടി​ത്ത​റ പൊ​ളി​ച്ചു​കൊ​ണ്ടാ​ണ്, മ​റ്റെ​ല്ലാ ആ​ൾ​ദൈ​വ​ങ്ങ​ളെ​പ്പോ​ലെ ഭോ​ലെ​ ബാ​ബ​യു​ടെ ന​വ​ ആ​ശ്ര​മ​ങ്ങ​ളും ഉ​യ​ർ​ന്നു​വ​ന്ന​ത്.

വൃ​ക്ഷ​ങ്ങ​ൾ​ ത​ൻ ഫ​ല​ങ്ങ​ൾ ഭു​ജി​ക്കി​ല്ല/ സം​ഭ​രി​ക്കി​ല്ല ന​ദി​ജ​ല​വും ത​നി​ക്കാ​യി/ ഇ​തു​പോ​ൽ സ​ന്യാ​സി​ക​ൾ ജ​നി​ക്കും/ അ​വ​ർ​ക്കെ​ന്നും ജീ​വി​തം പ​ര​സേ​വ എ​ന്ന് ഭ​ക്തി​പ്ര​സ്​​ഥാ​ന നാ​യ​ക​നാ​യ ക​ബീ​ർ സാ​ക്ഷ്യ​പ്പെ​ടു​ത്തി​യ​തൊ​ന്നും ഭോ​ലെ​ ബാ​ബ മോ​ഡ​ൽ ഹൈ​ടെ​ക് ഭ​ക്തിക്ക് ബാ​ധ​ക​മ​ല്ല. ഭ​ക്തി ആ​ശ്ര​മം സ​ത്സംഗ​മം എ​ന്ന​തൊ​ക്കെ അ​വ​രെ സം​ബ​ന്ധി​ച്ചി​ട​ത്തോ​ളം സ്വ​ന്തം നെ​റ്റി​യി​ലൊ​ട്ടി​ച്ച പ​ര​സ്യ​ങ്ങ​ളാ​ണ്. അ​ല്ലാ​യി​രു​ന്നു​ന്നെ​ങ്കി​ൽ നി​സ്സ​ഹാ​യ​രാ​യ, അ​വ​രെ വി​ശ്വ​സി​ച്ചെ​ത്തി​യ മ​നു​ഷ്യ​ർ​ക്ക് നേ​രി​ട്ട അ​പ​ക​ട​ത്തി​ൽ​നി​ന്ന് ഇ​പ്ര​കാ​രം അ​വ​ർ ഒ​ളി​ച്ചോ​ടു​ക​യി​ല്ലാ​യി​രു​ന്നു. അ​തി​നുപ​ക​രം എ​വി​ടേ​ക്കോ മു​ങ്ങി​യ​ശേ​ഷം ഈ ​ര​ക്ത​ത്തി​ൽ ത​നി​ക്കൊ​രു പ​ങ്കു​മി​ല്ലെ​ന്ന് ഒ​രു ച​ങ്കി​ടി​പ്പു​മി​ല്ലാ​തെ, ഒ​രു ച​ളി​പ്പു​മി​ല്ലാ​തെ വി​ളി​ച്ചു പ​റ​യു​ക​യാ​ണ് ബാ​ബ ചെ​യ്ത​ത്! മ​രി​ച്ച​വ​രു​ടെ കു​ഴി​മാ​ട​ങ്ങ​ൾ​ക്ക​രി​കെ​നി​ന്ന് പ​രേ​താ​ത്മാ​ക്ക​ളു​ടെ മോ​ക്ഷ​ത്തി​നു​വേ​ണ്ടി ഒ​രു പ്രാ​ർഥ​ന​ക്കെ​ങ്കി​ലും പ്ര​തീ​കാ​ത്മക​മാ​യി അ​ദ്ദേ​ഹം നേ​തൃ​ത്വം ന​ൽ​കി​യി​രു​ന്നെ​ങ്കി​ൽ, സ​ങ്ക​ട​ങ്ങ​ളു​ടെ കൊ​ടും ഇ​രു​ട്ടി​ലും കു​റ​ച്ചെ​ങ്കി​ലും പ്ര​കാ​ശം അ​വി​ടെ പ​ര​ക്കു​മാ​യി​രു​ന്നു. അ​തു​ണ്ടാ​യി​ല്ല. മ​നു​ഷ്യ​ർ എ​ത്ര നി​ല​വി​ളി​ച്ചി​ട്ടും ബാ​ബ​യു​ടെ ലോ​ക​ത്തു​നി​ന്ന് മാ​നു​ഷി​ക​മാ​യ ഒ​രു പ്ര​തി​ക​ര​ണ​വും ഉ​ണ്ടാ​യി​ല്ല. ക​ന​ത്ത പ്ര​തി​ഷേ​ധം ഉ​ണ്ടാ​വു​ന്നി​ല്ലെ​ങ്കി​ൽ ഉ​റ​പ്പ്, അ​വി​ടെ​നി​ന്ന് ഇ​നി പ്ര​ത്യേ​കി​ച്ച് ഒ​ന്നു​മു​ണ്ടാ​വാ​നും പോ​കു​ന്നി​ല്ല!

മു​മ്പൊ​ക്കെ ഒ​രാ​ശ്ര​മം എ​ന്ന് കേ​ൾ​ക്കു​മ്പോ​ൾ വി​ശ്വാ​സി​ക​ൾ അ​തിന്റെ പ​വി​ത്ര​ത​യെ​ക്കു​റി​ച്ചോ​ർ​ത്തും, അ​തി​ല​ത്ര വി​ശ്വാ​സി​ക​ള​ല്ലാ​ത്ത​വ​രും മ​ത​ര​ഹി​ത​രും അ​തിന്റെ കാ​വ്യാ​ത്മ​ക ലാ​ളി​ത്യ​ത്തെ​ക്കു​റി​ച്ചോ​ർ​ത്തും കോ​രി​ത്ത​രി​ക്കു​മാ​യി​രു​ന്നു. എ​ന്നാ​ലി​പ്പോ​ൾ ഭോ​ലെ​ ബാ​ബ മോ​ഡ​ൽ ന​വ​ആ​ഡം​ബ​ര ആ​ശ്ര​മ​ങ്ങ​ളി​ൽ​നി​ന്നും ലാ​ളി​ത്യം മാ​ത്ര​മ​ല്ല, ഒ​ര​പ​ക​ട​സ​ന്ദ​ർ​ഭ​ത്തി​ൽ പു​ല​ർ​ത്തേ​ണ്ട സാ​മാ​ന്യ മ​ര്യാ​ദ​പോ​ലും അ​പ്ര​ത്യ​ക്ഷ​മാ​യി​രി​ക്കു​ന്നു. ക​ഞ്ഞി​പാ​ർ​ച്ച​യും സൗ​ജ​ന്യ​ചി​കി​ത്സയും ധൂ​ർ​ത്ത​മാം​വി​ധം സ​ദു​പ​ദേ​ശ​ങ്ങ​ളും ന​ൽ​കു​മ്പോ​ഴും, മൗ​ലി​ക​മാ​യി മ​നു​ഷ്യ​ർ​ക്കാ​വ​ശ്യ​മു​ള്ള മ​നു​ഷ്യ​പ്പ​റ്റ് അ​തി​ൽ​നി​ന്നും ചോ​ർ​ന്നുപോ​യി​രി​ക്കു​ന്നു. സ്വ​ന്തം വി​ള​ക്കാ​വാ​നു​ള്ള പ​രി​ശീ​ല​ന​മ​ല്ല, നി​ർ​മ​ല​രാ​വാ​നു​ള്ള നി​ർ​ദേശ​മ​ല്ല, സ്വ​ന്തം കാ​ലി​ന​ടി​യി​ലെ മ​ണ്ണ് വാരും​വി​ധം മ​നു​ഷ്യ​രെ അ​ടി​മ​ക​ളാ​ക്കാ​നു​ള്ള പ​രോ​ക്ഷ നി​ർ​ബ​ന്ധ​ങ്ങ​ളാ​ണ്, നി​ർ​ബന്ധ​ങ്ങ​ളൊ​ന്നു​മി​ല്ലെ​ന്ന മ​ട്ടി​ൽ ന​ട​പ്പാ​ക്ക​പ്പെ​ടു​ന്ന​ത്! ഹാ​ഥ്റ​സി​ൽ ന​ട​ന്ന ദു​ര​ന്തം​പോ​ലും ഭോ​ലെ​ ബാ​ബ​യു​ടെ ആ​ഗ്ര​ഹ​പ്ര​കാ​രം ന​ട​ന്ന​താ​ണെ​ന്ന് സ്വ​യം വി​ശ്വ​സി​ക്കു​ക​യും മ​റ്റു​ള്ള​വ​രെ വി​ശ്വ​സി​പ്പി​ക്കാ​ൻ ശ്ര​മി​ക്കു​ക​യും ചെ​യ്യു​ന്ന അ​ടി​മ​ക്കൂ​ട്ട​ങ്ങ​ൾ സ​ത്യ​ത്തി​ൽ ഹാ​ഥ്റ​സിൽ ഇ​പ്പോ​ൾ ന​ട​ന്ന ദു​ര​ന്ത​ത്തേ​ക്കാ​ൾ വ​ലി​യ സാ​മൂ​ഹിക ദു​ര​ന്ത​മാ​ണ്. നി​ര​വ​ധി​പേ​ർ മ​രി​ച്ചു. അ​ത് സം​ഭ​വി​ക്കേ​ണ്ട​താ​യി​രു​ന്നു. ബാ​ബ​യു​ടെ ഇ​ച്ഛയാ​ണി​ത്. മ​രി​ക്കേ​ണ്ട​വ​ർ വീ​ട്ടി​ലാ​യാ​ലും മ​രി​ക്കും. ബാ​ബ​യെ ഭ​യ​പ്പെ​ടു​ക​യും ആ​രാ​ധി​ക്കു​ക​യും ചെ​യ്താ​ൽ ര​ക്ഷ​പ്പെ​ടും. ആ​ളു​ക​ൾ വീ​ഴാ​ൻ തു​ട​ങ്ങി​യ​തോ​ടെ വേ​ദി​വി​ടു​ന്ന​വ​ർ ര​ക്ഷ​പ്പെ​ടു​മെ​ന്ന് ബാ​ബ പ​റ​ഞ്ഞി​രു​ന്നു എ​ന്ന ബാ​ബ​ഭ​ക്തന്റെ ഹാ​ഥ്റ​സ്​ ദു​ര​ന്താ​ന​ന്ത​ര സ​ന്ദേ​ശം പ​ങ്കു​വെ​ക്കു​ന്ന​ത് ക്രൂ​ര​വും ല​ജ്ജാ​ക​ര​വു​മാ​യ തൊ​മ്മി മാ​ന​സി​കാ​വ​സ്​​ഥ​യാ​ണ്. കേ​വ​ലം മ​ൺ​തു​രു​മ്പി​ൽ കി​ട​പ്പൂ ദേ​വ​ലോ​കം തു​റ​ക്കും താ​ക്കോ​ൽ എ​ന്ന് മു​മ്പ് വൈ​ലോ​പ്പി​ള്ളി. അ​ത് എ​ക്കാ​ല​ത്തെയും ആ​ത്മബോ​ധ​മു​ള്ള മ​ണ്ണിന്റെ​ മ​ക്ക​ൾ​ക്കു​ള്ള അ​ഭി​വാ​ദ്യ​മാ​യി​രു​ന്നു. എ​ന്നാ​ലി​പ്പോ​ൾ ഹാ​ഥ്റ​സി​ലെ ഭോ​ലെ​ ബാ​ബ​യു​ടെ കാ​ൽ​പാ​ദം പ​തി​ഞ്ഞ മ​ണ്ണ്, കു​ഴി​മാ​ട​ങ്ങ​ളി​ലേ​ക്കു​ള്ള ഒ​രു നി​സ്സ​ഹാ​യ​ജ​ന​ത​യു​ടെ വീ​ഴ്ച​യാ​യി മാ​റു​ക​യാ​ണു​ണ്ടാ​യ​ത്.

.